Mazamure Maxaafaa 112 - Wolaytta Bible

¹ GODAA galatite! GODAAYYO yayyiyanne a azazuwaa polanau daroppe ufaittiya asi anjjettidaagaa.

² A naati biittan wolqqaama gidana; suure asatu yeletai anjjettana.

³ Aqotai duretettai a keettan de7ees; a xillotettaikka merinau de7ana.

⁴ Suure asassi, keha, xillonne qarettiya asatussi, xumaa giddon poo7oi poo7ees.

⁵ Kehatettan coo tal77iya uraayyo, ba oosuwaa suuretettan oottiya uraayyo kehabai yaana.

⁶ Xillo asi audenne kunddenna; merinau i hassayettana.

⁷ Iitabaa i siyikkokka dagammenna; aissi giikko, a wozanai yeeqenna; GODAN i ammanettees.

⁸ A wozanai xala gidiyo gishshau, mulekka i yayyenna; wurssettan ba morkketi xoonettin be7ana.

⁹ I hiyyeesa asaayyo darissidi immiis; qassi a xillotettai merinau de7ees; a kaceenne bonchchuwan xoqqu gees.

¹⁰ Iita asi hegaa be7idi yiillotees; achchaa garccidi, coo xayees. Iita asa amoi coo attana.