Mazamure Maxaafaa 109 - Wolaytta Bible

Daawiti xaafido mazamuriyaa

¹ Abeet taani galatiyo Xoossau, neeni taayyo co77u gooppa.

² Aissi giikko, iita worddanchcha asati bantta doonaa ta bolli dooyidosona; eti worddo inxarssan ta bolli haasayoosona.

³ Eti ixo qaalaara tana dooddoosona; gaasoi bainnan tanaara ooyettoosona.

⁴ Taani eta siiqaisinne etau woossais; gidikkokka, eti tana mootoosona.

⁵ Taani lo77o oottin, eti taayyo iitaa zaaroosona; taani eta siiqin, eti tana ixxoosona.

⁶ Ta morkkiyaa bolli iita daannaa suntta; mootanchchai a ushachchan eqqo.

⁷ A qoriyo wode, i mooranchcha gididi beetto; a woosaikka ayyo simmidi gometo!

⁸ A baree qaammo; a sunttatettaakka harai ekko!

⁹ A naati aawa xayidi hiyyeesona; a maccaasiyaa am77e gidu!

¹⁰ A naati yuuyi yuuyidi woossona; bantta de7iyo onaappekka goodettona!

¹¹ A aquwaa ubbaa acuwaawai oiqqo; i daafuridi kessidobaa ubbaa allagai bonqqo!

¹² Ooninne ayyo kehabaa oottoppo, woikko aawa xayida a naatussi qarettoppo!

¹³ A naati ubbai wuri xayona; kaalliya yeletan a sunttai dogetto.

¹⁴ A aawatu nagarai GODAA sinttan qofetto; a aayee nagarai mulekka qucettoppo!

¹⁵ He nagarai ubbaton GODAA sinttan beetto; eta hassayissiyaabai sa7aappe xoqollettiichcho!

¹⁶ Aissi giikko, i kehabaa oottanau mulekka qoppibeenna; hiyyeesata, metootanchchatanne ixettidoogeeta gooddidi woriis.

¹⁷ I qangganau dosido gishshau, ikka qanggettidaagaa gido! I anjjanau dosenna gishshau, anjjoi appe haakko!

¹⁸ I qanggidi salenna; a qanggettai haattaadan a bollaa katto! Zaitiyaadan a meqettan gelo!

¹⁹ Afaladan a kammo; qabattodan ubbaton a xeessan de7o!

²⁰ Hagee tana mootiyaageetussinne tana iitan zigiriyaagetussi GODAI immiyo woito gido!

²¹ SHin abeet Ubbaa Haariya GODAU, ne sunttaa gishshau, tana maadda. Aggenna ne siiquwaanne ne kehatettaa gishshau, tana ashsha.

²² Aissi giikko, taani hiyyeesanne metootanchcha asa; ta wozanaikka mazunxxiis.

²³ Taani omarssa kuwaadan xayana hanais; taani booliyaadan qoqqofettais.

²⁴ Xoomishin ta gulbbatai hitiis; ta bollaikka laafiis.

²⁵ Tana mootiyaageetuyyo qilliicciyoobaa gidaas; eti tana be7idi, bantta huuphiyaa qaattoosona.

²⁶ Abeet GODAU ta Xoossau, tana maadda; aggenna ne siiquwaadan tana ashsha.

²⁷ Abeet GODAU, hegee ne kushe gididoogaanne hegaa neeni oottidoogaa ta morkketi erona.

²⁸ Eti tana qanggikkonne, neeni tana anjja! Ta bolli denddiyaageeti yeellatona; shin tana ne ashkkaraa ufaissa.

²⁹ Tana mootiyaageeti kaushshaa maayona; bantta yeellaakka kutadan qumaayona.

³⁰ Taani ta inxxarssan GODAA daroppe galatana; daro asai shiiqidosan a galatana.

³¹ Aissi giikko, i hiyyeesaa gishshaa mootettees; haiquwau pirddiyosaappekka a ashshees.