Mazamure Maxaafaa 119 - Wolaytta Bible

Alef

¹ Bantta ogiyan boree bainnaageetinne GODAA higgiyaadan hemettiyaageeti anjjettidaageeta.

² I yootidoogaa oottiyaageetinne bantta kumetta wozanaappe a koyiyaageeti anjjettidaageeta.

³ Eti mulekka balabaa oottokkona; GODAA ogiyan hemettoosona.

⁴ Ne wogaayyo ammanettidi naagana mala, neeni nuna azazadasa.

⁵ Ne awaajjuwaassi azazettiyoogan ta ogee minnanaadan amottais.

⁶ Yaatikko, ne azazuwaa ubbaa ezggada, taani mulekka yeellatikke.

⁷ Ne xillo pirddaa tamaaraidda, taani nena suure wozanaappe galatana.

⁸ Taani ne awaajjuwaadan oottana; tana mulekka yeggoppa.

Beet

⁹ Yelagai ba ogiyaa geeshsha oottidi waati naaganau danddayii? Ne qaalai giyoogaadan de7ikko danddayees.

¹⁰ Taani ta polo wozanaappe nena koyais; ne azazotuppe wora hemettennaadan tana naaga.

¹¹ Taani nena naaqqennaadan ne qaalaa ta wozanan wottaas.

¹² Abeet GODAU, neeni galatetta! Ne awaajjuwaa tana tamaarissa.

¹³ Ne doonaappe kiyida pirddaa taani ta inxxarssan yootais.

¹⁴ Duretettan ufaittiyoogaappe, taani neeni yootidoban aatta ufaittais.

¹⁵ Ne wogata zaara zaarada qoppaisinne ne ogiyaa loitta akeekais.

¹⁶ Taani ne awaajjuwan ufaittais; ne qaalaakka taani dogikke.

Gaameel

¹⁷ Taani paxa de7ana malanne ne qaalaayyo azazettana mala, taassi ne ashkkaraassi kehabaa ootta.

¹⁸ Ne higgiyaa giddon de7iya maalaalissiya tumatettaa taani be7ana mala, ta aifiyaa poga.

¹⁹ Taani ha sa7an imatta; ne azazota taappe genttoppa.

²⁰ Taani ubba wode ne pirddaa laamotaidda haiqqais.

²¹ Otorettiyaageeta, qanggettidaageeta, ne azazuwaappe wora hemettiyaageeta neeni seeraasa.

²² Taani neeni yootidoogaa oottido gishshau, eta cashshaanne eta karettaa ta bollaappe digga.

²³ Harai atto halaqati shiiqidi, ta bolli maqettikkokka, taani, ne ashkkarai, ne awaajjuwaa zaara zaarada qoppana.

²⁴ Neeni yootidoogee tana ufaissees; i tana zorees.

Daaleex

²⁵ Taani haiqqana hanais; neeni giido qaalaadan ta shemppuwaa ashsha.

²⁶ Taani ta ogiyaabaa neessi yootin, neeni taayyo siyadasa; simmi ne awaajjuwaa tana tamaarissa.

²⁷ Ne wogaa ogiyaa tana akeekissa; maalaalissiya ne oosuwaa taani zaara zaaradakka qoppana.

²⁸ Azzanoi daridoogan ta shemppoi daafuriis; neeni giido qaalaadan tana minttetta.

²⁹ Worddo ogiyaa taappe haassa; ne aaro kehatettan ne higgiyaa tana tamaarissa.

³⁰ Taani tumaa ogiyaa dooraas; ne pirddaa ezggaas.

³¹ Abeet GODAU, taani neeni yootidoogaa mintta oiqqaas; simmi tana yeellayoppa!

³² Neeni tana daro wozanttido gishshau, taani ne azazuwaa ogiyan woxxais.

He

³³ Abeet GODAU, ne anjjuwaa birshshettaa tana tamaarissa; taani wurssettai gakkanau a naagana.

³⁴ Taani ne higgiyaa naagana malanne ta kumetta wozanaappe taani au azazettana mala, neeni taayyo akeekaa imma.

³⁵ Ne azazuwaa ogiyan tana kaaletta; aissi giikko, taani an ufaittais.

³⁶ Ta wozanaa miishshaakko gidennan, neeni yootidobaakko zaara.

³⁷ Pattennabaa xeellenna mala, ta aifeta teqqa; ne ogiyan ta de7uwaa ooraxissa.

³⁸ Neessi yayyiyaageetuyyo neeni giido qaalaa taassi, ne ashkkaraassi pola.

