Mazamure Maxaafaa 1 - Wolaytta Bible

¹ Iitatu zoriyan beennaagee, woikko nagaranchchatu ogiyan eqqennaagee, qilliicciyaageetu shiiquwan uttennaagee hegee anjjettidaagaa.

² SHin GODAA higgiyan i ufaittees; a higgiyaa gallassinne qammi qoppees.

³ Hegee goggiya haattaa xaphuwan tokettidi, aifiyoo aginan aifiya, ba haittaakka qoqqofenna mittaa mala. I oottiyo ubbai au hanees.

⁴ SHin iitati hegaa mala gidokkona; carkkoi pitti efiyo suullaa mala.

⁵ Hegaa gishshau, iitatu bolli GODAI pirddana; nagaranchchatikka xillotu yaa7an eqqokkona.

⁶ Aissi giikko, GODAI xillotu ogiyaa erees; shin iitatu ogee xayana.