Mazamure Maxaafaa 106 - Wolaytta Bible

¹ GODAA galatite! I keha gidiyo gishshaunne aggenna a siiqoi merinaagaa gidiyo gishshau, GODAA galatite.

² GODAI oottido wolqqaama oosuwaa yootanau, woikko a galataa ubbaa qonccissanau danddayiyai oonee?

³ Pirddaa naagiyaageetinne ubbaton xillobaa oottiyaageeti anjjettidaageeta.

⁴ Abeet GODAU, neeni ne asaassi kehiyo wode, tanakka qoppa; eta neeni ashshiyo wode, taayyookka alla.

⁵ Hegeenne, ne doorido asaayyo sa7ai kehin, taani be7anaadaana, ne asaa ufaissaa taanikka ufaittanaadaananne neegeetuura issippe taanikka galatanaadaana.

⁶ Nuuni nu aawatudan nagaraa oottida; moorobaanne iitabaa oottida.

⁷ Nu aawati Gibxxen de7iyo wode, ne maalaalissiya oosuwaa qoppibookkona. Aggenna ne siiquwaa darotettaa eti hassayibookkona; Zo7o Abbaa lanqqiyan Ubbaappe Xoqqiya Xoossaa bolli makkalidosona.

⁸ Gidikkokka i ba sunttaa gishshau, ba gita wolqqaa erissanau eta ashshiis.

⁹ I Zo7o Abbaa azazin, abbai meliis; bazzuwan kaalettiyoogaadan, ciimmaa giddoora eta kaalettidi pinttiis.

¹⁰ Pinttidi i eta ixxiyaageetu kushiyaappe ashshiis; morkketu kushiyaappe eta woziis.

¹¹ Eta morkketa haattai mittiis; etappe issoinne attibeenna.

¹² He wode Israa7eelati a qaalaa ammanidosona; a sabbidosona.

¹³ Gidikkonne, eti i oottidoogaa sohuwaarakka dogidosona. A zoretaa naagennan bantta koyidoogaa oottidosona.

¹⁴ Bazzon de7iiddi, eti qumaa daroppe amottidosona; qassi Xoossaa paaccidosona.

¹⁵ Hegaadan i eti woossidoogaa immiis; shin iita harggiyaa eta giddo kiittiis.

¹⁶ Asati bazzon bantta dunkkaaniyan de7iiddi, Muusanne GODAASSI dummatida ashkkaraa Aaroona qanaatido wode,

¹⁷ biittai dooyettidi Daataana mittiis; Abiiraama a keetta asatuura moogiis.

¹⁸ Qassi eta maabaraa giddon tamai eexxin, lacoi he iita asata xuuggiis.

¹⁹ Koreba Deriyan de7iiddi, worqqaa seerissidi maraa misiliyaa medhdhidosona; medhdhidi he misiliyaayyo goinnidosona.

²⁰ Eti Xoossaa bonchchuwaa maataa miya miizzaa misiliyan laammidosona.

²¹ Eti banttana ashshida Xoossaa dogidosona; i Gibxxen gita oosuwaa,

²² Kaama biittan maalaalissiyaabaanne, Zo7o Abban, “Hoola!” giissiyaabaa oottidaagaa.

²³ Hegaa gishshau, Xoossai eta xaissana giis; shin xaissenna mala, a hanqquwaa zaaranau, Xoossai doorido Muusee gidduwan eqqiis.

²⁴ Hegaappe guyyiyan, eti a qaalaa ammanenna gishshau, he lo77o biittaa karidosona.

²⁵ Eti bantta dunkkaaniyaa giddon zuuzummidosonanne GODAA qaalaayyo azazettibookkona.

^26-27 Hegaa gishshau, i eta bazzon xaissanaagaa, eta zerettaa kawotettatu giddon laalanaagaanne biittan sa7an eta bete kessanaagaa ba kushiyaa denttidi caaqqiis.

²⁸ Hegaappe guyyiyan, eti Pa7ooran de7iya Ba7aala eeqaayyo goinniyaageetuura issippe gaittidosona; shemppoi bainna eeqatuyyo yarshshettida yarshshuwaa miidosona.

²⁹ Eti bantta oosuwan GODAA hanqqetissidosona; hanqqetissin eta giddon iita harggee wodhdhiis.

³⁰ SHin Piinihaasi denddidi, eta mooruwaa pirddin, iita harggee eta bollaappe kichchiis.

³¹ Hegeenne, yeletaappe yeletaa gakkanaassi merinau ayyo xillotetta gididi qoodettiis.

³² Mariiba pulttuwaa matan GODAA hanqqetissidosona; eta gaasuwan Muuse bolli metoi gakkiis.

³³ Aissi giikko, eti a yiilloyidosona; yiillotin Muuse doonaappe bessenna qaalai kiyiis.

³⁴ GODAI xaissite gin, eti Kanaane asata xaissibookkona.

³⁵ He palaappe, eti he asatuura geletti ehettidi, walahettidosonanne; eta de7uwaa wogaa kaallidosona.

³⁶ Xoossaa asati eta eeqaassi goinnidosona; hegeenne, etau pire gidiis.

³⁷ Eti bantta attumanne macca naata xalahetayyo yarshshidosona.

³⁸ Eti xillo suuttaa, Kanaane eeqatuyyo yarshshido bantta attumanne macca naatu suuttaa gussidosona; he suuttan biittai tuniis.

³⁹ Hegaadan eti bantta oosuwan tunidosonanne shaaramuxadan eti bantta Xoossaassi ammanettennan ixxidosona.

⁴⁰ Hegaa gishshau, GODAA hanqqoi a asaa bolli eexxi kiyiis; i baageeta shenetiis.

⁴¹ I eta hara dere asatu kushiyan aattidi immiis; eta ixxidaageeti eta haaridosona.

⁴² Eta morkketi eta naaqqidosonanne bantta sheniyan aissidosona.

⁴³ I eta daroto ashshiis; shin eti makkalaayyo gixxidi kiyidosona; bantta nagaraa gaasuwan xayidosona.

⁴⁴ Gidikkonne, i eti waassido waasuwaa siyidi, eta waayiyaa qoppiis.

⁴⁵ I eta gishshau, ba maachchaa hassayiis; aggenna ba siiquwaa daruwaadan eta maariis.

⁴⁶ Eta omooddida ubbai etau qarettanaadan oottiis.

⁴⁷ Abeet GODAU, nu Xoossau, nuna ashsha. Nuuni ne geeshsha sunttaa galatanaadaaninne ne bonchchuwan ceeqettanaadan, kawotettatu giddoppe nuna shiishsha.

⁴⁸ GODAI, Israa7eela Xoossai merinaappe merinaa gakkanaayyo galatetto! Asai ubbai, “Amin77i!” go. GODAA galatite!