رومی ایشون 13 - کتاب مقدس به زبان مازندرانی - گویش غربی

صاب مَنصبِنی جا اطاعت هاکِردَن

¹ هر کَس وِنِه صاب مَنصبِنی مِطیع ووئِه، چون هیچ صاب مَنصبی دَنیِه گه خِدائی جا نَووئِه. صاب مَنصبِنی هَم دَرِنِه گه خِدایی طرفی جا تعیین بَوِنِه.

² پَس هر کی گه صاب مَنصبِنی علِیه بِلَن بَوو، اونچی ای علِیه گه خِدا تعیین هاکِردِه، بِلَن بَوِه؛ و اونانیگه هَینجور کِنِنِه، داوری وونِنِه

³ چون اونانیگه دِرس رفتار کِنِنِه حِکمرونِنی جا تَرسی نارِنِه، ولی خلافکارِن وِشونی جا تَرسِنِنِه. خواینی صاب مَنصبِنی جا تَرسی ناری؟ پس، اونچی گه دِرِسِ رِه هاکِن گه تِرِه تَحسین کِنِّه.

⁴ چون وی تی خیری سِه خِدایی نوکَرِ. ولی اگه کارِ خلاف هاکِنی، بَتِرس، چون وی بیخدی شی کَمَر شمشیر نَوِسِه. وی خِدایی نوکَرِ، و کَسیه گه خِدایی سِه انتقام گیرنِه و خِدایی غضبِ خلافکاری سَر اُرنِه.

⁵ پَس آدم وِنِه نا فقط خِدایی غضبی سِه، بلگی وِجدانی سِه هَم مِطیع ووئِه.

⁶ هَینسِئِه گه شما مالیات دِنِنی، چون صاب مَنصبِن خِدایی نوکرِنِنِه، و هَین چیایی جا مواظبت کِنِنِه.

⁷ هر کسی حقِّ وِرِه هادین: اگه مالیاتِ، مالیات هادین، اگه خَراجِ، خَراج هادین، اگه اِحترامِ، اِحترام بِلین، اگه حِرمتِ، حِرمت بِلین.

شریعتی بِجا بیاردن مِحبتی طریقی جا

⁸ هیچ دِینی هیچکسی گِردَن نارین، اِلّا هَینگه همش هَمدیَرِ مِحبت هاکِنین. چون هر کی یَنَفَر دییَرِ مِحبت هاکِنِه، شریعتِ بِجا اُرنِه.

⁹ چون هَین احکام «زِنا نَکِن»، «قتل نَکِن»، «دِزّی نَکِن»، «طمَع نَکِن»، و هر حِکمِ دییَری گه ووئِه، هَمه هَین کلامی دِلِه خِلاصه وونِه گه «شی هَمسادِه رِه هِتی شی تَرا دوس دار.»

¹⁰ مِحبت، شی هَمسادِه رِه بَدی نَکِنِّه؛ پَس مِحبت شریعَتِ تِموم و کمال به اَنجام رَسانِّه.

¹¹ علاوه بر هَین، شِما دِنِنی گه چی زَمونِه ای دِلِه دَرِنی، اِسا وی وخت بَرِسیِه گه خُویی جا ویشار بَووئین. چون اَلَن در قیاسِ هون موقِه ای گه ایمون بیاردمی، اَمِه نِجات نَزیکتر بَوِه

¹² شُو دِ تُوم وونِه و روز نَزیکِ. پَس بیئین تاریکی ای بَدِ کارارِ کِنار بِلیم و نوری زِرِه رِه دَکِنیم.

¹³ بیئِین دِرِس رفتار هاکِنیم گه اونانیگه روزی روشِنایی ای دِلِه دَرِنِه ای لایق ووئه، نا عیاشی و مَسی ای دِلِه، نا زِنا و هوس بازی ای دِلِه، نا دَعوا مِرافِه و حَسودی ای دِلِه.

¹⁴ پس خِداوند عیسی مسیحی شخصیتِ یَتِه لیواسی تَرا دَکِنین، جِسمی هَوا و هوسی سِه تَدارِک نَوینین تا وی خواسِّه ها رِه بِجا بیارین.