Leemiso Maxaafaa 31 - Wolaytta Bible

Kawoi Limu7eeli Haasayido Haasayaa

¹ Hagaappe kaallidi xaafettida hayyo haasayai, Kawuwaa Limu7eela aayyiyaa Kawuwaa Limu7eela tamaarissidoogaa.

² “Laa ta na7au, ta uluwaappe wodhdhidaagoo, taani shiiqettada yelidoogoo,

³ maccaasan ne wolqqaa wurssoppa; he kawota bashshiya maccaasatun ne akataa xaissoppa.

⁴ “Limu7eelaa, hagee kawotussi bessenna; woiniyaa eessaa uyiyoogee kawotussi bessenna; mattoyiya ushshaa uyiyoogee deriyaa bolli sunttettidaageetussi bessenna.

⁵ Eti uyiyo wode higgiyaa baloosona; balidi naaqettida asaa maataa shenehoo goosona.

⁶ Mattoyiya ushshaa haiqqana haniya uraunne sa7ai iitido urau immite.

⁷ Eti bantta manqqotettaanne bantta tugga de7uwaa dogana mala uyona.

⁸ “Bantta metuwaa odanau danddayennaageetu gishshaa neeni oda; maaddiyaabi bainnaageetu maataa gishshau neeni bidda.

⁹ Biddada etayyo suure pirddaa pirdda; hiyyeesatunne metootanchchatu maataa naaga” yaagada tamaarissaasu.

Wozannaama Machchiyo

¹⁰ Wozannaama machcho ooni demmanau danddayii? Inqquwaa giyo al77o shuchchaappekka a al77ausu.

¹¹ I keettaawai o ubbabankka ammanees; ayyo de7anau bessiyaabaappe aibinne paccenna.

¹² A ba de7o laitta ubban ayyo lo77obaappe attin, iitabaa oottukku.

¹³ Suufiyaanne liinuwaa a koyada, ufaittaidda ba kushiyan oottausu.

¹⁴ A zal77anchchatu markkabetu mala; ba qumaa haaho biittaappe ehausu.

¹⁵ A ba so asaassi qumaa kattanaunne ba macca ashkkaratussi oosuwaa bazzanau, sa7ai biron qamma de7ishin denddausu.

¹⁶ Gadiyaa a koyada shammausu; ba kushiyan oottada demmido miishshan woiniyaa turaa tokkausu.

¹⁷ A gooba oosanchcha gidiyoogaa xalaala gidennan, minonne cincca asa.

¹⁸ A ba woriyaa demmanau minnada zal77ausu; a oottaidda qamissiyo, ba xomppiyaa eesuwan toissukku.

¹⁹ A ba hinddiriitan suqqada, ba afalaa daddausu.

²⁰ A hiyyeesatussinne metootanchchatussi babaappe coo immausu.

²¹ I so asai ubbai ho77iya maayuwaa maayido gishshau, shachchai bukkiyaakko, a hirggukko.

²² Arssaa bollan hiixxiyo maayuwaa sikkausu; liinuwaappe dadettida zo7o maayuwaakka baayyo maayausu.

²³ Dere cimati shiiqiyo dubbushan i keettaawai bonchchettida asa.

²⁴ Liinuwaappe maayuwaanne qabattuwaa ootta oottada, zal77anchchatussi baizzausu.

²⁵ A minonne bonchcho asa; yiya laittatussi a mulekka hirggukku.

²⁶ Aadhdhida eran a haasayausu; ammanttiya zoree i inxxarssaappe kiyees.

²⁷ A ba so asaa de7uwaa injjeyanau ubbaton ooso oottaidda de7ausu; azalla hanoi i bollan beetti erenna.

²⁸ I naati denddi eqqidi, o nashshoosona; i keettaawaikka o galatiiddi,

²⁹ “Lo77obaa oottida daro maccaasati de7oosona; shin neeni eta ubbaappe aadhdhaasa” yaagees.

³⁰ Mera lo77otetti allaalle kessenna; puulikka xayana; shin GODAASSI yayyiya maccaasiyaa, a galatettanau bessausu.

³¹ A oottidobau ubbau iyyo i kushiya zaarite; a oottido oosoi ubbai dabaaban o galatisso.