Mazamure Maxaafaa 122 - Wolaytta Bible

Pudettaa kiyiiddi yexxido yettaa, Daawiti xaafidoogaa

¹ Eti tana, “Ane GODAA keettaa boos” yaagin, taani ufaittaas.

² Nenoo Yerusalaame katamau, nuuni ne penggetuura gelidi eqqida!

³ Yerusalaame katamai, asai issippetettan de7iyo lo77o keexettida katama.

⁴ GODAA awaajjuwaadan zareti, Israa7eela zareti, GODAA galatanau yiyo katamai hagaa.

⁵ Daawita zerettaappe kawotidaageeti bantta asaayyo pirddanau yan uttidosona.

⁶ Yerusalaame sarotettaayyo hagaadan yaagidi woossite; “Nena siiqiyaageetau eti oottiyoobai ubbai injjeto!

⁷ Ne gimbbetu giddon saroi de7o! Ne qatotakka bochchiyaabai xayo!” yaagidi woossite.

⁸ Ta ishatunne ta dabbotu gishshau gaada, “Ne giddon saroi de7o!” yaagais.

⁹ GODAA nu Xoossaa keettaa gishshau gaada, taani Yerusalaamee duretanau woossana.