³⁹ Taani yayyiyo cashshaa taappe digga. Ne pirddai ai mala lo77oo!

⁴⁰ Taani ne wogaa naaganau amottais; neeni xillo gidiyo gishshau, ta de7uwaa ooraxissa.

Waaw

⁴¹ Abeet GODAU, aggenna ne siiquwaa tana bessa; neeni giido qaalaadan tana ashsha.

⁴² Taani ne qaalan ammanettiyo gishshau, tana cayiyaageetuyyo zaaranau danddayais.

⁴³ Taani ne pirddan ufaissaa oottiyo gishshau, ta inxxarssaappe tumatettaa qaalaa xaissoppa.

⁴⁴ Taani ubbatoo, meri merinaukka ne higgiyaassi azazettana.

⁴⁵ Taani ne wogaa poliyo gishshau, aahuwan hemettana.

⁴⁶ Taani kawotu sinttan eqqada, neeni yootidobaa yootaidda yeellatikke.

⁴⁷ Taani ne azazota siiqiyo gishshau, etan ufaittais.

⁴⁸ Taani siiqiyo ne azazota bonchchais; ne awaajjuwaakka zaara zaarada qoppana.

Zaaw

⁴⁹ Neeni taassi, ne ashkkaraassi, immido qaalaa qoppa; he qaalan taani ufaissaa oottais.

⁵⁰ Neeni, “Taani nena paxa wottana” giido qaalai ta tuggaa wode tana minttettees.

⁵¹ Otoranchchati tana likkiyaappe aattidi cayoosona; shin taani ne higgiyaappe sher77i giikke.

⁵² Abeet GODAU, beniisappe de7iya ne pirddaa taani hassayais; hegan taani minettais.

⁵³ Iitati ne higgiyaayyo azazettennaagaa be7in, yiilloi tana worees.

⁵⁴ Taani de7iyo allaga biittan ne awaajjoi taayyo yexxiyoobaa gidiis.

⁵⁵ Abeet GODAU, taani qammi ne sunttaa qoppais; ne higgiyaakka naagais.

⁵⁶ Ne wogaassi azazettiyoogee taayyo anjjo gidiis.

Heet

⁵⁷ Abeet GODAU, tana gakkida saamai nena; taani ne qaalaassi azazettana yaagais.

⁵⁸ Taani ta kumetta wozanaappe nena woossais. Neeni giido qaalaadan taayyo qaretta.

⁵⁹ Taani ta ogiyaa akeeka xeellada, neeni yootidobaakko simmaas.

⁶⁰ Taani ne azazuwaa naaganau, eesotanaappe attin takkikke.

⁶¹ Iitati tana wodoruwaara dooddikkokka, taani ne higgiyaa dogabeikke.

⁶² Ne xillo pirddaa gishshau, nena galatanau, taani qamma bilahe denddais.

⁶³ Taani neeyyo yayyiyaageetu ubbaayyoonne ne wogaa naagiyaageetuyyo dabbo.

⁶⁴ Abeet GODAU, sa7ai aggenna ne siiquwan kumiis; ne awaajjuwaa tana tamaarissa.

Xeet

⁶⁵ Abeet GODAU, ne giido qaalaadan taassi ne ashkkaraassi kehabaa oottadasa.

⁶⁶ Taani ne azazotan ammanettiyo gishshau, lo77o pirddaanne eratettaa tana tamaarissa.

⁶⁷ Taani qaxxayettanaappe kase wora hemettaas; shin ha77i ne qaalau azazettais.

⁶⁸ Neeni keha; neeni kehabaa oottaasa; ne awaajjuwaa tana tamaarissa.

⁶⁹ Otoranchchati tana wordduwaa tiyoosona; shin taani ne wogaa ta kumetta wozanaappe naagana.

⁷⁰ Eta wozanai mulekka damma; shin taani ne higgiyan ufaittais.

⁷¹ Taani qaxxayettidoogee tau lo77iis; aissi giikko, ne awaajjuwaa tamaaranaassi tana maaddiis.

⁷² Daro sha7u worqqaappenne biraappe, ne doonaappe kiyida higgee taayyo aadhdhees.

Yod

⁷³ Tana ne kushee medhdhiisinne giigissiis. Ne azazuwaa taani tamaarana mala, taayyo akeekaa imma.

⁷⁴ Taani ne qaalan ufaissaa oottido gishshau, neessi yayyiyaageeti tana be7idi ufaittona.

