یوحنایِ مکاشفه 3 - کتاب مقدس به زبان مازندرانی - گویش غربی

مَسیحی پِیغِم ساردِسی کلیسایی سِه

¹ «و ساردِسی کلیسایی فرشته ای سِه بَنویس: «اونگه خِدایی هفتا روح و هفتا سِتارِه رِه دارنِه، هَینجور گِنِه: تی اعمالی جا خَوَر دارمِه. هینِسِه سَرشناسی گه زینِّه ای، ولی بَمِردی.

² ویشار بَواش و اونچی گه بِجا بَمونِسِه و دِ میرنِه رِه، تقویت هاکِن! چونگه تی اعمالِ شی خِدایی دیدی وَر کامل نَئیمِه.

³ پَس اونچی گه بَیتی و بِشنُسی رِه، شی یاد بیار؛ اونِه دار و توبِه هاکِن. اگه ویشار نَووئی، دِزّی تَرا اِمِه و تو خَوَردار نَوونی گه چی ساعتی تی علِیه اِمِه.

⁴ «با هَین وجود حَلا، بعضیارِه ساردِسی دِلِه دارنی گه شی لیواسیشونِه کثیف نَکِردِنِه. و وِشون اِسبی لیواسی هَمرا، می هَمرا قَدَم زَنِنِه، چونگه لیاقت دارِنِه.

⁵ هر کی گه پیروز بَوو، هَینجور اِسبی لیواس کِنِّه و مِن وی اِسمِ هیچ وخت حیاتی دفتری جا پاک نَکِمِّه، و شی پیر و وی فِرِشتگونی وَر وی اِسمِ شی زِوون اُرمِه.

⁶ اونگه گوش دارنِه بِشنُئِه گه خِدایی روح کلیساهارِه چی گِنِه.

مَسیحی پِیغِم فیلادِلفیه ای کلیسایی سِه

⁷ «فیلادِلفیه ای کلیسایی فرِشته ای سِه بَنویس: «اونگه قدّوسِ، اونگه حقِّ، اونگه داوودی کِلی رِه دارنِه، اونگه وا کِنِّه و هیچکَس نَتِنِّه دَوِنِّه، و اونگه وَنِّه و هیچکَس نَتِنِّه وا هاکِنِه، هَینجور گِنِه:

⁸ مِن تی اعمالی جا خَوَر دارمِه. هارِش، یَتِه وا هاکِردِه دَر تی پِش بِشتِمِه گه هیچکَس نَتِنِّه اونِه دَوِنِّه. دِمِّه گه تی قِوَّت کَمِ، ولی می کَلامِ داشتی و می اِسمِ هَشا نَکِشی.

⁹ هارِش، مِن اونانیگه شیطانی عبادتگاهی جا هَسِّنِه و شِرِه یهودی دِنِنِه ولی نینِه، بلگی دِرو زَنِنِه، هارِش، مِن وِشونِه مجبور کِمِّه تا بیئِن و تی لینگ دَکِفَن تا دِنِّن گه مِن تِرِه دوس داشتِمِه.

¹⁰ چونگه تو می کلامِ صبر و تَحَمِلی خَوَری داشتی، مِنَم تِرِه هون آزمودی ساعتی دِلِه دارمِه، هون ساعت گه دِشتِه دِنیایی سَر اِنِه تا زَمینی سَری مَردِنِ، آزمود هاکِنِه.

¹¹ «مِن زود اِمِه. اونچی گه دارنی رِه، قائِم دار تا کَسی تی تاجِ تیجا نَئیرِه.

¹² هر کی گه پیروز بَوو، شی خِدایی معبدی دِلِه وِرِه سِتون کِمِّه. و دِ هیچ وخت اوجِه ای جا نَشونِه. و مِن شی خِدایی اِسم و شی خِدایی شهری اِسمِ وی سَر نِوِیسِمِه، یَعنی جدیدِ اورشلیم، گه آسِمونی جا می خِدایی طرفی جا اِنِه، و شی جدیدِ اسمِ هَم وی سَر نِوِیسِمِه.

¹³ اونگه گوش دارنِه بِشنُئِه گه خِدایی روح کلیساهارِه چی گِنِه.

مسیحی پِیغِم لائودیکیه ای کلیسایی سِه

¹⁴ «لائودیکیه ای کلیسایی فرشته ای سِه بَنویس: «اونگه آمینِ، اونگه وفادارِ و حَیقی شاهِدِ، اونگه خِدایی خلقتی سَرچِشمِئه، هَینجور گِنِه:

¹⁵ تی اعمالی جا خَوَر دارمِه؛ گه نا بَچائی و نا داغ. کاش یا بَچا وِه ای یا داغ.

¹⁶ پس چون وِلَرمی و نا داغی نا بَچا، تِرِه هِتی فِلیکی تَرا دِهِنی جا دیرگا دیم دِمِه.

¹⁷ چون گِنی: ”دولتمندمِه؛ مال و مَنال دارمِه و هیچی ای مِحتاج نیمِه.“ و نَئُونی گه بدبخت و ذلیل و فقیر و کور و لِخت و پَتیئی.

¹⁸ تِرِه نَصیحَت کِمِّه خالِصِ طِلا گه تَشی جا بِگذِشتِه رِه، میجا بَخرینی تا دولتمند بَووئی، و اِسبی لیواسیشون، تا دَکِنی و تی لِختی ای شَرم بَئی نَوو، و مَرهم، تا شی چَشی سَر بَمالی تا بَوینی.

¹⁹ «مِن اونانیگه دوس دارمِه رِه سراکو و تربیت کِمِّه، پَس غیرتی بَواش و توبِه هاکِن.

²⁰ هارِش، دَری پِشت اِسامِّه و دِ دَر زَمِّه. اگه کَسی می اَوازِ بِشنُئِه و دَرِ میسِه پِی هاکِنِه، دِلِه اِمِه و وی هَمرا شُوم خارمِه و وی هَم می هَمرا.

²¹ «هر کی گه پیروز بَوو، هَینِه وِرِه دِمِه گه می هَمرا می تَختی سَر هِنیشِه، هَمونجور گه مِنَم پیروز بَوِمِه و شی پیری هَمرا وی تَختی سَر هِنیشتِمِه.

²² اونگه گوش دارنِه بِشنُئِه گه خِدایی روح کلیساهارِه چی گِنِه.»