Iyyooba Maxaafaa 35 - Wolaytta Bible

Qassikka Eelihu Haasayees

¹ Eelihu qassikka hagaadan yaagiis;

² “Iyyoobaa, neeni, 'Taani Xoossaa sinttan xillo' giyoogee likkee?

³ Qassi, 'Taani nagaraa oottikko, nena ai qohiyaanaa? Nagaraa oottennan aggikko, taani go7ettiyoobi aibee?' yaagada neeni Xoossaa oichchadasa.

⁴ Taani neeyyoonne nenaara de7iya ne laggetuyyo zaaruwaa haasayana.

⁵ “Xoqqu gaada salota xeella; neeppe bollaara de7iya shaaratakka ane akeekada be7a.

⁶ Neeni nagaraa oottikko, hegee Xoossaa ainne qohenna. Ne mooroi darikkokka, neeni Xoossaa ainne oottakka.

⁷ Xillo gidikko, ayyo neeni ai immuutee? Woikko ne kushiyaappe i ai ekkanee?

⁸ Neeni nagaraa oottikko, ne mala asaa qohaasa; qassi xillikkokka, asaa go77aasa.

⁹ “Huqqunnai darobare asai waassees; wolqqaamatu kushiyaappe kessi ekkanau alluwaa xeegees.

^10-11 SHin ooninne, 'Xoossai, tana Medhdhidaagee, qamman mazamuriyaa immidaagee, sa7aa do7atuppe aattidi, nuna tamaarissiyaageenne saluwaa kafotuppe aadhdhida eranchcha nuna oottiyaagee awan de7ii?' yaagenna.

¹² Iita asati waassoosona; shin Xoossai eta otoruwaa gaasuwan, etau allenna.

¹³ Hada waasuwaa Xoossai tumuppe siyenna; Ubbaa Danddayiya Xoossai hegaa ezggenna.

¹⁴ “Iyyoobaa, neeni, 'Taani Xoossaa be7anau danddayikke; ta mootoi a sinttan de7ees; taani a naagais' yaagaasa. Yaatin, neeyyo i zaaruwaa immanau, ne gaasoi ai keena guuxxanddeeshsha!

¹⁵ Xoossai asaa qaxxayennabaanne nagaraakka shenehoo giidi aggiigiyaabaa gaada qoppai?

¹⁶ Hegaa gidikko, neeni ne doonaa coo mela dooyaasa; dooyadakka eri bainna haasayaa darissaasa” yaagiis.