رومی ایشون 11 - کتاب مقدس به زبان مازندرانی - گویش غربی

اسرائیلی بِجا بَمونِس

¹ پَس پُرسِمِه: مَگِه خِدا شی قومِ رَد هاکِردِه؟ اَصلاً! چون مِن، شِه اسرائیلیمِه، ابراهیمی نَسل و بِنیامینی ایل و تَباری جا هسمِه.

² خِدا شی قوم گه پِشتر سیوا هاکِرد وِه رِه، رَد نَکِردِه. مَگِه نَئونِنی مِقَدّسِ نِوشتِه ها ایلیای پِیغمبری خَوَری چی گِنِه؟ گه وی چِتی اسرائیلی قومی علِیه، خِدایی وَر شکایت هاکِردِه و بُتِه:

³ «خِداوندا، تی پِیغَمبَرِنِ بَکوشتِنِه و تی قِروونگاها رِه لی هادانِه. فقط مِن بَمونِسِمِه و اِسا خواینِنِه مِنِه هَم بَکوشِن.»

⁴ ولی خِدا وِرِه چی جِواب هادا؟ هَینگه «مِن هف هزار نفر شیسِه کِنار بِشتِمِه گه بَعَلی بِتی پِش زِنی نَزونِه.»

⁵ هینِسِه، هَمین اَلَنم اَقدّی دَرِنِه گه خِدایی فیضی راهی جا انتخاب بَوِنِه.

⁶ ولی اگه فیضی راهی جا ووئِه، دِ اعمالی سِه نیِه؛ و اِلّا فیض دِ فیض نیِه. ولی اگه اعمالی راهی جا ووئِه، دِ فیضی سِه نیِه؛ و اِلّا عَمَل دِ عَمَل نیِه.

⁷ اَزما چی؟ هَینگه اسرائیلی قوم اونچی گه ذوق و شوقی هَمرا وی دِمال دَوِه رِه، بِدَس نیاردِه. اِنتخاب بَوِه ایشون اونِه بِدَس بیاردِنِه و ولی بَقیِه سنگدِل بَوِنِه.

⁸ هَمونجور گه اِشعیای پِیغمبری کیتابی دِلِه بَنوِشت بَوِه: «تا اَمرِز خِدا لِرِ روحِ، وِشونِه هادا و چِشایی گه نَتِنِّن بَوینِن و گوشایی گه نَتِنِّن بِشنُئِن.»

⁹ و داوودِ پادشاه گِنِه: «وِشونی سِفرِه وِشونی سِه دام و تَلِه ووئِه سَنگی گه وِشونِه بِنِه زَنِّه وِشونی سِه مِکافات بَوو.

¹⁰ وِشونی چِش تار بَوو تا نَتِنِّن بَوینِن وِشونی کَمر هَمِش دِلّا ووئه.»

¹¹ پس پُرسِمِه: اونِن لغزش بَخاردِنِه تا هَمیشِه ای سِه دیم بَخارِن؟ اَصلاً! بَلگی وِشونی نافرمونی ای هَمرا، غیرِیهودیِن نِجاتِ بَیتِنِه، تا اسرائیلی قومی دِلِه غیرت به وجود بیِه.

¹² ولی اگه وِشونی تقصیرات دِنیارِه پولدار هاکِردِه و وِشونی شِکست غیرِیهودینِ پولدار هاکِردِه، پس وختی گه یهودی قوم کامِلاً نِجات بَیرِن چَنّی ویشتَر پولدار بَووئنی باعث وونِه؟

¹³ اِسا، شِما غیرِیهودیِنی هَمرا گَب زَمِّه. از اوجِه گه مِن غیرِیَهودِینی رَسولمِه، شی خِدمَتی سَر خِیلی افتخار کِمّه،

¹⁴ هین اِمیدی هَمرا گه شی همنِژادِنِ غیرتی هاکِنِم، وِشونی جا، بعضیارِه نِجات هادِم.

¹⁵ چون اگه وِشونی رَد بَووئنی معنی خِدایی آشتی دِنیایی همرائه، وِشونی قَبول بَووئَنی معنی چیِه، بِجز مِردِگونی جا زینِّه بَووئَن؟

¹⁶ اگه خمیری جا یَتِه گِلی گه نوبَری ای سِه خِدایی پیشکَش وونِه مِقَدَّس ووئِه، پس هینجوری دِشتِه هون خمیر مِقَدّسِ؛ و اگه بِنِه مِقَدَّس ووئِه، پَس شاخِه ایشون هَم مِقَدَّسنِه.

