رومی ایشون 1 - کتاب مقدس به زبان مازندرانی - گویش غربی

¹ پولُسی طرفی جا، مَسیحْ عیسایی نوکَر، گه رِسالتی سِه بَخونِس بَوِه و خِدایی اِنجیلی سِه وَقف بَوِه؛

² هَمون اِنجیلی گه پِشتر خِدا، شی پِیغمبَرِنی طریقی جا، مِقَدّسِ کیتابهایی دِلِه وی وعده رِه هادا وِه،

³ و وی ریکائی خَوَری، گه جسماً داوودی نَسلی جا دِنیا بیمو،

⁴ و طبقِ روحِ قدوسیت شی زینِّه بَووئنی هَمرا مِردِگونی جا، قِوّتی دِلِه اعلام بَوِه گه خِدایی ریکائِه، یَعنی اَمِه خِداوند عیسی مسیح.

⁵ خِدا مسیحی طریق اَمارِه فیض هادا تا وی رسولِن ووئیم و دِشتِه قومیشونِه رانِمایی هاکِنیم گه مسیحی اِسمِ ایمون بیارِن و ویجا اطاعت هاکِنِن.

⁶ و هَین شِمِسِه هَم هَسِّه، گه بَخونِس بَوِنی تا عیسی مَسیحی سِه ووئین؛

⁷ دِشتِه اونانیسِه گه رومی شهری دِلِه دَرِنِه، گه خِدا وِشونِه دوس دارنِه و بَخونِس بَوِنِه تا خِدایی مِقَدّسِ قوم ووئِن: فیض و صِلح و سلامتی اَمِه پیر، خِدا، و خِداوند عیسی مَسیحی طَرفی جا، شِمِسِه بیِه.

پولس رومی بوردنی سِه ذوق دارنِه

⁸ اَوّلَاً گه، شی خِدارِه عیسی مَسیحی طریق، شِما هَمه ای خاطری شِکر کِمِّه، چون شِمِه ایمونی اَوازِه دِشتِه دِنیایی دِلِه دَپیتِه.

⁹ چون خِدایی گه وِرِه دِشتِه شی دِل و جانی هَمرا، وی ریکائی اِنجیلی کاری دِلِه دِ خِدمت کِمِّه میسِه گِواهی دِنِه گه چِتی یَکسرِه شی دِعاهایی دِلِه شِمارِ یاد اُرمِه

¹⁰ همِش شی دِعاهایی دِلِه خوایمِه گه، اگه خِدا بَخواد سرآخر بَتِنِم شِمِه بَئینی سِه بیئِم.

¹¹ چون شِمِه بَئینی سِه ذوق دارمِه تا روحانی عطایا شِمِه ایمونی تقویتی سِه شِمارِ هادِم-

¹² یَعنی تا اَما همدیری ایمونی هَمرا دلگرم بَووئیم، هَم مِن و هَم شِما.

¹³ اِی بِرارِن، نَخوایمِه بی‌خَوَر ووئین گه چَنکَش خوایسِمِه شِمِه وَر بیئِم، ولی هر کَش یَچی پِش بیمو. خوایمِه گه شِمِه میِن هَم اَقّدی محصولی دِرُو هاکِنِم، هَمونجور گه دییَر غیریهودیِنی میِن هاکِردِمِه.

¹⁴ مِن شِرِه هَم یونانیِن، هَم بَربَریشون، هَم حکیمِن و هَم نادونِنی مدیون دِمِّه.

¹⁵ هَینِسه، خِیلی ذوق دارمِه اِنجیلِ شِمِسِه گه رومی دِلِه زندگی کِنِنی، اعلام هاکِنِم.

¹⁶ چون مِن اِنجیلی جا خِجالتی نارمِه، چونگه اِنجیل خِدایی قوّتِ هر کَسی نِجاتی سِه گه ایمون بیارِه، اَوَّل یهود و اَزما غیرِیهود.

¹⁷ چون اِنجیلی دِلِه، هون صالحی ای گه خِدایی جائه آشکار وونِه، گه اوَّل تا آخر ایمونی سَر پابرجائه. هَمونجور گه حَبَقوقِ پِیغمبری کیتابی دِلِه بَنوشت بَوِه: «صالِح آدَمِن ایمونی هَمرا زندگی کِنِنِه.»

