Mazamure Maxaafaa 102 - Wolaytta Bible

Tuggatida asi daafuridi maganniiddi, GODAA sinttan woossido woosaa

¹ Abeet GODAU, ta woosaa siya; ta waasoi neekko gakko.

² Ta waayiyaa gallassi ne som77uwaa taappe genttoppa. Ne haittaa taakko yegga; taani neeyyo waassiyo wode, taayyo eesuwan alla.

³ Aissi giikko, ta laittai cuwaadan xayees; ta asatettaikka tamaa bonqquwaadan eexxees.

⁴ Taani shoci yeggido mela maataadan hanaas; qumaikka taayyo meetettenna.

⁵ Taani ta qaalaa xoqqu oottada oolais; ta gogai meqettaara ohettiis.

⁶ Taani bazzon de7iya ankko mala, woikko qoqqofettida keettan de7iya gutto mala.

⁷ Taani zin77in, xiskkoi yeenna; taani keettaa huuphiyan barkka uttida kafo mala.

⁸ Ta morkketi gallassa ubban tana cayoosona; tana qilliicciyaageeti ta sunttan qanggoosona.

^9-10 Ne hanqquwaanne ne yiilluwaa gishshau, taani bidinttaa qumadan mais; qassi ta afuttaa ta ushshaara walakkais. Neeni tana pude denttada, wora oladasa.

¹¹ Ta de7o laittai omarssa kuwaa mala; taani maataadan melais.

¹² SHin abeet GODAU, neeni kawotaa araatan merinaayyo uttadasa; ne sunttaikka yeletaappe yeletaa gakkanaassi hassayettana.

¹³ Neeni denddada, Xiyoonessi qarettana; aissi giikko, neeni a maariyo wodee gakkiis; hagee neeni doorido wodiyaa.

¹⁴ I qolettidaagaa gidikkokka, ne ashkkarati a siiqoosona. I moorettidaagaa gidikkokka, eti ayyo qarettoosona.

¹⁵ Kawotettati GODAA sunttaayyo yayyana; sa7aa kawoti ubbai a anggaayyo dagammana.

¹⁶ Aissi giikko, GODAI Xiyoone zaaretti keexxidi, i ba gitatettaa bessana.

¹⁷ I hiyyeesatu woosaa siyana; eta watiwatuwaa karenna.

¹⁸ Biron yelettana asati GODAA galatana mala, hagee yiya yeletaayyo xaafetto.

¹⁹ GODAI xoqqan de7iya ba geeshsha sohuwaappe duge xeelliis; i saluwaappe duge sa7aa dereqqiis.

²⁰ Hegeenne, qashettida asatu ooliyaa siyanaassanne haiquwaassi pirddettida asata birshshanaassa.

²¹ Hegaa gishshau, GODAA sunttai Xiyoonen odettananne a galatai Yerusalaamen awaajettana.

²² Deretettainne kawotettai issippe shiiqidi, GODAAYYO he wode goinnana.

²³ I taani yelagatettan de7ishin, ta wolqqaa ixissiis; ta bariyaa qanttiis.

²⁴ Yaatin, taani, “Abeet ta Xoossau, taani de7uwaa biron giddottishin, tana ekkoppa” yaagais. Abeet GODAU, neeni yeletaappe yeletaa gakkanaassi de7aasa.

²⁵ Neeni beni sa7aa medhdhadasa; saloikka ne kushe ooso.

²⁶ Hegeeti ubbai xayana; shin neeni de7ana; eti ubbaikka afaladan wurana. Neeni eta curqqa afaladan laammana; etikka aadhdhana.

²⁷ SHin neeni nenakka; ne laittai mule wurenna.

²⁸ Nuuni ne ashkkarata; nu naati sarotettan de7ana. Eta zerettaikka ne sinttan minnidi eqqana.