Iyyooba Maxaafaa 17 - Wolaytta Bible

Qassikka Iyyoobi Haasayees

¹ “Ta shemppiyaa kiyausu; ta laittai qaammiis; taayyo duufoi giigi uttiis.

² Tana qilliicciyaageeti tumuppe ta yuushuwan de7oosona; eti taayyo yiillotiyo yiilluwaa ubbaton taani be7ais.

³ “Abeet Xoossau, neeppe hari tana maaddiyaabi bainna gishshau, neeni ne huuphiyan taayyo waase gida.

⁴ Etau gelennaadan, neeni ta laggetu wozanaa dammettadasa. Hegaa gishshau, neeni etau xoonuwaa immoppa.

⁵ Miishshaa demmana giidi, ba laggeta aatti immiya asaa nagarai a naata kaa7ana.

⁶ “Xoossai tana asa ubbau qilliicciyoobaa kessiis; asi som77uwan cuchchiyo asa taani gidaas.

⁷ Taani daro kayyottido gishshau, ta aifeekka galjjiis; ta kushetinne ta tohoti laafidi, xinqqo keesa kiyidosona.

⁸ Keha asati tana be7idi dagammidosona; suuretikka Xoossaa kaddiyaageetu bolli yiillotidosona.

⁹ Gidikkonne, xilloti bantta ogiyaappe yaakka haakka simmokkona; suureti wolqqaa gujji gujji boosona.

¹⁰ SHin ha77i ubbaikka ane taakko haa yiite! Yiyaakkokka, taani intte giddon issi aadhdhida eranchcha asakka demmikke.

¹¹ “Ta de7o laittai wuriis; ta halchchido halchchoikka ta wozanaa amoikka coo attiis.

¹² Ta laggeti qammaa gallassa goosona; xumi uttidaashin, 'Poo7ana hanees' yaagoosona.

¹³ Taani ufaissan naagiyo ta keettai duufuwaa; ta hiixaakka yan xuman hiixxana.

¹⁴ Duufuwaa taani, 'Neeni ta aawaa' yaagana; guxuniyaakka, 'Neeni ta aayyiyo' woikko 'Ta michchiyo' yaagana.

¹⁵ Yaatin, ta hidootai awaanee? Ooni a be7idee?

¹⁶ Ta hidootai tanaara duufuwaa banddee? Nuuni naa77ai issippe biittan duge wodhdhaneeshsha?” yaagiis.