Mazamure Maxaafaa 107 - Wolaytta Bible

¹ GODAA galatite! Aissi giikko, i keha; aggenna a siiqoi merinaassa.

^2-3 GODAI ashshidoogeeti hegaadan giidi haasayona. Eti i eta morkketu kushiyaappe wozidoogeetanne i biittatuppe, awai mokkiyoosaappenne wulliyoosaappe, huuphessanne tohossa baggappe qoridi shiishshidoogeeta.

⁴ Etappe issoti issooti bazzo biittan yuuyidosona. Bantta de7iyo katamaa biyo ogiyaa demmanau danddayibookkona.

⁵ Eti namisettidosonanne saamettidosona; eti yibbaatidosona.

⁶ Eti metootido wode, GODAAYYO waassidosona; waassin i eta eta waayiyaappe ashshiis.

⁷ Eti de7ana katamaa gakkanaashin, i eta sitta ogiyaara kaalettiis.

⁸ Aggenna a siiquwaayyoonne i asaassi oottido maalaalissiyaabaayyo eti GODAA galatona.

⁹ Aissi giikko, i saamettidaageeta alees; namisettidaageetakka lo77obaa kalssees.

¹⁰ Etappe issoti issoti sakkana xumaa giddon uttidosona; eti birata sanssalatan qashettidaageeta.

¹¹ Aissi giikko, eti Xoossaa qaalaayyo makkalidosonanne Ubbaappe Xoqqiya Xoossaa zoriyaa karidosona.

¹² Eti tugga oosuwan daafuridosona; eti kunddidosona; shin eta maaddiyaabai xayiis.

¹³ Eti metootido wode, GODAAYYO waassidosona; waassin i eta eta waayiyaappe ashshiis.

¹⁴ Sakkana xumaappekka kessiis; eti qashettido birata sanssalataakka duuttiis.

¹⁵ Aggenna a siiquwaayyoonne i asaassi oottido maalaalissiyaabaayyo eti GODAA galatona.

¹⁶ Aissi giikko, i nahaasiyaappe oosettida gorddiyaa menttiis; birata hiraquwaakka xukkiis.

¹⁷ Etappe issoti issoti eeyya gididosona; bantta oottido nagaraa gaasuwaaninne bantta iitatettaa gaasuwan tuggatidosona.

¹⁸ Eti quma ubbaa shenetidi, haiquwau matidosona.

¹⁹ Eti metootido wode, GODAAYYO waassidosona; waassin i eta eta waayiyaappe ashshiis.

²⁰ I ba qaalaa kiittidi, eta pattiis; duufuwan geliyoosaappe ashshiis.

²¹ Aggenna a siiquwaayyoonne i asaassi oottido maalaalissiyaabaayyo eti GODAA galatona.

²² Eti ayyo galataa yarshshuwaa yarshshona; qassi ufaissa yettan i oottidobaa yootona.

²³ Etappe issoti issoti markkabiyan gita abbaa bollan biidosona. Eti he gita abbaa bolli bantta oosuwaa oottiyaageeta.

²⁴ Eti GODAA oosuwaa, i ciimmaa garssan oottido maalaalissiyaabaa be7idosona.

²⁵ I azazidi, gotiyaa denttiis; denddin abbaa dambbalai qaaxxiis.

²⁶ Qaaxxin markkabeti pude saluwaa cugudettidosona; hegaappe duge ciimmaa wodhdhidosona. He iita metoi gakkin, eta wozanai taahiis.

²⁷ Eti mattottida asadan xubettidi ganddigaaridosona; eta eraikka daallamiis.

²⁸ Eti metootido wode, GODAAYYO waassidosona; waassin i eta eta waayiyaappe ashshiis.

²⁹ I gotiyaa co77u oottiis; abbaa dambbalaakka sirphphi oottiis.

³⁰ Co77u giido gishshau, eti ufaittidosona; GODAI eta eti amottido katamaa kessiis.

³¹ Aggenna a siiquwaayyoonne i asaassi oottido maalaalissiyaabaayyo eti GODAA galatona.

³² Eti a asatu yaa7an xoqqu xoqqu oottona; qassi cimatu yaa7an a galatona.

^33-34 Hegan de7iya asatu iitatettaa gishshau, GODAI shaafata melissiis; pulttotikka goggennaadan teqqiis. Mokkiya aradda biittaakka mokkenna qa77e biittau laammiis.

³⁵ I mela bazzuwan haattai eellanaadan, qassi mela biittan pulttoi xuuqqanaadan oottiis.

³⁶ Namisettidaageeta he sohuwan wottiis; wottin eti banttau de7iyo katamaa keexxidosona.

³⁷ Eti bantta goshshan zeridi, woiniyaa tokkidi, daro murutaa shiishshidosona.

³⁸ I eta anjjin, eti keehi corattidosona; eta mehiyaakka guuttibeenna.

³⁹ Asati xoonettiyo wodenne eti huqqunnaa, metuwaanne azzanuwaa gaasuwan kauyyiyo wode,

⁴⁰ GODAI eta halaqata karidoogaa bessees; ogee bainna bazzuwan toilattanaadan i eta oottees.

⁴¹ SHin i hiyyeesata tuggaappe kessidi, eta keettaa asaa corayees.

⁴² Suure asati i oottiyoogaa be7idi ufaittoosona; shin iita asati ubbai co77u goosona.

⁴³ Eranchcha gidiyaagee ha yohuwaa qoppo; GODAA aggenna siiquwaa akeeko.