Mazamure Maxaafaa 118 - Wolaytta Bible

¹ GODAA galatite! Aissi giikko, i keha. Aggenna a siiqoi merinaagaa.

² Israa7eela asai, “Aggenna a siiqoi merinaagaa” yaago.

³ Aaroona keettaa asai, “Aggenna a siiqoi merinaagaa” yaago.

⁴ GODAASSI yayyiyaageeti ubbai, “Aggenna a siiqoi merinaagaa” yaagona.

⁵ Taani un77ettido wode GODAAYYO waassaas; waassin i ta waasuwaa allidi, tana kessiis.

⁶ GODAI tanaara de7iyo gishshau, taani yayyikke. Asi tana ai oottii?

⁷ GODAI tana maaddanau tanaara de7ees; ta morkketi xoonettidaageeta taani be7ana.

⁸ Asan ammanettiyoogaappe GODAAKKO baqatiyoogee lo77o.

⁹ Daannatun ammanettiyoogaappe GODAAKKO baqatiyoogee lo77o.

¹⁰ Kawotettati ubbai tana dooddi oiqqidosona; shin GODAA sunttan taani eta xoonaas.

¹¹ Eti tana dooddidosona; ubbasaara dooddi oiqqidosona; shin GODAA sunttan taani eta xoonaas.

¹² Eti mattai gau7idoogaadan, ta yuushuwan gau7idosona. SHin agunttai taman eexxiyoogaadan eexxi xayidosona. GODAA sunttan taani eta xoonaas.

¹³ Tana sugi yeggin, kunddana hanais; shin GODAI tana maaddiis.

¹⁴ GODAI taayyo wolqqanne minota; i tana ashshiyaagaa gidiis.

¹⁵ Olaa xoonidi simmiya asai xillotu dunkkaaniyan hombbociiddi, giyoobaa siyite. Eti, “GODAA ushachcha kushee wolqqaamabaa oottiis!

¹⁶ GODAA ushachcha kushee xoonuwaa immiis! GODAA ushachcha kushee wolqqaamabaa oottiis!” yaagoosona.

¹⁷ Taani haiqqikke; paxa de7ananne GODAI oottidobaa awaajjana.

¹⁸ GODAI tana iita qaxxayuwaa qaxxayiis; shin haiquwaayyo aattidi immibeenna.

¹⁹ Taani giddo gelada GODAA galatana mala, Beeta Maqidasiyaa penggeta ane taayyo dooyite.

²⁰ Hagee GODAA penggiyaa; ha penggiyaara xillotu xalaalati geloosona.

²¹ Neeni taayyo siyido gishshaunne xoonuwaa immido gishshau, taani nena galatais.

²² Gimbbiyaageeti karidi ixxido shuchchai, godaa xaphuwaa minttiya, ubbaappe aadhdhiya shuchcha gidiis.

²³ Hagee GODAI oottidobaa; qassi nu aifiyaassikka garamissiyaabaa.

²⁴ Hagee gallassai GODAI xoonuwaa immido gallassaa. Ane nuuni an ufaittoosinne ililoos.

²⁵ Abeet GODAU, hai nuna ashsharkkii! Abeet GODAU, hai nuussi injjeyarkkii!

²⁶ GODAA sunttan yiya asi anjjettidaagaa gido! Nuuni GODAA Beeta Maqidasiyaappe inttena anjjoos.

²⁷ GODAI Xoossaa; i nu bollan poo7issiis. Irxxa tashiyaa oiqqidi, ayyaana gallassaa bonchchite; yarshshiyoosaakka yuuyi aadhdhite.

²⁸ Neeni ta Xoossaa; taani nena galatana. Neeni ta Xoossaa; taani nena gitayana.

²⁹ GODAA galatite! Aissi giikko, i keha; aggenna a siiqoi merinaagaa.