خِدایی غضب گِناهکارِ آدمنی سَر

¹⁸ چون خِدایی غضَب آسِمونی جا هر جور بی خِدایی و آدمِنی ناراسی ای سَر اِنِه، گه شی ناراسی ای هَمرا حَیقَتِ از بِین وَرِنِه.

¹⁹ چون اونچی خِدایی جا بِشِنِه بِشناسین وِشونی سِه مَعلومِه، چون خِدا اونِه وِشونی سِه معلوم هاکِردِه.

²⁰ چون خِدایی هون صِفات گه نِشِنِه بَئین، یَعنی وی اَبَدی قِوّت و ذاتِ الهی، از موقِه ای گه دِنیا خَلق بَوِه، هون چیایی دِلِه گه بَسات بَوِه، واضح بَئی وونِه، پَس وِشون هیچ ویهومِه ای نارِنِه.

²¹ چون هر چَن خِدارِه بِشناسینِه، ولی وِرِه هِتی خِدایی تَرا حِرمَت نِشتِنِه و شِکر نَکِردِنِه، بَلگی شی فِکری دِلِه هیچ و پوچی گرفتار بَوِنِه و وِشونی نِفهمِه دِلیشونِه تاریکی بَیتِه.

²² هر چَن اِدّعا کِردِنِه حکیمِنِ، نادون بَوِنِه

²³ و وِشون خِدایی اَبَدی جَلالِ، هون بِتهایی هَمرا گه آدَمِ فانی و پرندِگون و حیوونِن و خَزَندِگونی تَرانِه عَوَض هاکِردِنِه.

²⁴ پس خِدا هَم وِشونِه، شِه وِشونی دِلی هوا و هَوسهایی دِلِه ناپاکی ای هَمرا وِل هاکِردِه، تا شی تَنِ شی میِن بی حِرمت هاکِنِن.

²⁵ چون وِشون هون حَیقتی گه خِدایی خَوَری هَسِّه رِه دِرویی هَمرا عوض هاکِردِنِه و مخلوقِ، خالقی عوض پَرَسِش و خِدمت هاکردنِه، خالقی گه وِنِه تا اَبَد وِرِه پَرَسِش هاکِردن، آمین.

²⁶ هَینسِه خِدا هَم وِشونِه شرم آورِ هوا و هوسهایی دِلِه وِل هاکِردِه. چونگه وِشونی زَناکِنِن، طبیعی رابِطه رِه غیرطبیعی رابطه ای هَمرا عوض هاکِردِنِه؛

²⁷ هَینسِه، مَرداکِنِن هَم طبیعی رابطه ای جا زَناکِنِنی هَمرا دَس بَکِشینِه، و هَمدیری هَوا و هوسی تَشی دِلِه بَسوتِنِه. مَرد، مَردی هَمرا شرم آورِ کارا هاکِردِه، و شی بَدِ کارایی مِکافاتِ بَیتِنِه.

²⁸ از اوجِه گه خِدایی بِشناسیَن وِشونی سِه اِرزِشی ناشتِه، خِدا هَم وِشونِه بَد بَدِ فکرهایی دِلِه وِل هاکِردِه تا هون کاری گه نِیسِه هاکِنِنِ، اَنجام هادِن.

²⁹ وِشون هر جور نادِرسی، شِرارَت، طمع و بدخواهی ای جا پِرِنِه. وِشون حَسودی، قَتل، دَعوا، فَریب و بدخواهی ای جا پِرِنِه. وِشون پِشتِ سَر گُو،

³⁰ تِهمت‌زَن، خِدایی دِشمنِن، گستاخ و مغرورِنِه، و شِرِه بالِنِه. شَریرانه کارایی هاکِردَنی سِه، جدیدِ راها دِرِس کِنِنِه. و شی پیر و ماری گَبی جا اطاعت نَکِنِنِه،

³¹ نِفهم و بی‌وفا، بی‌عاطفه و بی‌رحمِنِه.

³² با هَینگه خِدایی عادِلانِه حِکمِ دِنِّنِه گه اونانیگه هینجور کارارِه کِنِنِه وِشونی مِکافات بَمِردَنِ، نا فقط شِه اونانِه اَنجام دِنِنِه، بَلگی اونانیگه هَین کارارِ کِنِنِه رِه هَم، تأیید کِنِنِه.