⁷⁵ Abeet GODAU, ne pirddai xillo gidiyoogaanne neeni tana tuman qaxxayidoogaa taani erais.

⁷⁶ Neeni taayyo ne ashkkaraayyo giido qaalaadan, aggenna ne siiqoi tana minttetto.

⁷⁷ Taani paxa de7ana mala, taayyo qaretta; aissi giikko, ne higgee tana ufaissees.

⁷⁸ Otoranchchati wordduwan tana qohiyo gishshau, yeellatona. Tana gidikko, taani ne wogata zaara zaarada qoppais.

⁷⁹ Neessi yayyiyaageetinne neeni yootidobaa eriyaageeti ubbai taakko yona.

⁸⁰ Taani yeellatenna mala, ne awaajjuwaassi azazettiyoogan boree bainnaagaa gidarkkinaa!

Kaaf

⁸¹ Neeni tana ashshana mala, taani naagaidda daafurais; taani ne qaalan ufaissaa oottais.

⁸² Neeni giido qaalai polettin be7anau xeelliiddi, ta aifee galjjiis. Taani, “Bau neeni tana aude minttettaneeshsha?” yaagais.

⁸³ Cuwan kaqqido ogoruwaa gidada gunddaas; gidikkonne, ne awaajjuwaa balikke.

⁸⁴ Taani ne ashkkarai aude gakkanaassi naagoo? Tana yedettiyaageeta neeni aude pirdduutee?

⁸⁵ Ne higgiyaa naagenna otoranchchati tana onggana giidi, taayyo ollaa bookkoosona.

⁸⁶ Ne azazoti ubbai ammanttiyaageeta. Tana asati wordduwan yedettiyo gishshau, hai tana maadda!

⁸⁷ Eti tana worirggidi qiisan ashshidosona; shin taani ne wogaa aggabeikke.

⁸⁸ Aggenna ne siiquwan ta de7uwaa naaga; hegeenne, neeni ne doonaappe yootidoogaa taani naaganaassa.

Laamed

⁸⁹ Abeet GODAU, ne qaalai merinaagaa; inne saluwan minnidi de7ees.

⁹⁰ Neeni yeletaappe yeletaa gakkanaassi ammanettiyaagaa. Neeni ha sa7aa baasada essadasa; inne minnidi de7ees.

⁹¹ Neeni giidoogaadan ubbabaikka hachchi gakkanaassi minnidi de7ees; aissi giikko, ubbatikka ne ashkkarata.

⁹² Ne higgee tana ufaissennabaa gidiyaakko, ta tuggaa wode taani xayana shin.

⁹³ Taani ne wogaa mulekka dogikke; aissi giikko, neeni an tana paxa wottadasa.

⁹⁴ Taani nebaattennee; tana ashsha; aissi giikko, taani ne wogaa naaganau koyais.

⁹⁵ Iitati tana xaissanau zuggidi naagoosona; shin taani neeni yootidoogaa qoppais.

⁹⁶ Ubbabau zawi de7iyoogaa taani be7aas; shin ne higgiyau zawi baawa.

Meem

⁹⁷ Taani ne higgiyaa aiba siiqiyaanaa! Gallassaa kumettaa taani qoppiyoogee a.

⁹⁸ Ne azazoti ubba wodekka tanaara de7iyo gishshau, eti tana ta morkketuppe aadhdhida eranchcha kessoosona.

⁹⁹ Taani neeni yootidoogaa qoppiyo gishshau, tana tamaarissida ubbaappekka aadhdhida akeekai taayyo de7ees.

¹⁰⁰ Taani ne wogaayyo azazettiyo gishshau, cimatuugaappe aattada akeekais.

¹⁰¹ Taani ne qaalaayyo azazettanau koyiyo gishshau, ta tohuwaa iita oge ubbaappe naagaas.

¹⁰² Neeni tana tamaarissido gishshau, taani ne pirddaappe wora babeikke.

¹⁰³ Ne qaalai aiba mal77ii! Eessaa ililuwaappekka aadhdhidi, ta manggaagan mal77ees.

¹⁰⁴ Ne wogaappe akeekaa demmaas; hegaa gishshau, taani geella oge ubbaa ixxais.

Noon

¹⁰⁵ Ne qaalai ta gediyaassi xomppe, ta ogiyaassikka poo7o.

¹⁰⁶ Ne xillo pirddaadan de7anau, taani caaqqido caaquwaa minttana.

¹⁰⁷ Taani daro tuggataas; abeet GODAU, neeni giido qaalaadan tana paxa wotta.

