Leemiso Maxaafaa 24 - Wolaytta Bible

¹ Ta na7au, iita asatu mala gidarkkinaashsha gooppa; etaara dabbotanaukka amottoppa;

² aissi giikko, eti ubbatoo makkalabaa maqettoosona; bantta inxxarssan genebaa haasayoosona.

³ Keettai aadhdhida eratettan keexettees; akeekankka minnees.

⁴ Erai de7ikko, qol77oi al77obaaninne lo77oban ubban kumees.

⁵ Wozannaama urau gita wolqqai de7ees; eranchcha asikka minotettaa gujjees.

⁶ Neeni olau kiyanaappe kasetada halchchuwaa halchchana koshshees; daro zoriyaageetu zoriyan xoonoi beettees.

⁷ Eeyyai aadhdhida eratettaa akeekanau danddayenna; au yaa7ankka odiyoobi aibinne baawa.

⁸ Iitaa oottanau halchchiya urai genanchcha geetettana.

⁹ Eeyyatettaa qofai nagara; asai qilliicciyaagaa ixxees.

¹⁰ Neeni metuwaa gallassi laafikko, ne wolqqai guutta giyoogaa.

¹¹ Haiqqanau bessennan, haiquwau pirddidi efiyoogeeta ashsha; worana haniyo wode co77u gaada xeelloppa.

¹² Neeni, “Nuuni hagaa eribookko” yaagikko, wozanaa eriyaagee i be7ennee? Ne de7uwaa naagiyaagee erennee? Asa ubbau a oosuwaa oosuwaadan zaarennee?

¹³ Ta na7au, eessaa ma; eessai lo77o. Eessaa ililoi manggaagan mal77ees.

¹⁴ Aadhdhida eratettaikka hegaa mala; i ne shemppuwau mal77o gidiyoogaa era. Neeni a demmiyaabaa gidikko, sinttaara yaana kehai neessa; neeni ekkana gaada ufaissan naagiyoobaikka xayenna.

¹⁵ Xilluwaa keettaanne aquwaa bonqqanau qoppiya iita asadan hanoppa.

¹⁶ Xillo asi laapputoo kunddikkokka denddees; shin iitati metuwan xayana.

¹⁷ Ne morkkee kunddiyo wode ufaittoppa; i xubettiyo wodekka, “Hashshu!” gooppa.

¹⁸ Neeni ufaittikko, GODAI hegaa be7idi ufaittenna; a hanqqettiyoogaakka aggiigana.

¹⁹ Iitaa oottiyaageetu gishshau hirggoppa; eta mala gidarkkinaashsha gooppa.

²⁰ Aissi giikko, iita urau sinttaara yaana kehi baawa; iitatu xomppeekka to7ana.

²¹ Ta na7au, GODAAYYOONNE kawuwaayyo yayya; etayyo makkaliyaageetuurakka zuppetoppa.

²² Aissi giikko, hegaa mala asata qoppenna metoi gakkees; kawuwaappenne GODAAPPE yaana metuwaa oonee eriyai?

Hara Aadhdhida Era Haasayata

²³ Aadhdhida eranchchati gujjidikka hagaadan yaagidosona: Pirddiiddi maaddiyoogee lo77o gidenna.

²⁴ Mooranchchaa, “Neeni moorabaakka” yaagiya daannaa asai qanggana; kawotettatikka a ixxana.

²⁵ Mooranchchaa qaxxayiyaageeti keehi nashettananne anjjettana.

²⁶ Suure zaaruwaa zaariyoogee dabbotau malaata mala.

²⁷ Kasetada ne gadiyaa ootta; kattaakka zera; hegaappe guyyiyan, ne keettaa keexxa.

²⁸ Ne shooruwaa bolli gaasoi bainnan markkattoppa; ne doonankka cimmoppa.

²⁹ “I tau oottidoogaadan, taani au oottana; taani au a oosuwaa kushiyaa zaarana” yaagoppa.

³⁰ Taani issi gallassi, issi azallanne akeekai paccido bitaniyaa gaden de7iya woiniyaa turaa giddoora kanttaas.

³¹ Kanttiyo wode, agunttainne sharafai goozi wottiis; yuushuwan de7iya shuchchaa gimbbeekka qolettiichchiis.

³² Taani a be7ido wode, qoppaas; taani be7idoogaappe timirttiyaa tamaaraas.

³³ Neeni guuttaa liphphi ga; guuttaa xiskka; ne kushiyaakka shiishshada guuttaa shemppa ekka.

³⁴ Hegaappe guyyiyan, hiyyeesatettai panggadan yaana; pacaikka ola miishshaa oiqqida asadan puttu gaana.