Mazamure Maxaafaa 101 - Wolaytta Bible

Daawita mazamuriyaa

¹ Taani aggenna siiquwaabaanne xillo pirddaabaa yexxana; abeet GODAU, taani neeyyo yexxana.

² Taani suure ogiyaabaa qoppana. Neeni taakko aude yuutee? Taani ta keettan suuretettan hemettana.

³ Taani ta aifiyan pokkobaa xeellikke. Xoossaappe wora simmida asatu oosuwaa ixxais; eti mulekka tanaara gidokkona.

⁴ Wozanaa geellatettai taappe haakkana; iitatettaa taani erikke.

⁵ Geeman ba shooruwaa zigiriyaagaa taani sirphphi oottana. Otorettiyaanne ayyiya asa taani danddayikke.

⁶ Eti tanaara de7ana mala, biittaa bolli de7iya ammanettiyaageeta taani keha aifiyan xeellais. Suuretettan hemettiya asi taayyo kiitettana.

⁷ Cimmiyaagee ta keettan de7enna; wordduwaa haasayiyaagee ta sinttan gam77enna.

⁸ Biittan de7iya iita asaa ubbaa taani hachchi hachchi xaissana; iitaa oottiyaageeta ubbaa taani GODAA katamaappe xoqollana.