Mazamure Maxaafaa 105 - Wolaytta Bible

¹ GODAA galatite; a sunttaa xeesite. I oottidobaa kawotettatu gidduwan erissite.

² A sabbite; galata yettaa au yexxite. A maalaalissiya oosuwaa ubbabaa yootite.

³ A geeshsha sunttan ceeqettite; GODAA koyiyaageetu wozanati ufaittona.

⁴ GODAANNE a wolqqaa xomoosite; ubbatoo a sinttaa koyite.

^5-6 Inttenoo, a ashkkaraa Abrahaama zerettatoo, doorettida Yaaqooba naatoo, i oottido maalaalissiyaabaa, a malaataanne i pirddido pirddaa hassayite.

⁷ I GODAA nu Xoossaa; a pirddaikka sa7aa ubbaa bollaana.

⁸ I ba maachchaa merinaassi, ba azazido qaalaa sha7u yeletaa gakkanaassi naagees.

⁹ Hegeenne, i Abrahaamaara maacettido maachchaa, Yisaaqassi caaqqido maachchaa,

¹⁰ Yaaqoobassi woga, Israa7eelassikka merinaa maachcha oottidi minttidoogaa.

¹¹ Hagaadan yaagiis; “Neeyyo Kanaane biittaa immana; i ne zerettatuyyo laata gidana” yaagiis.

¹² Xoossaa asati qoodan qii guuttanne Kanaane biittan bete gididi de7iyo wode,

¹³ issi deriyaappe hara deriyaa, issi kawotettaappe hara kawotettaa yuuyidosona.

¹⁴ Xoossai eta ooninne naaqqanau immibeenna; eta gishshau kawota seeriiddi,

¹⁵ “Taani tiyidoogeeta bochchoppite; ta hananabaa yootiyaageeta qohoppite” yaagiis.

¹⁶ GODAI Kanaane biittan koshaa yeddidi, eta kattaa ubbaa xaissiis.

¹⁷ SHin i ba asaa ashshanau, issi bitaniyaa Gibxxe kiittiis; he bitanee aille gididi baizettida Yooseefa.

¹⁸ A gedeti biratan qashettidosona; a qooriyankka sanssalatai aadhdhiis.

¹⁹ I kase yootidoogee tumattana gakkanaassi, GODAA qaalai a paacciis.

²⁰ Gibxxe kawoi, dereta haariyaagee kiittidi, a qasho keettaappe kessiis.

^21-22 Inne a ba keettau goda oottiisinne baayyo waanna halaqata azazana malanne ba cimata zorana mala, baayyo de7iyaabaa ubbaa bolli sunttiis.

²³ Hegaappe guyyiyan, Yaaqoobinne a keettaa asai Gibxxe geliis; he biittan bete gididi de7iis.

²⁴ GODAI ba asaa daro corayiis; eta morkketuppe eta aattidi minttiis.

²⁵ I Gibxxe asai ba asaa ixxanaadaaninne ba ashkkarata cimmanaadan oottiis.

²⁶ Hegaappe guyyiyan, ba ashkkaraa Muusanne ba doorido Aaroona etakko kiittiis.

²⁷ Eti Gibxxe asatu sinttan Xoossaa malaataa, eta biittan oorattabaa oottidosona.

²⁸ GODAI xumaa kiittidi, he biittaa xumissiis; shin Gibxxe asati a azazuwaa ixxisi giidosona.

²⁹ Eta haattaa suuttau laammidi, moleta ubbaa woriis.

³⁰ Eta biittaa ubbaa, kawuwaa keettaakka shodhdhee kumiis.

³¹ I azazin, udunxxeenne biinnee eta biittaa ubbaa bolli sham77i sham77iis.

³² Eta biittaa bollan iraa gishshaa shachchaa wolqqanttaara bukissiis.

³³ I eta woiniyaa turaanne balasiyaa giyo mittaa shociis; eta biittan de7iya mittaakka kinchcherettiis.

³⁴ I azazin, booleenne qoodai bainna ukkubboi kiyiis.

³⁵ Kiyidi eta biittan mokkida katta ubbaa miis; irxxabaa ubbaakka mi xaissiis.

³⁶ GODAI Gibxxe asatu soo baira naata ubbaa woriis; koiro yelettida ubbaa xaissiis.

³⁷ Hegaappe guyyiyan, i Israa7eela asaa worqqaanne biraa alleequwaara kessiis; eta giddoppe kunddidi attidai ooninne baawa.

³⁸ Gibxxe asati etau daro yayyido gishshau, eti kiyidoogaa ufaittidosona.

³⁹ GODAI eta kammanau shaaraa micciis; qamma etau poo7issanau tamaa giigissiis.

⁴⁰ Eti miyoobaa oichchin, kuraachcho misatiya kafota etau yeddiis; eta saluwaa qumaa kalissiis.

⁴¹ I shuchchaa phalqqin, haattai pulttiis; pulttidi shaafadan bazzon goggiis.

⁴² I ba ashkkaraa Abrahaamassi gelido geeshsha qaalaa hassayiis.

⁴³ I ba asaa ufaissan, ba dooridoogeeta ililssan kessiis.

⁴⁴ I etayyo dere asatu biittaa immiis; immin eti harati daafurido goshshaa laattidosona.

⁴⁵ Hegaa i oottidoogee eti a wogaa naaganaadaananne a higgiyaa oottanaadaana. GODAA galatite!