Leemiso Maxaafaa 2 - Wolaytta Bible

Aadhdhida Eratettaappe Beettiya Anjjuwaa

¹ Ta na7au, neeni ta giyoogaa ekka; ta azazuwaakka ne giddon minjja.

² Aadhdhida eratettaa ezgga; ne wozanaappe akeeka.

³ Eratettaa xeesa; akeekaassikka xoqqu oottada alaaha.

⁴ Asi biraa woikko qosido miishshaa koyiyoogaadan, neeni eratettaa koya.

⁵ He wode neeni GODAASSI yayyiyoogaa giyoogee aibakko akeekana; Xoossaakka loittada erana.

⁶ Aissi giikko, GODAI aadhdhida eratettaa immees; appe eratettainne akeekoi beettees.

⁷ I suuretussi maaddiya zoriyaa minjjees; boree bainnan hemettiyaageetassikka i gonddalle.

⁸ Tumaa pirddiyaageetu ogiyaa naagees; ba ammanettiyaageetu ogiyaakka naagees.

⁹ He wode neeni xillotettaa, suure pirddaa, suuretettaanne lo77o ooso ubbaa erana.

¹⁰ Aissi giikko, neeni aadhdhida eranchcha gidana; ne eratettaikka nena ufaissana.

¹¹ Nena adussi qoppiyoogee naagana; akeekaikka nena saro ashshana.

¹² Aadhdhida eratettai nena iita asatu balaappe naagana; geellabaa haasayiyaageetuppekka ashshana.

¹³ Eti nagaraa xuman de7anau, xillotettaa ogiyaa aggoosona.

¹⁴ Iitaa oottiyoogan ufaittoosona; geellaban hashshu goosona.

¹⁵ Eti oottiyoogee mirqqetta; eta de7oikka geella.

¹⁶ Aadhdhida eratettai shaaramuxa maccaaseeppenne sheleeshshiya qaalan haasayiya laggetteeppe nena ashshana.

¹⁷ A ba naatettaa azinaa aggaagausu; ba Xoossaa sinttan maacettido maachchaakka dogausu.

¹⁸ I soo biyoogee haiqqanau biyoogaa; ikko biyoogee haiqqida asai biidosaa kaalettees.

¹⁹ Ikko biya oonikka guyye simmenna; de7uwaa ogiyaakka demmenna.

²⁰ Hegaa aggada, neeni lo77o asatu leemisuwaa kaalla; xillo asatu de7uwaakka qulla.

²¹ Aissi giikko, suure asatinne boree bainna asati biittan gam77idi de7ana.

²² SHin iitati biittaappe xoqollettana; ammanttennaageetikka shodettidi xayana.