Iyyooba Maxaafaa 18 - Wolaytta Bible

Bilddaadi Naa77antto Haasayido Haasayaa

¹ Hegaappe guyyiyan, SHuuha biittaappe yiida Bilddaadi hagaadan yaagidi zaariis;

² “Iyyoobaa, neeni ha haasayaa aude wurssuutee? Ane akeeka. Yaatobare nuuni haasayana.

³ Nuna aissi miizza kessai? Aissi nuna damma kessai?

⁴ Neeni ne hanqquwan nena qohaasa. Ne hanqquwan biittai baisa gidanee? Woikko zaallati bantta sohuwaappe xoqolettanee?

⁵ “Nagaranchchatu de7oi xomppee to7iyoogaadan to7anaagee geeshsha; i naa77antto mulekka eexxenna.

⁶ I xomppee bainna keetta mala; kase a matan de7iya xomppeekka to7ees.

⁷ I tanggiyo tanggoikka qaammees; i haraata zoriyo zoree a onggees.

⁸ “A hemetai a efiidi, piriyan gelissees; diizzaa giddon i hemettees.

⁹ Piree a ginddiyaa oiqqees; oiqqidi a qaatuwaa diggees.

¹⁰ Ayyo yurddo wodoroi geeman sa7an hiixetti uttees; i hemettiyo ogiyankka gitee wodhdhi uttees.

¹¹ “Dagamai a dooddees; dagamai a guyyeera ginddiyaa matidi yedettees.

¹² A wolqqai namisan daafuriis; bashshai a lanqqen naagees.

¹³ Woriya harggee a bollan ubban woraajjees; a kushiyaanne a tohuwaa duushissees.

¹⁴ I hirggi bainnan de7iyo ba keettaappe yedetettees; eti Haiquwaa giyo kawuwaakko, a efoosona.

¹⁵ Harggiyaa gooddanau dinniyaa laaloogaappe guyyiyan, ooninne a keettan de7ena.

¹⁶ I xaphoi garssaara meliyoonne tashetikka bollaara qoqqofettiyo mittaa mala gidees.

¹⁷ A woree biittaappe xayees; a sunttaikka sa7an hassayettennan attees.

¹⁸ I poo7uwaappe xumau yedetettana; asai de7iyo biittaappekka i xayana.

¹⁹ Ayyo na7i woikko zaree xayana; i de7ido sohuwan issi asinne paxa attenna.

²⁰ Arggo bagga asai a gakkidaban dagammees; arshsho bagga asaikka yashshau kokkorees.

²¹ Audekka iita asatu wurssettai hegaa mala; Xoossaa erennaageetu qaadaikka hegaa mala” yaagiis.