Iyyooba Maxaafaa 26 - Wolaytta Bible

Iyyoobi Gidduwaara Kilppayees

¹ Yaagin Iyyoobi hagaadan yaagidi zaariis;

² “Wolqqi bainna asa neeni aiba maado maaddadii! Daafurida qeeseta neeni aiba ashetta ashshadii!

³ Aadhdhida eratettai bainnaagaa aiba zore zoradii! Ai keena gita eratettaa qonccissadii!

⁴ Neeni ha qaalaa haasayanaadan nena oonee maaddidai? Qassi hagaadan haasayanau nena denttettidaagee o ayyaanee?” yaagiis.

Bilddaadi Ba Haasayaa Wurssees

⁵ Yaagin Bilddaadi, “Haiqqidaageetu moitilleti biittaappe garssa baggaara haattaa giddon kokkoroosona.

⁶ Xoossaa sinttan Si7ooleekka qoncce; aibinne a genttanau danddayenna.

⁷ Xoossai huuphessa bagga salota micciis; sa7aakka aibakko bainnasan kaqqiis.

⁸ I shaaratun haattaa kunttees; kunttin haattaa deexuwan shaarati daakettokkona.

⁹ Goobanida aginaa i ba shaaran kammees.

¹⁰ Poo7uwaa xumaappe shaakkanau, saloi sa7aara danttettiyoosan qammainne gallassai laamettiyo zawaa Xoossai essees.

¹¹ I seeriyo wode, salotu tuuqeti dagamau kokkoroosona.

¹² Ba wolqqan abbaa co77u oottiis; ba akeekan Ra7aaba giyo miimminttiyaa xaissiis.

¹³ I shemppiyo shemppuwan saloti geeyidosona; a kusheekka xonggettiya shooshshaa woriis.

¹⁴ Hageeti ubbai Xoossai oottido oosotuppe amaridaageeta; nuuni siyoogee saasuketta xalaala. Yaatin, a wolqqaa gitatettaa akeekanau danddayiyai oonee?” yaagiis.