Lukah 1 - Wanukaka

Ta kawungana

¹ Teopiluh napapa-akang, Na ɗangu natou nama kabu atingu patuliya ngaladukana nahawoluna hi Yehu namaʄaʄi ta paɗuada.

² Toungu napapatomaɗa lahi iata, nama walingu ta tou ɗama ita wainya mata ta kawungana namaʄaʄi, ʄaka ta kamurina ɗuɗa ɗapatomanya na Lii Kalung.

³ Ta ɗalu aku pangaɗanya ʄaka aku kahiraya namaʄaʄi waling ta kawungana ʄiaya hiku ɓotahuya aku paʄuru pamapitunya ta hurat lahi ama.

⁴ Kam peanya ngaladukana napapeaka-panungang amapaɗeninguya.

Napeakaya nalara ʄaʄina hi Yohanih Pembaptih

⁵ Ta ɗalu pareahana na raja Herodeh ta loaɗa Yudea, einya na imam nama ngarang Hakaria nama walingu ta kaɓuangu imam Abia. Na ngara arweina hi Elihabet wallananya hi imam Harun. Hi Harun angwuana hi Muha.

⁶ Na morikuɗa aɗa pla-araweingu mapaɗeninguha ta hagana hi Moiri Alla. Ɗa keri wali atiha ɗa lii-pareahana hi Moiri da eimang paheliɗa.

⁷ Hida eingu anaɗa, kaɗang hi Elihabet nawotu ʄaka ɗuɗa langa lopahu kaweaɗaɗak.

⁸ Einya nama hangina na laɗɗu‚ kaɓuangu Abia aɗa wolu taguɗa‚ kenananyaka hi imam Hakaria ana pahalakuya na tagu imamuna ta hagana hi Moiri.

⁹ Napalanga dammaɗa ɗa pedi letuha waing lot, agearaya nama tama ta ɓei Umma Pingi Pahabayangu tou Yahudi. Ɗunnaka nama kena pedi hi imam Hakaria ʄaka natama ta ɓei Umma Pingi Pahabayangu tou Yahudi hina tunu mawou momar.

¹⁰ Atanga tunu nama wou momaru, ɗa tou ɗangu ta haɓalihiɗ ɗa habayang.

¹¹ Aminyaka na malaikat ana patekangu wikina lahi imam Hakaria, nadedi ta karaha lawanana ta padoung pingi patunu mawou momar.

¹² Ana itayaka, nakapoduk ʄaka namangeꞌat.

¹³ Jiaɗinguka winanya na malaikat, “Abi mangeꞌatɗing‚ imam Hakaria! Hi Alla Ama, na ranggunyaka na habayangumu. Baar na araweimu hi Elihabet napa anang lakeaɗa moani, mu pangaranyaha, Yohanih.

¹⁴ Ou enga egi atim ʄaka naɗangu ɗa tou nama egi ati ɗengagu anaʄaʄi na anam baaru!

¹⁵ Jaka naʄaʄi tou ɓakul hawaina hi Moiri, da enga inungman wei mawuk, waling ta kabu inan nabinunya Hangahu Harri-Na hi Alla.

¹⁶ Naɗangu natou Ihrael napa opa ɓalina ta hagana hi Alla, Moiriɗa.

¹⁷ Naʄaʄi tou papata pedi lihu nyoangana hi Moiri, nakullihu ʄaka namadungu mearana hi nabi Elia. Na pamoiliha ɗama pa amang pa anang. Na opaha ɗa tou dama manudu lahi Moiri kaɗa manudu ɓali. Jaka ɗapangaɗanguɗa dama paɗening napatidi ɓaliɗaja ta pangaɗang nama manyakat. Jiayaka hina hadiaya ɗa tou ɗama tutu-tidi lahi Moiri.”

¹⁸ Napatuturunya imam Hakaria ta malaikat, “Gikinoukanaka hiku peanya nama enga ʄaʄina? Nyouwa ku kaweaɗaka, ʄaka na araweigu na kaweaɗa ʄellaka.”

¹⁹ Na malaikat nagapiya, “Ya nyouwa hi Gabrialuwa, papaleawana hi Alla waling ta hurga. Ɗunna ʄella nama paleawawa patomanya na lii kalung lahi ou.

²⁰ Jaka nahawigungu ya, enga ʄaʄina. Jiaɗinguka damu waigaka, ou peala mu kabangngaɗing, lapakung anaʄaʄi nahawigung.”

²¹ Ɗa tou ɗama naɗinya hi Hakaria, ɗa hangotar ɗenganya gahi duku madeiya ana engang ta rongu ɓei Umma Pingi Pahabayangu tou Yahudi awiɗ.

²² Ana tomaka palouhungu dana hilu panewi ɗenga majaha. Kabangngananyak waingu kawabakung ʄuananyaka. Wali nounak hiɗa peanya a eingu ha itana ta rongu ɓei Umma Pingi Pahabayangu tou Yahudi.

