Isiyaasa 12 - Wolaytta Bible

Galataa Yettaa

¹ He wode intte hagaadan yaagana; “Abeet GODAU, neeni tana hanqqettadasa; hanqquwaappekka simmadasa; yaatada tana minttettadasa. Hegaa gishshau, taani nena galatais.

² “Be7ite, Xoossai ta atotettaa; taani an ammanettada, yayyikke. Aissi giikko, GODAI Xoossai taayyo wolqqanne yetta. I ta atotettaa gidiis” yaagana.

³ Ashshiya pulttotuppe haattaa intte ufaissan duuqqana.

⁴ He gallassi qassi intte hagaadan yaagana; “GODAA galatite! A sunttaakka xeesite. A oosota kawotettatu ubbaa giddon erissite. A sunttai xoqqu xoqqu giidoogaa awaajjite.

⁵ GODAI gita oosuwaa oottido gishshau, ayyo yexxite. Hagee sa7a ubban eretto.

⁶ Israa7eela Geeshshai intte giddon xoqqu xoqqu giido gishshau, inttenoo, Xiyoonen de7iyaageetoo, hombbocite! Ufaissau yexxite!” yaagana.