Mazamure Maxaafaa 126 - Wolaytta Bible

Pudettaa kiyiiddi yexxido yettaa

¹ GODAI nuna omoodettidaageeta zaaridi, Yerusalaame ehiido wode, nuuyyo aimo milatiis.

² He wode nuuni daro ufaitti miiccidi, ufaissaa yettaa yexxida. Yaatin, hara kawotettati bantta giddon, “Hageetussi GODAI gitabaa oottiis” yaagidosona.

³ Tumukka GODAI nuussi gitabaa oottiis; nuunikka keehippe ufaittida.

⁴ Abeet GODAU, Neegeeba Bazzuwan iraa bukissada, shaafaa haattaa zaarada kunttiyoogaadan, nuuyyookka nu aquwaa zaara.

⁵ Yeekkiiddi zeridaageeti, ufaissau yexxiiddi cakkona.

⁶ Zerettaa tookkidi, yeekkiiddi biidaagee, ufaissa yettaa yexxiiddi, mirqqiyaa tookkidi simmana.