Mazamure Maxaafaa 103 - Wolaytta Bible

Daawiti xaafidoogaa

¹ Tanooshsho, GODAA galata! Ta kumetta asatettau, a geeshsha sunttaa galata.

² Tanooshsho, GODAA galata! I neeyyo oottido kehatettaa ubbaa dogoppa.

³ I ta nagaraa ubbaa atto gees; i ta harggiyaa ubbaappe tana pattees.

⁴ I tana duufuwan gelennaadan ashshees; aggenna siiquwaaninne maarotan tana anjjees.

⁵ Argganttaadan taani yelagana mala, i ta de7o ubban tana lo77obaa kalissees.

⁶ GODAI naaqettidaageetussi xillobaa ootteesinne suure pirddees.

⁷ I ba ogiyaa Muusa, ba oosuwaa Israa7eela asata erissiis.

⁸ GODAI qarettiyaagaanne maariyaagaa; i hanqqettanau eesotennaagaanne aggenna siiqoi dariyoogaa.

⁹ I ubbatoo seerenna; merinau hanqqettenna.

¹⁰ I nuna nu nagaraadan oottenna; nu iitatettaadan nuuyyo zaarenna.

¹¹ Saloi sa7aappe xoqqiyoogaadan, GODAAYYO yayyiyaageetuyyo aggenna a siiqoi gita.

¹² Awai mokkiyoosaappe awai wulliyoosai haakkiyoogaadan, hegaadankka GODAI nu mooruwaa nuuppe haassees.

¹³ Aawai ba naatuyyo qarettiyoogaadan, hegaadankka GODAI baassi yayyiyaageetuyyo qarettees.

¹⁴ Aissi giikko, nuuni aibippe merettidaakkonne i erees; nuuni biitta gidiyoogaa i akeekees.

¹⁵ Asa gidikko, a de7oi maataa mala; i bazzo ciishshaadan ciyyees;

¹⁶ ciyyidi, carkkoi a bolli carkkin xayi aggees; i naa77antto mulekka beettenna.

¹⁷ SHin GODAAYYO yayyiyaageetuyyo aggenna a siiqoi merinaappe merinaa gakkanaassa. A xillotettainne naatu naata gakkanaassa.

¹⁸ A maachchaa naagiyaageetussanne a azazuwaa polanau hassayiyaageetussa.

¹⁹ GODAI salotun ba kawotaa araataa essiis; a kawotettai ubbaa haarees.

²⁰ Inttenoo, a kiitanchchatoo, a azazuwaa poliya wolqqaamatoo, i giyoobaa ezggiyaageetoo, GODAA galatite!

²¹ Inttenoo saluwan de7iya minotoo, a sheniyaa oottiya ashkkaratoo, GODAA galatite!

²² Inttenoo, i haariyo soho ubban de7iya meretatoo, ubbaikka GODAA galatite! Tanooshsho, GODAA galata!