Mazamure Maxaafaa 115 - Wolaytta Bible

¹ Abeet GODAU, nu gishsha gidenna; nu gishsha gidennan, aggenna ne siiquwaanne ne tumatettaa gishshau, nuuni ne sunttaa bonchchanau bessees.

² Dere asati aissi, “Eta Xoossai awan de7ii?” giyoonaa?

³ Nu Xoossai saluwaana; i ba dosidobaa aiba gidikkokka oottees.

⁴ SHin eta eeqati biranne worqqa; eti asa kushen merettidaageeta.

⁵ Etau doonai de7ees; shin haasayokkona; aifee de7ees; shin xeellokkona.

⁶ Etau haittai de7ees; shin siyokkona; siiree de7ees; shin singgokkona.

⁷ Etau kushee de7ees; shin oiqqi xeellokkona; tohoikka de7ees; shin hemettokkona; eti bantta qooriyaara cenggurssaa sissokkona.

⁸ Eta medhdhiyaageetinne etan ammanettiyaageeti ubbai eta mala gidona.

⁹ Inttenoo, Israa7eela asatoo, GODAN ammanettite! I inttena maaddiyaagaanne intte gonddalliyaa.

¹⁰ Inttenoo, Aaroona keettaa asatoo, GODAN ammanettite! I inttena maaddiyaagaanne intte gonddalliyaa.

¹¹ Inttenoo, GODAASSI yayyiyaageetoo, GODAN ammanettite! I inttena maaddiyaagaanne intte gonddalliyaa.

¹² GODAI nuna qoppees; i nuna anjjana. I Israa7eela asata anjjana. I Aaroona keettaa asata anjjana.

¹³ GODAASSI yayyiyaageeta, guuttatakka gitatakka i gatto anjjana.

¹⁴ GODAI inttenakka intte naatakka darisso!

¹⁵ Saluwaanne sa7aa medhdhida GODAN anjjettite!

¹⁶ Bolla xoqqa saloi Xoossaabaa; shin sa7aa i asaassi immiis.

¹⁷ Haiqqidaageeti, duufuwan co77u giidaageeti, GODAA galatokkona.

¹⁸ SHin nuuni, paxa de7iyaageeti, hachchippe doommidi merinaa gakkanaassi GODAA galatoos. GODAA galatite!