Mazamure Maxaafaa 108 - Wolaytta Bible

Daawita mazamuriyaa, yettaa

¹ Ta wozanai minnidi de7ees; abeet Xoossau, ta wozanai minnidi de7ees. Taani neeyyo yexxananne nena sabbana.

² Tanooshsho, beegotta! Diittaunne maazinqqiyau beegottite! Taanikka maallado guuraara beegottana.

³ Abeet GODAU, taani nena asaa giddon galatana; qassi kawotettaa giddon nena sabbana.

⁴ Aissi giikko, aggenna ne siiqoi gita; saluwaappe bollau aadhdhees. Ne tumatettaikka bolla shaaraadan xoqqees.

⁵ Abeet Xoossau, salotuppe bollaara xoqqu xoqqu ga! Ne bonchchoi sa7a ubbaa bolli gido.

⁶ Neeni siiqiyoogeeti attana mala, ne ushachcha kushiyan nuna ashsha; neeni taassi alla.

⁷ Xoossai ba geeshsha sohuwan hagaadan yaagiis; “Taani xoonada Sekeema biittaa shaakkana; qassi Sukkota Dilbbaa likkana.

⁸ Gala7aadee taagaa; Minaaseekka taassa; Efireemi ta huuphiyaa ashshiya qophe; Yihudai ta kawotaa xam77aa.

⁹ Moo7aabi taani meecettiyo kuixaaro; Eedoomi taagaa gidiyoogaa erissanau ta caammaa a bolli wottais. Taani Pilisxxeema xoonada gereerais” yaagiis.

¹⁰ Gimbbettida katamaakko, tana oonee efaanai? Eedooma gakkanaassi tana oonee kaalettanai?

¹¹ Abeet Xoossau, nuna aggidai nena gidikkii? Abeet Xoossau, neeni nu tooranchchatuura olau kiyakka.

¹² Asa maadoi pattenna gishshau, morkkiyaara olettanau neeni nuna maadda.

¹³ Xoossaa wolqqan nuuni nu morkketa xoonana; nu morkketa yedhdhanai a.