¹⁰⁸ Abeet GODAU, ta doonaappe kiyiya galataa ekka; tana pirddaa tamaarissa.

¹⁰⁹ Taani ne gishshau, ta shemppuwaa immanau giigaas; taani ne higgiyaa dogikke.

¹¹⁰ Iitati taayyo gitiyaa yeggidosona; shin taani ne wogaappe sher77i gabeikke.

¹¹¹ Neeni yootidobai merinau tabaa; ee, i ta wozanaayyo ufaissa.

¹¹² Taani merinau, wurssettaa gakkanau ne awaajjuwaadan oottanau qachchaas.

Samkket

¹¹³ Taani naa77u qofai de7iyo asata ixxais; shin ne higgiyaa siiqais.

¹¹⁴ Neeni taayyo qosetta attiyo sohonne ta gonddalliyaa; taani ne qaalan ufaissaa oottais.

¹¹⁵ Taani ta Xoossaa azazuwaa naagana mala, inttenoo, iitabaa oottiyaageetoo, taappe haakkite!

¹¹⁶ Neeni giido qaalaadan tana kaafa; yaatikko, taani paxa de7ana. Taani ufaissan naagiyooban tana yeellayoppa.

¹¹⁷ Tana zemppissa; yaatikko, taani saro de7ana; taani ubba wode ne awaajjuwaa ezggana.

¹¹⁸ Ne awaajjuwaappe wora biyaageeta ubbaa neeni ekkakka; eta cimoi coo hada.

¹¹⁹ Sa7an de7iya iitata ubbaa neeni pitodan qoodaasa; hegaa gishshau, taani neeni yootidobaa siiqais.

¹²⁰ Ta bollai neessi yayyidi kokkorees; taani ne pirddaassi yayyais.

Ee

¹²¹ Taani likkebaanne xillobaa oottaas; tana huqqunniyaageetussi oloppa.

¹²² Tana ne ashkkaraa maaddanau geppa; tana otoranchchatun huqqunnissoppa.

¹²³ Neeni, “Taani nena ashshana” giido qaalaa polo gaada naagishin, ta aifee galjjiis.

¹²⁴ Taayyo, ne ashkkaraayyo, neeni aggenna ne siiquwaadan ootta; ne awaajjuwaakka tana tamaarissa.

¹²⁵ Taani ne ashkkaraa; neeni yootiyoobaa taani erana mala, akeekaa taayyo imma.

¹²⁶ Abeet GODAU, asati ne higgiyaa menttido gishshau, neeni pirddanau wodee ha77a.

¹²⁷ Taani ne azazuwaa worqqaappe aattada siiqais; ee, geeshsha worqqaappekka aattada siiqais.

¹²⁸ Hegaa gishshau, taani ne wogati ubbai giyoogaadan hemettais; geella oge ubbaa taani ixxais.

Pe

¹²⁹ Neeni yootidobai maalaalissiyaabaa; hegaa gishshau, taani au azazettais.

¹³⁰ Ne qaalaa birshshettai poo7uwaa immees; akeekai paccidoogeetussi akeekaa immees.

¹³¹ Taani ne azazuwaassi daro saamettada hel77ais.

¹³² Haa taakko simma; ne sunttaa siiqiyaageetu ubbau neeni oottiyoogaadan taassikka qaretta.

¹³³ Neeni giido qaalaadan ta hemetaa suurissa; ai nagarinne tana haaroppo.

¹³⁴ Taani ne wogaayyo azazettanau, tana huqqunnidaageetu kushiyaappe woza.

¹³⁵ Ta bolli, ne ashkkaraa bolli, ne som77uwaa poo7issa; ne awaajjuwaakka tamaarissa.

¹³⁶ Ne higgiyau asai azazettibeenna gishshau, ta aifiyaappe afuttai shaafaadan goggees.

Xaade

¹³⁷ Abeet GODAU, neeni xillo; ne pirddaikka likke.

¹³⁸ Neeni yootidobai xillonne mule ammanettiyaagaa.

¹³⁹ Ta morkketi ne qaalaa toochchido gishshau, ne qaalaa mishoi ta gomppan eexxi kiyiis.

¹⁴⁰ Neeni giido qaalai daroppe ammanettiyaagaa; taani, ne ashkkarai a siiqais.

¹⁴¹ Taani guuttanne karettida asa; gidikkonne, taani ne wogaa dogikke.

¹⁴² Ne xillotettai merinau de7ees; ne higgeekka tuma.