¹⁷ ولی اگه شاخه ایشونی جا بعضیا بَوری بَوِنِه و تو گه وَحشی زیتونی شاخِه وِه ای، و زیتون داری دییَر شاخِه هایی کَش پِیوَن بَخاردی و اَلَن وی بِنِه ای مِقوّی شیره ای جا خارنی،

¹⁸ هون شاخِه ایشونی سَر نَبال. اگه هَینجور کِنّی، یاد نَکِن، تو بِنِه رِه نارنی، بلگی بِنِه تِرِه دارنِه.

¹⁹ شاید گِنی: «شاخِه ایشون بَوری بَوِنِه تا مِن پِیوَن بَخارِم.»

²⁰ راس گِنی. ولی اونان بی ایمونی ای خاطری بَوری بَوِنِه و تو فقط ایمونی سَر پابرجائی. پَس مغرور نَواش بَلگی بَتِرس.

²¹ چون اگه خِدا طبیعی شاخِه ایشونِه رَحم نَکِردِه، تِرِه هَم رَحم نَکِنِّه.

²² پَس خِدایی مِهرَوونی و سَختگیری رِه یادی جا نَوِر؛ سَختگیری اونانیسِئه گه ایمونی جا دیم بَخاردِنِه، ولی تیسِه مِهرَوونِ، البَتِه هَین شرطی هَمرا گه وی مهرَوونی ای دِلِه ثابت بَمونی؛ و اِلّا تو هَم بَوری وونی.

²³ و اگه اونان هَم بی ایمونی رِه اِدامِه نَدِن، اَی پِیوَن خارِنِه، چون خِدا بَتِنِّه یَکَش دییَر اونانِه پِیوَن بَزِنِه.

²⁴ چون اگه تو وَحشی زیتون داری جا بَوری بَوِئی و بَرخَلافِ شی طبیعت، آزادِ زیتون داری کَش پِیوَن بَزِه بَوِه ای، پس چَنّی ویشتَر اصلی شاخِه ایشون بَتِنِّنِه هون زیتون داری گه ویجا بَوری بَوِنِه رِه، پِیوَن بَزِه بَوون.

اسرائیلی قومی رازی نِجات

²⁵ اِی بِرارِن، نَخوایمِه هَین رازی جا بی خَور ووئین - نَکِنِه شِرِه حکیم دِنّین - گه اسرائیلی یَتِه گِلی رِه سنگدلی بَیتِه، تا وِشونی تعداد گه قرارِ غیریهودیِنی میِن مسیحِ ایمون بیارِن کامِل بَوون.

²⁶ و هَینجوری، دِشتِه اسرائیل نِجات گیرنِه. هَمونجور گه مِقدّسِ نوشته هایی دِلِه بَنوِشت بَوِه: «صَهیونی جا یَنفر اِنِه گه نِجات دِنِه و یعقوبی جا بی‌دینی رِه دیرگا کِنِّه.

²⁷ و می هَین عهد وِشونی هَمرا دَرِه وختی گه وِشونی گِناهِنِ بَئیرِم.»

²⁸ اِنجیلی خَوَری، یهودیِن شِمِه خاطری دِشمَنِنِه؛ ولی خِدایی اِنتخابی خاطری، و شی اجدادی خاطری خِدایی عزیزِنِه.

²⁹ چون خِدا اصلاً شی هدیه ها و دعوتِ پَس نَئیرنِه.

³⁰ دِرِس هَمونجور گه شِما یه وختی نسبت به خِدا نافرمون وِنی، ولی اَلَن یهودیِنی نافرمونی ای خاطری خِدایی رحمت شِمِسِه بیمو،

³¹ پس اَلَن وِشون هَم نافرمون بَوِنِه تا خِدایی رَحمَتی خاطری گه شِمارِ هادا، [اَلَن] وِشونِ هَم رَحم بَوو.

³² چون خِدا هَمه رِه نافرمونی ای گرفتار هاکِردِه، تا هَمه رِه رَحم هاکِنِه.

³³ آه، چَنّی خِدایی دولتمندی و حکمت و معرفت جَلِ! وی داوری ها رِه نِشِنِه دَکلاش وَکلاش هاکِردَن. و وی راهها رِه نِشِنِه بِفَهمِسَن.

³⁴ «چون کیِه گه خِداوندی فِکرِ دِنِس وو و یا کی وی هَمرا مشورت هاکِردِه؟»

³⁵ «کیه گه یَچی خِدارِه هادا وو تا وِرِه پَس هادا بَوو؟»

³⁶ چون هَمه چی ویجا، و وی طریقی جا، و ویسِه هَسِّه. وِرِه تا اَبَد جَلال ووئِه.آمین.