Posuwunya 1 - Tuntu i mPue ri Basa Taa

Sarita Tempo Tau Israel Rapowatua La’u Tana Mesir

¹ Wali tempo owi i Yakub, to rato’oka seja i Israel, ia yau maroo ri tana Mesir. Tempo ia yau etu, ngananya yau seja mangalulu ia. Pasi ngananya etu mangkeni seja indo nu ana nsira pasi ngana nsira samba'a pei samba'a.

² Wali sanga nu ngana i Israel anu rata ri Mesir tempo owi etu, etu semo i Ruben, i Simeon, i Lewi, i Yehuda,

³ i Isakhar, i Sebulon, i Benyamin,

⁴ i Dan, i Naptali, i Gad, pasi i Asyer.

⁵ Ane ana i Yakub, etu semo i Yusup, ia re’e seja la’u tana Mesir, apa ia re’e yami la’u ria. Wali kasamparianya wiyaa i Yakub etu pitu mpuyu mba'a kaborosinya.

⁶ Wali yako etu i Yusup pasi pua’inya samparia namate yaumo. Pasi samparia tau to tuwu tempo sira etu paka namate yaumo seja.

⁷ Pei wiyaa nsira, etu semo wiyaa i Israel, sira malagi kojo ngananya. Pasi kanjo’u-njo’u tiduga-dugang kaborosinya pasi karosonya, see naka juku tana Mesir re’e wiyaa i Israel nja’u ria.

⁸ Wali yako etu, malagi nto’uwa panewa re’e makole to bou to mula maporenta ri tana Mesir. Tau etu taa mangansani mangkonong palaong to naika i Yusup mangansawang to Mesir tempo seore.

⁹ Wali see naka i Makole etu moru rayanya apa boros kojomo to Israel see naka ia manganto'oka joanya, to’onya, “Taa matao apa tau Israel etu boros kojomo pasi sira semo to roso-roso pei kita.

¹⁰ Wali ane bara re'e balinta to ma’i mangamusung kita, tau Israel etu bara damangansawang sira mangamusung kita, panewa roo see sira damiyai yau yako ri tana si'i pei tamo damangika palaong ngkita. Wali to tao-tao kita mangaliwu jaya see sira tamo datiduga-dugang kaborosinya.”

¹¹ Wali i Makole pasi joanya etu mangokotaka bara sawei mba'a to Mesir. Tau etu rawaika kuasa damampakasaaka to Israel mangika palaong to mabeu kojo apa sira rani mampakasusa katuwu ntau Israel. Wali tau Israel rapakasaaka mangikaka i Makole dua kota darapake mangkalisoka ngaya-ngayanya. Kota dua etu sanganya samba'a Pitom pasi samba'a rato’oka Raamses.

¹² Wali kanjo'u-njo'u kapari-pari naika nto Mesir mangansesai tau Israel. Pei nempo ewa see, tau Israel etu ojo tiduga-dugang wo’u kaborosinya sampe juku ri tana Mesir kare’e nsira. Wali see naka to Mesir mawali meka resi tau Israel etu.

^13-14 See naka sira mampakasusa wo’u katuwu ntau Israel. Mapari kojo naika nsira mampakasaaka to Israel mangika palaong to mabeu kojo. Palaong etu, etu semo mangika dua kota, pasi mpangaya-ngaya seja palaong to ri nawu. Wali mandasai kojo naepe ntau Israel mangika palaong to etu pei to Mesir taa kojo mamporayang sira.

¹⁵ Wali tempo etu re’e dua mba’a to we’a to palaonginya mampapoana tau we'a to yunu nsira to Ibrani. Sanga ntau we'a etu i Sipra sira dua i Pua. Wali re’e seore i Makole mampokio tau dua etu panewa ojo karata nsira resi ia, ia mamporentangika sira dua,

¹⁶ ia manganto'o, “Tempo komi dua mampapoana yunu ngkomi to Ibrani etu, lo'aka kojo tempo ana etu rapoanaka. Ane ana etu to langkai, popate yau ia pei ane ana etu to we'a, biaka ia tuwu.” Etu semo porenta i Makole resi tau dua etu.

¹⁷ Pei tau dua to mampapoana to we’a nto Israel, sira paka tau to manga’angga kojo i Pue Allah. See naka sira taa mangika ewa to naporentangika i Makole sira dua, pei sira mangabiaka ngana langkai etu tuwu.

¹⁸ See naka i Makole mampokio wo'u tau we'a etu pei mampotanaka resi sira, to'onya, "Maka pei komi ojo mangabiaka ngana langkai etu tuwu?"

¹⁹ Wali tau we'a etu mangansono, "Ane tau we'a nto Ibrani, sira taa sewaju pei tau we'a nto Mesir apa sira maroso moana. Wali tempo kami tawa rata sira re'emo ananya." Ewa wetu naika nsira dua mangansono i Makole.

^20-21 Wali apa saba tau we'a etu manga’angga i Pue Allah, see naka i Pue Allah mampakasanang katuwu nsira pasi mangawaika sira seja riana. Pasi to Israel tidugang wo'u kaborosinya pasi tidugang seja karosonya.

²² Wali yako etu i Makole mangika wo’u songka damampopate yau ngana ntau Israel to langkai. Ia mamporentangika samparia joanya, ia manganto'o, "Samparia ana langkai to Ibrani to owo rapoanaka taa maya taa danutaji yau ngkomi lo'u koro Nil. Pei ngananya to we'a biakamo sira tuwu."