¹⁴³ Metoinne tuggai tana gakkiis; shin ne azazoti tana ufaissoosona.

¹⁴⁴ Neeni yootidobai merinaukka xillo; taani paxa de7ana mala, akeekaa taayyo imma.

Qof

¹⁴⁵ Abeet GODAU, kumetta wozanaappe neeyyo waassaas; taayyo alla. Taaninne ne awaajjuwaassi azazettana.

¹⁴⁶ Taani neeyyo waassaas; tana ashsha; taaninne neeni yootidobaa oottana.

¹⁴⁷ Xalqqee dolenna guuran denddada, “Tana maadda” gaada neeyyo waassais. Neeni taayyo giido qaalan ufaissaa oottais.

¹⁴⁸ Ne qaalaabaa zaara zaarada qoppanau, qamma utta aqais.

¹⁴⁹ Abeet GODAU, aggenna ne siiquwaa gishshau, tabaa siya; ne xillo pirddaadan tana paxa wotta.

¹⁵⁰ Iitabau tana yedettiyaageeti tana matoosona; eti ne higgiyaappe haakkoosona.

¹⁵¹ SHin abeet GODAU, neeni ta matan de7aasa; ne azazoti ubbaikka tuma.

¹⁵² Taani benippe doommada, neeni yootidobaa tamaaraas; a neeni merinau mintta essadasa.

Rees

¹⁵³ Ta tuggaa be7ada, tana ashsha; aissi giikko, taani ne higgiyaa dogabeikke.

¹⁵⁴ Ta gishshaa mootettada tana shatintta; neeni giido qaalaadan tana paxa wotta.

¹⁵⁵ Ne awaajjuwaa eti ekkenna gishshau, atotettai iitatuppe haahuwan de7ees.

¹⁵⁶ Abeet GODAU, ne qaretai daro; ne xillo pirddaadan tana paxa wotta.

¹⁵⁷ Ta morkketinne tana yedettiyaageeti daro; shin taani neeni yootidobaappe sher77i giikke.

¹⁵⁸ Eti ne azazota naagenna gishshau, taani kaddanchchata be7ada shenetaas.

¹⁵⁹ Abeet GODAU, taani ne wogaa siiqiyo siiquwaa qoppa; aggenna ne siiquwaadan tana paxa wotta.

¹⁶⁰ Ne qaalai koirokka tuma; ne xillo pirddai ubbaikka merinau de7ees.

Saan

¹⁶¹ Halaqati tana coo yedettoosona; shin ta wozanai ne qaalau yayyees.

¹⁶² Darobaa omooddida asi ufaittiyoogaadan, neeni giido qaalan taani ufaittais.

¹⁶³ Taani wordduwaa ixxaisinne shenetais; shin ne higgiyaa siiqais.

¹⁶⁴ Ne xillo pirddaa gishshau, taani nena gallassan laapputon galatais.

¹⁶⁵ Ne higgiyaa siiqiyaageetau kumetta sarotettai de7ees; eta mulekka aibinne xubettanau danddayenna.

¹⁶⁶ Abeet GODAU, taani ne atotettaa ufaissan naagais; ne azazotakka oottais.

¹⁶⁷ Taani neeni yootidobaa naagais; taani daroppe a siiqais.

¹⁶⁸ Taani ne wogaassinne neeni yootidobaassi azazettana; aissi giikko, ta ogiyaa ubbaa neeni be7aasa.

Taaw

¹⁶⁹ Abeet GODAU, ta waasoi ne sintti gakko; neeni giido qaalaadan taayyo akeekaa imma.

¹⁷⁰ Ta watiwatoi ne sintti gakko; neeni giido qaalaadan tana ashsha.

¹⁷¹ Neeni ne awaajjuwaa tana tamaarissiyo gishshau, ta doonaappe galatai pulttana.

¹⁷² Ne azazoti ubbai xillo gidiyo gishshau, ta inxxarssai ne qaalaabaa yexxana.

¹⁷³ Taani ne wogaa doorido gishshau, ne kushee tana maaddanau giigidaagaa gido.

¹⁷⁴ Abeet GODAU, neeni tana ashshanaagaa laamotais; ne higgeenne tana ufaissees.

¹⁷⁵ Taani nena galatana mala, tana paxa wotta; ne pirddaikka tana maaddo.

¹⁷⁶ Taani bayida dorssadan bichchaarais; tana ne ashkkaraa koya; aissi giikko, taani ne azazuwaa dogabeikke.