Mazamure Maxaafaa 116 - Wolaytta Bible

¹ I ta cenggurssaanne ta watiwatuwaa siyido gishshau, taani GODAA siiqais.

² I ba haittaa taakko yeggido gishshau, taani paxa de7ido keenan ubban a xeesana.

³ Haiqoi piredan tana oiqqanau haniis; moogettana hirggai tana iissiis. Tana gashee toliis.

⁴ He wode taani, “Abeet GODAU, hadara! Tana ashsha” yaagada GODAA sunttaa xeesaas.

⁵ GODAI kehanne maariyaagaa; nu Xoossai qarettiyaagaa.

⁶ GODAI maaddiyaabi bainnaageeta naagees; taani metootido wode, i tana ashshiis.

⁷ Tanooshsho, simmi woppu ga; aissi giikko, GODAI neeyyo kehiis.

⁸ GODAI tana haiquwaappe, ta aifiyaa afuttaappe, ta tohuwaakka xubiyaappe ashshiis.

⁹ Hegaa gishshau, taani paxa de7iyaageetu giddon, GODAA sinttan hemettais.

¹⁰ Taani, “Tana gashee toliis” giyo wodekka, ta ammanuwaa aggabeikke.

¹¹ Taani dagammada, “Asi ubbi worddo” yaagaas.

¹² I taassi kehido kehatettaa gishshaa taani GODAASSI ai qanxxanau danddayiyaanaa?

¹³ Taani wancca kumetta woiniyaa eessaa galataassi shiishshaidda, GODAA sunttaa xeegana.

¹⁴ A asaa ubbaa sinttan taani shiiquwaa GODAAYYO gattana.

¹⁵ Geeshshatu haiqoi GODAA sinttan keehi daroppe bonchchettidaagaa.

¹⁶ Abeet GODAU, taani ne ashkkaraa; ee, taani ne ashkkaraa, ne ashkkaree na7aa. Tana qashuwaappe neeni birshshadasa.

¹⁷ Abeet GODAU, taani galataa yarshshuwaa neeyyo yarshshana; yarshshada ne sunttaa xeegana.

¹⁸ Asaa ubbaa sinttan taani shiiquwaa GODAAYYO gattana.

¹⁹ Hegaakka taani gattanaagee, Yerusalaamen de7iya GODAA keettaa dabaabaana. GODAA galatite!