Leemiso Maxaafaa 10 - Wolaytta Bible

Solomona Leemisota

¹ Hageeti Solomona leemisota. Aadhdhida eranchcha na7ai ba aawaa ufaissees; shin eeyya na7ai ba aayyiyo azzanissees.

² Nagaran demmido miishshai go77enna; shin xillotettai haiquwaappe ashshees.

³ GODAI xillota namisissenna; shin nagaranchchatu amuwaa polissenna.

⁴ Azallatettai hiyyeesissees; shin minnidi oottiyoogee dureyees.

⁵ Aadhdhida eranchcha urai kattaa boniyan shiishshees; shin kattaa cakkiyo wode xiskkiya urai kauyyees.

⁶ Xillo asai anjjettees; shin nagaranchchaa doonai makkalaa genttees.

⁷ Xilluwaa sunttai anjjuwan xeesettiiddi, de7i aggees; shin nagaranchchatu sunttai sohuwaara dogettees.

⁸ Aadhdhida eranchchati azazidobaa oottoosona; shin eeyyatettan coo biddiyaageeti bashshau boosona.

⁹ Suure asi saro de7ees; shin geella urai ba mooruwan ohettees.

¹⁰ Geniiddi qim77otiya uri meto kessees; shin yayyennan seeriya uri sarotettaa medhdhees.

¹¹ Xilluwaa haasayai de7uwaa pultto; shin nagaranchchaa haasayai makkalaa genttees.

¹² Ixoi palamaa denttettees; shin siiqoi mooruwaa ubbaa qoodenna.

¹³ Wozannaama asai aadhdhida eran haasayees; shin eeyya urai xam77an shocettees.

¹⁴ Aadhdhida eranchchati eraa dagayoosona; shin eeyya haasayaa haasayiya urai bana bashshees.

¹⁵ Duriyaa miishshai direttida katamaadan, ba godaa naagees; shin hiyyeesatettai hiyyeesaa xaissees.

¹⁶ Xillo uraa a lo77o oosoi de7uwau kaalettees; shin iita uraa wurssettai qixaate.

¹⁷ Seerin eeniya urai de7uwaa ogiyan hemettees; shin seerin ixxiya urai balees.

¹⁸ Ixxiiddi ba ixxiyoogaa erissenna urai worddanchcha; zigirssaa laaliya uraikka eeyya.

¹⁹ Daro haasayaa giddon nagari xayenna; shin ba doonaa shiishshi ekkiya uri aadhdhida eranchcha.

²⁰ Xilluwaa inxxarssai tigettida geeshsha biraa mala; shin iita uraa qofau gatee guutta.

²¹ Xillo uraa haasayai daro asaa go77ees; shin eeyyati bantta wozanaa pacan haiqqoosona.

²² GODAA anjjoi dure kessees; i he duretettan meto walakkenna.

²³ Eeyya urau iitabaa oottiyoogee kaassa mala; shin wozannaama urai aadhdhida eratettan ufaittees.

²⁴ Iita urai hirggidobai a bolli gakkana; shin xilloi amottidobai imettana.

²⁵ Gotee denddidi aadhdhiichchiyo wode, nagaranchchati beettokkona; shin xilloti merinau minnidi de7ana.

²⁶ Caalai achchaa zil77issiyoogaadaaninne cuwai aifiyaa poogiyoogaadan, azalla uraa kiittiyoogee yiilloyees.

²⁷ GODAASSI yayyiyoogee bariyaa adussees; shin nagaranchcha uraa baree qaammees.

²⁸ Xillo urai sinttaara ufaissai yaana giidi naagees; shin iita urai sinttaara yaana giidi naagiyoobi aibinne baawa.

²⁹ GODAA ogee xillotussi baqati attiyo soho; shin iitaa oottiyaageetassi bashsha.

³⁰ Xilloti mulekka xoqolettokkona; shin iitati biittaa bolli de7okkona.

³¹ Xillo asai aadhdhida eratettaa haasayees; shin geellabaa haasayiya inxxarssai qanxxettana.

³² Xillo asai bessiya haasayaa erees; shin iita asai geellaa haasayees.