²³ Ana dukaka na rahi keranguna ta ɓei Umma pingi pahabayangu tou Yahudi, ɓalinanyaka hi imam Hakaria ta ummana.

²⁴ Dana madeimah, hi Elihabet na arweina ɗungananyaka, ʄaka lima wulana atidi engana ta umma.

²⁵ Hi wina, “Natulu-gatagaka hi Moiri ʄaka napoahiganyaka na makiigu.”

Napeakaya nalara ʄaʄina hi Yehu

^26-27 Ta ɗalu nammu wulana hi Elihabet waling ana ɗunganya, hi Alla napaleawaya hi Gabrial napapaleawana nama waling ta hurga, ta ana karaa nama ngarangu Maria ta koata Naharet ta loaɗa Galilea. Hi Maria tagu arweinanya hi Yuhup. Hi Yuhup wallananya hi raja Daut.

²⁸ Natamaka hi Gabriel ta ummana hi Maria winanya, “Mori umma, ou ano napawoangu wei maringu, hi Moiri nahaɗiɗi pangalawu!”

²⁹ Ana rangunanyaka na panewina, kapoduk idinanyaka hi Maria. Napatuturungu ta atina, gana ikanyaka nahawinang.

³⁰ Na papaleawana hi Alla nou wina ɓali ʄellapah, “Abi mangeꞌatuɗing Maria, ou matutu-tidiwu ta hagana hi Alla.

³¹ Mupakabu lapakungu mupa ananya nalakeaɗa moani, mupangaranya Yehu.

³² Baaru naʄaʄi tou ɓakul, Ana Alla nama Reihi ʄaga. Lapakungu naʄaʄi ʄella raja toungu na ɓokuna hi raja Daut.

³³ Jiaya nama pareaha ɓoluya na wallana hi Yakub lapakungu piangu-piang, naparehana dama wolu ɗirana.”

³⁴ Nagapiya hi Maria, “Gikinoukan na pawimung anaʄaʄi? Ya nyouga daɗi eikaɗingu laagu.”

³⁵ Wina hi Gabriel, “Na Hangahu Harri napurung lahi ou, ʄaka na kuaha-Na hi Alla nama Reihi Jaga napa eina-hamawugu. Jiayaka baaru na lakeaɗa napapaʄaʄimu maharriya Ana Alla wiɗanya.

³⁶ Kam peanya: hi Elihabet na angu mahawam nammu wulla wainaka ana pakabu, nama langkaweaɗa dana hilu pa anamah nahawiɗang.

³⁷ Ta hagana hi Moiri da eimang dama mapiakung.”

³⁸ Manga nagapiya hi Maria, “Ya nyouwa, atanaga hi Moiri. Kana ʄaʄikaya nahatikimu lahi nyouwa.” Balinanyaka napapaleawana hi Alla nou, ɗujaknanyaka hi Maria.

Hi Maria ʄaka hi Elihabet

³⁹ Manga dana hilu maɗeimah, hi Maria halakunanyaka ta mahangina na paraingu nama eingu ta pinu paledi ta loaɗa Yudea.

⁴⁰ Tomaka ta padoung nou, na tama ta ummana hi imam Hakariah, ngiki ɗengananyaka hi Elihabet.

⁴¹ Narangukiyaka na liina hi Maria, kagudiknanyaka na anan hi Elihabet nama eingu ta kabuna. Hi Elihabet binunanyaka Hangahu Harri,

⁴² hina kawulangu, “Maria, mumarii-rikakingu ta joanga mawinni ngaladukaɗa ta pinu-tana! Namarii-rikakingu na ana papaʄaʄimu!

⁴³ Geara ikawaka nyouwa, na inana hi Moiri hina mai patomaga?

⁴⁴ Aku ranguya napangiki ɗengangumu, na anag ta kabugu nakagudik ana egi ati.

⁴⁵ Mumarii-malalangu, kaɗang muwainya nahawinagu hi Moiri enga ʄiaya namaʄaʄi!”

Gokugeila reaɗurawana hi Maria

⁴⁶ Manga wina hi Maria, “Kuʄaʄi wuatu horu-hailanya hi Moiri.

⁴⁷ Na egi na atigu kaɗang hi Moiri Alla nama pamanumarawa.

⁴⁸ Na namuwa mamilla! Waling ya lapakung ta ana muri-ana muri ta haguꞌul pinu-tana hiwiɗaga napapamarii-malalang.

⁴⁹ Kaɗang hi Alla nama harri napatekanya nahawolu-Na nama ɓakul lahi nyouwa. Maharriya nangara-Na.

⁵⁰ Napa awi-panamunguna hi Moiri lapakung ta ana muri-ana muri ta tou nama kahoru-karaɗa ta haga-Na.

⁵¹ Waingu kuaha-Na napatekanya nahawolun nama ɓakul napa iha-ihanya natou nama kataɗak ʄaka nanyagarnanya napakabu atin.

⁵² Na hapuruja ɗa raja walingu ta padou ngoɗu rajaɗ, ʄaka na paʄagaya natou nama milla.

