رومی ایشون 15 - کتاب مقدس به زبان مازندرانی - گویش غربی

¹ اَما گه قَویمی، وِنِه اونانیگه ضعیفِنِ رِه تَحمِل هاکِنیم و شی خِشال هاکِردنی دِمال دَنیوئیم.

² هر کِدیم از اَما وِنِه هر خِبِ چی ای گه شی هَمسادِه ای دِلِه وینِّه همونی خَوَری وِرِه خِشال هاکِنِه، تا وی ایمونی تقویتی باعث بَوو.

³ چون مَسیح شی خِشال هاکِردنی دِمال دَنیوِه، بلگی هَمونجور گه داوودی مزموری دِلِه بَنوِشت بَوِه: «اونانیگه تِرِه سَراکو کِردِنِه ای سَراکو، می سَر دَکِتِه.»

⁴ چون هر چی گه قدیم قدیما بَنوِشت بَوِه، اَمِه تعلیمی سِه وِه تا پایداری و هون دلگرمی ای هَمرا گه مِقَدّسِ نِوشتِه ها دِنِه، اِمید داریم.

⁵ ووئه گه، خِدایی گه پایداری و دلگرمی دِنِه، شِمارِ عطا هاکِنِه تا اونجور گه مَسیحْ عیسایی خواسِّه ای هَمرا جورِ هَمدِیَری هَمرا مِدارا هاکِنین،

⁶ تا با هَم، یَکدِل و یَک زِوون، خِدا یَعنی اَمِه خِداوند عیسی مَسیحی پیرِ جلال هادین.

⁷ پَس هَمونجور گه مَسیح شِمارِ گرمی ای هَمرا قَبول هاکِردِه، شِما هَم هَمدِیَرِ گرمی ای هَمرا قَبول هاکِنین تا خِدا جَلال بَیرِه.

⁸ چون شِمارِ گِمِه گه مَسیح ختنِه بَوِه ایشونی نوکر بَوِه تا خِدایی راسی رِه هَم هادِه، تا هون وعده هایی گه خِدا اَمِه اجدادِ هادا وِه رِه، تأیید هاکِنِه،

⁹ و تا غیرِیهودیِن، خِدارِه وی رَحمتی خاطری جلال هادِن. هَمونجور گه مِقدّسِ نِوِشتِه هایی دِلِه بَنوِشت بَوِه: «پس مِن تِرِه غیرِیهودیِنی دِلِه حمد و ثَنا کِمِّه، و تی اِسمی هَمرا آواز خُومِّه.»

¹⁰ اَی هَم گِنِه: «اِی غیرِیهودین، وی قومی هَمرا خِشالی هاکِنین!»

¹¹ و اَی هَم مزموری کیتابی دِلِه گِنِه: «اِی دِشتِه غیرِیهودیِن، خِداوَندِ حمد و ثنا هاکِنین! ووئه گه دِشتِه مَردِن وِرِه جلال هادِن.»

¹² و یَکَش دییَر اِشعیای پیغمبر هَم گِنِه: «یَسایی بِنِه اِنِه، اونیگه پِرِسا تا غیرِیهودیِنی سَر حِکمرونی هاکِنِه؛ غیرِیهودیِن وِرِه اِمید وَنِّنِه.»

¹³ ووئه خِدایی گه اِمید دِنِه شِمارِ ایمونی دِلِه، خِشالی و آرامشی جا پِر هاکِنِه، اونجور گه روح القُدُسی قِوّتی هَمرا، اِمیدی جا پِر ووئین.

پولُسی خِدمت غیریهودیِنی میِن

¹⁴ اِی می بِرارِن، مِن شِه مِطمعنمِه گه شِما شِه خِبی ای جا پِرِنی، و کامِلِ معرفتِ دارِنی و بَتِنِّنی هَمدیرِ تعلیم هادین.

¹⁵ ولی خِیلی جِسارت هاکِردِمِه، چن تا مَطلَبِ شِمِسِه بَنوِشتِمِه، تا اونانِه شِمِه یاد بیارِم، چون خِدا هَین فیضِ مِنِه هادا

¹⁶ گه غیریَهودینی سِه، مَسیحْ عیسایی نوکر ووئِم و خِدایی اِنجیلی خِدمت هاکِردنی سِه کاهِنی هاکِنِم، تا غیریهودیِن یَتِه قابِلِ قَبولِ هَدیِه خِدایی پِش ووئِن گه روح القُدُسی طَریقی جا تَقدیس بَوِه.

