Leemiso Maxaafaa 12 - Wolaytta Bible

¹ Seeriyoogaa dosiya uri eratettaa dosees; shin seeraa ixxiya uri damma.

² Lo77o asi GODAAPPE sabaa demmees; shin GODAI genanchchata pirddees.

³ Asa iitatettai minttidi essenna; shin xillotu xaphoi qaaxxenna.

⁴ Wozannaama maccaasiyaa ba keettaawau kallachcha mala; shin ba keettaawaa kaushshiya maccaasiyaa a meqettaa miya ajaajje mala.

⁵ Xillotu qofai suure; shin iitatu zoree cimo.

⁶ Iitatu haasayai asa woranaassa; shin xillotu haasayai eta ashshees.

⁷ Iita asati kunddana; etau zerettikka attenna; shin xillotu zerettai minnidi de7ana.

⁸ Asi ba aadhdhida eratettaa keenaa galatettees; shin geella qofai de7iyo asi karettees.

⁹ Dure asa milatidi, metuwan de7iya asaappe coo asa milatidi, oottiiddi ba de7uwaa sugiya asi keha.

¹⁰ Xillo asi ba mehiyaassi qarettees; shin iita asa kehatettau meqetti baawa.

¹¹ Ba biittaa mintti oottiya urai kattaa kallees; shin pattennabaa yedettiya uri akeekai paccidoogaa.

¹² Iitati nagaranchcha asatu omooduwaa ekkanau amottoosona; shin xillotu xaphoi daayidi de7ana.

¹³ Iita asa a doonaappe kiyida haasayai pire gididi oiqqees; shin xilloi metuwaappe kessi ekkees.

¹⁴ Asi ba doonaappe kiyiya qaalan lo77obaa kallees; ba oottido oosuwaa waagaakka ekkees.

¹⁵ Eeyya asi biyo buussai au a huuphen likke milatees; shin aadhdhida eranchcha asi zoriyaa siyees.

¹⁶ Eeyya uraa hanqqoi sohuwaara erettees; shin cincca asi cashshaa wudenna.

¹⁷ Tumaa haasayiya asi suurebaa yootees; shin worddo markkai wordduwaa yootees.

¹⁸ Akeekennan haasayiyo haasayai cuphedan caddees; shin aadhdhida eranchchaa inxxarssai pattees.

¹⁹ Worddo haasayi guutta wodiyaassa; shin tuma haasayi merinau de7ana.

²⁰ Iitaa qoppiyaageetu wozanan genee de7ees; shin sarobaa zorettiyaageetu wozanan ufaissai kumees.

²¹ Xillota metoi gakkenna; shin iitatussi metoppe attin, harabi de7enna.

²² GODAI worddanchchata ixxees; shin tumanchcha asatun i ufaittees.

²³ Cincca asi ba eraa qottees; shin eeyyati bantta eeyyatettaa yootoosona.

²⁴ Minnidi oottiya uri deriyaa haarees; shin azallai haarettees.

²⁵ Hirggiyoogee asa ufaissaa diggees; shin shonggaara de7iya haasayai a ufaissees.

²⁶ Xillo asi ba shooruwaa zoridi, suure ogiyaa kaalettees; shin iitatu ogee tumaappe haassees.

²⁷ Azalla asi shankkatidi ehiido ashuwaa kattenna; shin asau aqoi minnidi oottiyoogaa.

²⁸ Xillotettaa ogiyan de7oi de7ees; he ogiyan haiqoi baawa.