یوحنایِ مکاشفه 9 - کتاب مقدس به زبان مازندرانی - گویش غربی

¹ و پنجمین فِرِشتِه شی شیپوری دِلِه پی هاکِردِه، و مِن یَتِه سِتارِه بَئیمِه گه آسِمونی جا زَمینی سَر دیم بَخاردِه و هاویه ای چاهی کِلی گه تَه نارنِه وِرِه هادا بَوِه.

² هون فرشتِه هاویه ای چاهِ وا هاکِردِه. هون چاهی جا یَچی هِتی یَتِه گَتِه کورِه ای دی ای تَرا پِرِسا، و آفتاب و هوا هون چاهی دی ای جا تاریک بَوِنِه.

³ اَزما دی ای میِن، واش پِرِنیشون زَمینی سَر بیمونِه و اونِنِه یَتِه قدرت، هِتی زَمینی عَقرَبایی قِدرتی تَرا هادا بَوِه.

⁴ و اونِنِه بُتِه بَوِه گه نا زَمینی واشیشونِ، و نا هیچ سَبزِ گیاه یا داری رِه صدمِه نَزِنِن، بلگی فقط مَردِنی رِه صدمِه بَزنِن گه خِدایی مِهرِ شی سالی سَر نارِنِه.

⁵ و اونِنِه اِجازه هادا بَوِه گه هون مَردنِ پَنج ماه عذاب هادِن، بدونِ هَینگه هیچکسِ بَکوشِن. و وِشونی عذاب، هِتی عَقربی عذابی تَرا وِه، هون موقِه گه ینفرِ نیش زَنِّه.

⁶ هون روزایی دِلِه مَردِن مَرگی دِمال گِردِنِنِه، ولی اونِه نَنگیرنِه؛ مرگی آرِزو رِه دارِنِه، ولی مَرگ وِشونی جا فِرار کِنِّه.

⁷ و هون واش پِرِنیشون هِتی اَسبیشونی تَرانِه گه جَنگی سِه آمادِه بَوِنِه. وِشونی کَلِّه یَچی دَوِه گه هِتی طِلا تاجی تَرا وِه و اونِنی قیافِه هِتی آدَمی تَرا وِه.

⁸ اونِنی سَری می، هِتی زَناکِنِنی سَری می ای تَرا وِه و وِشونی دَنِّن هِتی شیرِنی دَنِّنی تَرا وِه.

⁹ یَتِه آهنی سینه پوش، شی سینه ایشونی سَر داشتِنِه، و وِشونی بالیشونی صِدا، هِتی اَرابِه ها و یَتِخِیلی اَسبیشونی صدایی تَرا وِه گه جَنگی سِه شیوِنِه.

¹⁰ هونِنی دِم و نیش، هِتی عَقرَبی دِم و نیشی تَرا وِه، و شی دِمی دِلِه هَین قِدرتِ داشتنِه گه مَردِنِ پَنج ماه عذاب هادِن.

¹¹ هاویه ای چاهی فرشتِه وِشونی پادشاهِ، گه عِبرانینی زِوونی دِلِه وی اِسم’اَبَدونِ‘، و یونانی زِوونی دِلِه ’آپولیونِ‘ یَعنی نابودکننده.

¹² اوَّلین ’وای‘ سَر بَوِه؛ هارش، دِتا دییَر ’وای‘ حَلا وِنِه بیِه.

¹³ اَزما، شِشِمین فِرِشتِه شی شیپوری دِلِه پی هاکِردِه، و مِن یَتِه صدا طِلا قروونگاهی چار شاخی جا گه خِدایی حِضور دَرِه بِشنُسِمِه،

¹⁴ گه شِشمین فِرِشتِه گه شیپور داشتِه رِه، بُتِه: «هون چار تا فِرشتِه گه فُراتی گَتِه روخِنِه ای وَر اَسیرِنِه رِه، آزاد هاکِن.»

¹⁵ پَس هون چار تا فرشته گه هون ساعَت و هون روز و هون ماه و هون سالی سِه اَمادِه بَوِه وِنِه، آزاد بَوِنِه تا یَه سِوّمِ آدَمِنِ بَکوشِن.

¹⁶ سَوارِه نظامی تعداد دویست میلیون نفر وِه؛ گه وِشونی تعدادِ بِشنُسِمِه.

¹⁷ اَسبیشون و وی سوارِنِ شی رؤیایی دِلِه هینجور بَئیمِه: اونِنی زِرِه ایشونی رنگ، تَشی سِرخی و کَئو آبی و گوگِردی زردی رِه داشتِه. اَسبیشونی کَلِّه، هِتی شیری کَلِّه ای تَرا وِه و اونِنی دِهِنی جا تَش و دی و گوگِرد دیرگا زووِه.

¹⁸ هَین سِه تا بلایی هَمرا، تَش و دی و گوگِرد گه اونِنی دِهِنی جا دیرگا زووِه، یَه سِوّمِ آدَمِن بَکوشت بَوِنِه.

¹⁹ چون اَسبیشونی قِد وِشونی دِهِن و دِمی دِلِه دَوِه. چون وِشونی دِمیشون هتی ماری تَرائه گه کَلِّه دارنِه و اونِنی هَمرا صدمه زَنِنِه.

²⁰ بَقیِه آدَمِن، گه هَین سِه تا بَلایی جا بکوشت نَوِنِه، نا شی دَسی کارایی جا توبِه هاکِردِنِه و نا دِویشونی پَرَسِش هاکردنی جا و نا طِلا بِتیشون و نقره ای و برنجی و سَنگی و چویی بِتیشونی پَرَسِش هاکردنی جا، گه نا بَتِنِّنِه بَوینِن و نا اِشنُنِنِه و نا راه شونِنِه.

²¹ وِشون شی آدمکُشیها و جادوگریها و بی‌عفتیها و دِزّیهایی جا هَم توبِه نَکِردِنِه.