Mazamure Maxaafaa 10 - Wolaytta Bible

¹ Abeet GODAU, aissi haakkada eqqai? Metuwaa wodiyan aissi neeni geemmai?

² Ba otoruwan iita asi hiyyeesaa shankkatees. Eti bantta pala maqquwan banttau oiqettidosona.

³ He iitai ba wozanaa iita amuwan ceeqettees; yorai GODAA qanggeesinne kaddees.

⁴ Iitai ba otoruwan Xoossaa koyenna; ba qofa ubbankka Xoossaa ainne wudenna.

⁵ Ubbabai au mule wodekka kumees; i otoruwaa meexxees. Ne higgee ayyo gelenna; ba morkketu bollan i qilliiccees.

⁶ Ba wozanan i, “Tana aibinne qaattenna. Tana mulekka metoi gakkenna” yaagidi qoppees.

⁷ A doonan qanggettai, worddoinne manddettai kumiis. Ba inxxarssan genebaanne iitabaa haasayanau eesotees.

⁸ Heeran qosettiyoosan i zuggidi uttees. Ba woriyoogaa woranau qosetti naagiiddi, wolqqi bainna ashkketa xeellees.

⁹ Ba qosettiyoosan geemmidi, hiyyeesa oiqqanau gaammuwaagaadan zuggees. I hiyyeesaa oiqqidi, ba piriyan goochchidi efees.

¹⁰ Yaatin, wolqqi bainna hiyyeesai bikillettees; nippi geesinne he minuwan xoonettees.

¹¹ I ba wozanan, “Xoossai tana dogiichchiis. Ba som77uwaa taappe genttiichchiis; mulekka i be7enna” yaagees.

¹² Abeet GODAU, dendda. Xoossau, ne kushiyaa xoqqu oottada dentta; hiyyeesaa dogoppa.

¹³ Nagaranchcha urai ba wozanan Xoossaa aissi karii? Ba qofankka, “Xoossai tana qaxxayenna” aissi yaagii?

¹⁴ SHin Xoossau, neeni tumukka be7aasa; metuwaakka waayiyaakka xeellaasa. Neeni ubba wode nuna maaddanaassi giiga uttadasa. Aawai bainnaageeta neeni maaddiyo gishshau, hiyyeesai woikko qohettidaagee neeni maaddanaadan bana neeyyo sheedhdho.

¹⁵ Nagaranchchatunne iita asatu wolqqaa neeni wurssa. Wurssada naa77antto eta giddon iitatetti beettennan aggana gakkanaassi eta qaxxaya.

¹⁶ GODAI meri merinau kawotidi de7ees; kawotettati a biittaappe xayana.

¹⁷ Abeet GODAU, neeni banttana ziqqissiyaageetu amuwaa siyaasa. Neeni eta minttettaasa.

¹⁸ Aawi bainnaageetanne un77ettidaageeta morggiyaa oiqqada, asi biittappe merettidaagee, simmi mulekka eta yashissenna mala, eta waasuwaa siyaasa.