¹⁷ پَس مِن مَسیحْ عیسایی دِلِه هَین خِدمتی گه خِدایی سِه دِ کِمِّه رِه دلیلی دارمِه گه افتخار هاکِنِم.

¹⁸ چون جِرأت نَکِمِّه هیچی ای جا گَب بَزِنِم، اِلّا اونچی گه مَسیح می طریق اَنجام هادا، تا غیرِیَهودیِنِ ایمونی مِطیع هاکِنَم، شی گَب و کارایی طریقی جا.

¹⁹ وی، هَینِه نِشونِه ها و معجِزِاتی قوّتی هَمرا یَعنی خِدایی روحی قِوّتی هَمرا اَنجام هادا، اونجور گه اورشلیمی جا تا ایلیریکوم بوردِمِه، و کاملاً مسیحی اِنجیلی خدمتِ اَنجام هادامِه.

²⁰ هَمِش می آرِزو هَین وِه گه یَجایی اِنجیلِ موعظه هاکِنِم گه مَسیحی اِسمِ نِشنُس وون، تا نَوو گه مِن یَنَفر دییَری پِئی سَر بَنایی بَساجَم،

²¹ هَمونجور گه اِشعیای پِیغمبری کیتابی دِلِه بَنوِشت بَوِه: «اونانیگه ویجا بی‌خَوَر وِنِه، وینِّنِه و اونانیگه نِشنُس وِنِه، فَهمِنِنِه.»

²² هَینی خاطریِه گه چَن کَش خوایسِمِه شِمِه وَر بیئِم ولی نَوِه.

²³ ولی اِسا چون هَین مَنطقِه هایی دِلِه، دِ کاری نَمونِسِه گه هاکِنِم، و از اوجِه گه خِیلی سا‌لِ مِشتاقمِه شِمِه وَر بیئِم،

²⁴ اِمید دارمِه گه وختی دِ اِسپانیا شومِه، شی راهی سَر شِمارِ بَوینِم تا بعد از اونگه اَقدّی شِمِارِ بَئيمِه، مِنِه اوجِه ای سَفری دِلِه کِمَک هاکِنین.

²⁵ ولی اَلَن خوایمِه اورشلیمی شهری سِه بورِم تا اوجِه مِقَدَّسینی سِه کِمکِ مالی بَوِرِم،

²⁶ چون مقدونیه و اَخائیه ای کلیساها خواینِنِه اورشلیمی مِقدَّسینی فقیرِنی سِه کِمکِ مالی جَم هاکِنِن.

²⁷ وِشون شِه خوایسِنِه هَین کارِ هاکِنِن؛ و راساسی هَم وِشون، اورشلیمی ایموندارِنی مَدیون وِنِه. چون اگه غیریهودیِن، یَهودیِنی روحانی برکاتی دِلِه شریک بَوِنِه، یَهودیِن هَم وِنِه برکاتِ مالی ای دِلِه وِشونِه خِدمت هاکِنِن.

²⁸ پس، وختی هَین کارِ تُوم هاکِردِمِه و اونچی گه جَم بَوِه وِه رِه، وِشونی دَس بَرِسانیمِه، شِمِه راهی جا اِسپانیایی سِه شومِه.

²⁹ دِمِّه وختی گه شِمِه وَر بیئِم، مسیحی برکتی هَمرا گه فِراوونِ اِمِه.

³⁰ اِی بِرارِن، اَمِه خِداوند عیسی مَسیح و روح القُدُسی مِحبتی خاطری، شِمه جا خواهِش کِمِّه گه خِدایی وَر هَمِش میسِه دِعا هاکِنین، و هَین کاری هَمرا می خِدمتی دِلِه شریک ووئین.

³¹ تا یَهودیه ای بی ایمونِنی جا، جان سالِم به‌ دَر بَوِرِم و می خِدمَت اورشلیمی سِه مِقَدَّسینی وَر قَبول بَوو.

³² اَزما، خِدا بَخواد ذوقی هَمرا شِمِه وَر بیئِم تا شِمه وَر می جان تازِه بَوو.

³³ خِدای صِلح و سلامتی شِما هَمه ای هَمرا دَوو. آمین