Mazamure Maxaafaa 104 - Wolaytta Bible

¹ Tanooshsho, GODAA galata! Abeet GODAU ta Xoossau, neeni ai keena gitee! Neeni bonchchuwaanne anggaa maayadasa.

² Poo7uwaa afaladan quuttadasa. Neeni saluwaa dunkkaaniyaadan toladasa.

³ Ne keettaa saluwaa gufanttuwaa bollan keexxaasa. SHaaraa para gaare kessaasa; carkkuwaa qefiyan toggaasa.

⁴ Neeni carkkota ne kiitanchcha, tamaa lacuwaakka ne ashkkara kessaasa.

⁵ Neeni sa7aa a baasuwaa bolli essadasa; i meri merinaukka qaaxxenna.

⁶ Gita abbai biittaa bollan afaladan micettiis; haattai gita dereta kammiis.

⁷ SHin ne godatuwan haattati baqatidosona; ne azazuwaa siyidi, eesotidosona.

⁸ Eti wogga deretuppe duge zanggaaraa, neeni etau bazzido sohuwaa goggidosona.

⁹ Haattati simmidi biittaa kammennaadan, eti aadhdhanau danddayenna zawaa essadasa.

¹⁰ Neeni pulttota zanggaaran pulttissaasa; eta haattai deretu gidduwaara goggees.

¹¹ Goggiyaagaappe bazzo do7ati ubbai uyoosona; dembbaa hareti bantta saamuwaa appe aloosona.

¹² Saluwaa kafoti he haattaa matan bantta keettaa keexxidi, tashiyaa giddon yexxoosona.

¹³ Neeni gita deretu bollan saluwaappe iraa bukissaasa; biittaikka ne anjjuwan kumees.

^14-15 Neeni mehiyaassi maataa, asaassi kattaa mokissaasa. Hegeenne, asai biittaa oottidi, biittaappe kattaa, asaa wozanaa ufaissiya woiniyaa, som77uwaa shicissiya zaitiyaanne wolqqaa kunttiya qumaa mokissanaassa.

¹⁶ GODAA mittati, i tokkido Liibaanoosa zigati, daro iraa uyoosona.

¹⁷ Etan kafoti bantta keettaa kexxoosona; qoolletikka xiiddaa bolli keexxidi de7oosona.

¹⁸ Xoqqa deretu bollan gaarati de7oosona; qassi guppalleti shuchchaa kooppuwan qosettoosona.

¹⁹ Wodiyaa qoodaa erissana mala, neeni aginaa medhdhadasa. Awai ba wulliyo wodiyaa erees.

²⁰ Neeni qammaa medhdhadasa; xuman do7a ubbai kiyees.

²¹ Wodala gaammoti shankkatiiddi gudoosona; eti banttau miyoobaa Xoossaappe koyoosona.

²² Awai mokkiyo wode, guyye simmidi bantta geessuwan zin77oosona.

²³ He wode asai ba oosuwaayyo kiyees; sa7ai qammana gakkanaassi oottees.

²⁴ Abeet GODAU, ne oosoi ai keena daroo! Ne aadhdhida eratettan neeni eta ubbaa medhdhadasa; sa7ai neeni medhdhidoban kumiis.

²⁵ Abbai hinin hegeehoo; i gitanne aaho; qoodai bainna qaaxxiya meretatun, gitatuuninne guuttatun kumidi de7ees.

²⁶ Hegaa bollan markkabeti boosona; qassi neeni medhdhido Lewaataana giyo miimminttee an kaa7ees.

²⁷ Neeni eta koshshiyo wodiyan etau qumaa immana mala, eti ubbai nena xeelloosona.

²⁸ Neeni etau immin, eti maxoosona; neeni ne kushiyaappe yeggin, eti lo77obaa kalloosona.

²⁹ Neeni ne som77uwaa genttiyo wode dagammoosona. Ne shemppuwaa neeni ekkiyo wode haiqqidi, bantta biittau simmoosona.

³⁰ SHin neeni ne shemppuwaa kiittiyo wode, harati merettoosona; biittaanne ooraxissaasa.

³¹ GODAA bonchchoi merinau de7o; GODAI ba oosuwan ufaitto.

³² I biittaa xeellin, biittai qaaxxees; qassi i dereta bochchin, dereti cuwattoosona.

³³ Taani ta de7o ubban GODAAYYO yexxana; taani paxa de7ido keenan ubban ta Xoossaa sabbana.

³⁴ Taani GODAN ufaittiyo gishshau, ta qofai a dosisso.

³⁵ Nagaranchchati biittaappe xayona; hagaappe sinttau iitati de7oppona. Tanooshsho, GODAA galata! GODAA galatite!