⁵³ Hi Alla nawoaja ngaladukaɗa nama kalung ta tou milla ʄenang abi ɗahilu karobang, hina wurutuja ɗa tou poati hiɗa ɓali kalua.

^54-55 Natulunya na Ihrael na atan kaɗang na namuya gananya napapatura-paʄaʄi-Na lahi Abraham, ta apu-ɓokuda. Napalanga ɓotahuna ana patekanya napa awi-panamunguna lahi Abraham ʄaka ta walla-wuana piangu-piang.”

⁵⁶ Akatutukayaka tillu wulana hi Maria ana engangu ta padouna hi Elihabet. Manga hina ɓali ta ummana.

Naʄaʄina hi Yohanih Pembaptih

⁵⁷ Tomananyaka na rahi pa anana hi Elihabet. Napa ananya na lakeaɗa moani.

⁵⁸ Ɗa lihi-ummana ʄaka ɗa oaliʄaʄina ɗaranguya na deaha atina hi Moiri lahi Elihabet, ʄaka ɗa egi ati ɗenganya.

⁵⁹ Ana tomaka walu laɗɗu na anarara, ɗuɗa amija aɗa keriya na hunatuna na anarara, keriya na pata tou Yahudi. Ɗuɗa ɗakabu ating kapangaranya Hakariah wiɗa, keriya nangara amana.

⁶⁰ Jiaɗinguka wina na inan, “Daꞌah! Pangaranyaha Yohanih.”

⁶¹ Wiɗanya, “Da eimangu ta oaliʄaʄim nama ngarang Yohanih.”

⁶² Ɗa wainya kawabak, aɗa tuturuya hi imam Hakariah. Geara wimukanyaka amu pangaranya na anamu.

⁶³ Hi imam Hakariah nakarei wat tuil manga natuliya, “Na ngarana, hi Yohanih.” Duɗa ɗakaɓarra ɗenga bollunya.

⁶⁴ Ta rahi nou ʄella hi imam Hakariah napanewi ɓali manga hina wuatu haliya hi Moiri.

⁶⁵ Ɗa lihi-ummaɗ ɗakaɓarra ɗenganya, ʄaka naɗangu natou nama lolukuya namaʄaʄi nou, hina majoꞌarung toma ta haguꞌul letin loaɗa Yudea.

⁶⁶ Ngaladukana nama rangu napatutur ta ati ɗaluna, “Ga paʄaʄi ikanaka baaru na lakeaɗa?” Kaɗang hi Moiri nama haɗiɗiya.

Hi Hakariah nawuatu haliya hi Moiri

⁶⁷ Na imam Hakariah na amana nalakeaɗa nabinunya Hangahu Harri-Na hi Alla. Hina peakaya na lii nama waling lahi Moiri, wina,

⁶⁸ “Maiyay iata kawuatu haliya hi Moiri, Alla Ihrael! Aminyaka ana patulu-pagatang kata lika-loaga waling ta geꞌa.

⁶⁹ Na woada iata Raja nama Pamanumara waling ta walla-wuana hi raja Daut, na ata-Na.

⁷⁰ Napaliinya ta nabi-nabi hanaɗug, hi Moiri na woaya napatura-paʄaʄingun

⁷¹ kana pahelada walingu ta geꞌada, ʄaka ta limma tou ɗama huka-da ati.

⁷² Na patekanya napa awi-panamunguna, ta ɓoku-apuda ʄaka na namuya napaturanguna nama harri.

⁷³ Na pahaki ɗenganya hi Abraham, na ama bollud

⁷⁴ ʄaka napaturang ana palika-loagad walingu ta geꞌa, abi hilu mangeꞌat ata wuatu haliya hi Moiri,

⁷⁵ ʄaka kata pa eginanya na ati-Na waingu pata morik nama murrah ʄaka nama paɗening ta ɗalu morikuda.

⁷⁶ Ou, aku anag, baar ɗatikiwu nabi waling lahi Alla Nama Reihi Jaga. Ou nama moulu waling ta Raja nama Pamanumara kam hadiananya na larangi-Na.

⁷⁷ Ou nama peakaya ta tou ɗangu aʄiaya hi Alla nama poahi-poɗahuha ɗa doku-jala.

⁷⁸ Hi Alla napa awi ʄaka napa namung, enga aminya ana pamanumarada, toungu nahungana na matalaɗɗu,

⁷⁹ ana pawahanya natou ɗangu, nama enganaha ta makapetang ʄaka nama mangeꞌat. Atounounaka, napamoili ɓalidaka iata lahi Alla.”

⁸⁰ Na anana na imam Hakariah kii-ki matuananyaka ʄaka taba kullihunanyaka na waddin. Manga ana tutuka matuana, engangu nanyaka ta maraɗa karah, lapakung ana tomaya na rahi ana patekangu wikina ta tou Ihrael hina pahalakuya na ngidi ɗeitu ngidi tiɗuna.