یوحنایِ مکاشفه 2 - کتاب مقدس به زبان مازندرانی - گویش غربی

مَسیحی پِیغِم اَفِسُسی کلیسایی سِه پیر

¹ اَفِسُسی کلیسایی فِرشته ای سِه بَنویس: «اونگه هفتا ستاره شی راسِ دَسی دِلِه دارنِه و هفتا طِلا لَمپا پایِه ای میِن قَدَم زَنِّه، هَینجور گِنِه:

² تی کارارِه دِمِّه و تی صبر و تَحَمِل و عذابایی جا خَوَر دارمِه، و دِمِّه گه شَرورِ آدمِنِ نَتِنّی تحمل هاکِنی بلگی اونانیگه شِرِه رسول دِنِنِه ولی نینِه، وِشونِه آزمود هاکِردی و بِفهمِسی گه دِروزَنِنِه.

³ دِمِّه گه می اِسمی خاطری صبری هَمرا طاقت اُرنی و تَحَمِل کِنّی و خَسِّه نَوِئی.

⁴ «ولی مِن هَین شِکایَتِ تیجا دارمِه گه هون مِحبتی گه اَوّل داشتی رِه وِل هاکِردی.

⁵ پس شی یاد بیار گه کِجِه ای جا جِر کَتی، توبِه هاکِن و هون کارایی گه اَوَّل کِردی رِه بِجا بیار. اگه نَکِنی، تی وَر اِمِه و تی لَمپا پایِه رِه وی جایی سَر گیرمِه، مَگِه هَینگه توبه هاکِنی.

⁶ ولی یَتِه خِبی دارنی گه نیکولاییانی دار و دَسِه ای کارایی جا بیزاری، گه مِنَم بیزارمِه.

⁷ «اونگه گوش دارنِه بِشنُئِه، گه خِدایی روح کلیساهارِه چی گِنِه. هر کی گه پیروز بَوو، هَینِه وِرِه بَخشِمِه تا زندگی ای داری میوه ای جا گه خِدایی بهشتی دِلِه دَرِه، بَخارِه.

مَسیحی پِیغِم اِسمیرنایی کلیسایی سِه

⁸ «اِسمیرنایی کلیسایی فرشته ای سِه بَنویس: «هون گه اوَّل و هون گه آخرِ، هون گه بَمِردِه و زینِّه بَوِه، هَینجور گِنِه:

⁹ تی عذابا و فَقری جا خَوَر دارمِه، ولی تو دولتمندی! و هون آدمایی تِهمَتایی جا خَوَر دارمِه. گه گِنِنِه یَهودینِه ولی نینِه، بَلگی شیطانی عبادتگاهنِه.

¹⁰ هون عذابایی جا گه خِیلی زود کَشِنی، نَتِرس. هارِش، اِبلیس خِیلی زود بعضی از شِمارِ زیندونی دِلِه دیم دِنِه تا آزمود بَووئین و دَه روز عذاب بَکِشین. تا مرگ وفادار بَمون، گه مِن زندگی ای تاجِ تِرِه دِمِه.

¹¹ «اونگه گوش دارنِه بِشنُئِه، گه خِدایی روح کلیساهارِه چی گِنِه. هر کی گه پیروز بَوو، دِوّمین مرگی جا بلایی وی سَر نیئنِه.

مَسیحی پِیغِم پِرگامومی کلیسایی سِه

¹² «پِرگامومی کلیسایی فِرِشته ای سِه بَنویس: «ویگه دِ دَمِ تیجِ شَمشیر دارنِه، هَینجور گِنِه:

¹³ دِمِّه کِجِه مُونّی، اوجِه گه شیطانی پادشاهی ای تختِ. با هَین وجود، می اِسمِ قائِم بَچِسبِسی، و حتی هون روزایی دِلِه گه آنتیپاس، می هون وفادارِ شاهد گه شِمِه میِن، اوجِه گه شیطان مونِّه، وِرِه بَکوشتِنِه، ایمونی گه مِنِه داشتی رِه هَشا نَکِشی.

¹⁴ «ولی مِن، یَه کَم شکایَت تیجا دارمِه: اوجِه بعضیارِه دارنی گه بَلعامی تعلیمِ بَچِسبِسِنِه؛ هَمونی گه بالاقِ یاد هادا گه اسرائیلی قومی پِش سنگی ووئه گه دیم بَخاردنی باعث وونِه، تا هون غذایی گه بِتیشونی پیشکَش وونِه رِه بَخارِن و بی‌عفتی هاکِنِن.

¹⁵ و همینجورم، بعضیارِه دارنی گه نیکولاییانی دار و دَسِه ای تَعلیمِ بَچِسبِسِنِه.

¹⁶ پَس توبِه هاکِن، و اِلا خِیلی زود تی وَر اِمِه و شی دِهِنی شَمشیری هَمرا وِشونی علِیه جَنگ کِمِّه.

¹⁷ «اونگه گوش دارنِه بِشنُئِه گه خِدایی روح کلیساهارِه چی گِنِه. هر کی گه پیروز بَوو، هون جابَدا ’مَنّایی‘ جا وِرِه دِمِه و یَتِه اِسبی سَنگ وِرِه دِمِه، گه وی سَر یَتِه جدیدِ اِسم بَنوِشت بَوِه گه هیچکَس هونِه نَئُونِه، بِجِز کسی گه اونِه گیرنِه.

مَسیحی پِیغِم تیاتیرایی کلیسایی سِه

¹⁸ «و تیاتیرایی کلیسایی فرشته ای سِه بَنویس: «خِدایی ریکا گه وی چِش تَشی اَلوکِ مونِّه و وی لینگ هِتی مفرقی گه سو سو زَنِّه ای تَرائه، هَینجور گِنِه:

¹⁹ مِن تی کارایی جا، تی مِحَبت و ایمون و خِدمَت و صبر و تَحمِلی جا خَوَر دارمِه، و دِمِّه گه تی آخرین کارا، تی اَوّلین کارایی جا ویشتَرِ.

²⁰ ولی هَین شکایَتِ تیجا دارمِه، هون زَنا گه وی اِسم ایزابلِ و شِرِه نَبیِه دِنِّه رِه، آسون گیرنی. ویگه می نوکَرِنِ تَعلیم دِنِه و از راه به دَر کِنِّه تا بی عفتی هاکِنِن و هون غذاهایی جا گه بِتیشونی پیشکَش بَوِه بَخارِن.

²¹ وِرِه مِهلَت هادامِه گه توبِه هاکِنِه، ولی وی نَخواینِه گه شی بی عفتی ای جا توبه هاکِنِه.

²² هارش، مِن وِرِه ناخِشی ای لایی دِلِه دیم دِمِه و اونانیگه وی هَمرا زِنا کِنِنِه رِه یَتِه گَتِ مِصیبَتی دِلِه دیم دِمِه، مَگِه هَینگِه وی کارایی جا، توبه هاکِنِن.

²³ و وی وَچِیلِه رِه هلاک کِمِّه. هون موقِه دِشتِ کلیساها فهمِنِنِه گه مِن اونیمِه گه دِلیشون و فِکرارِه دَکلاش وَکلاش کِمِّه و هر کِدیم از شمارِ طبقِ شِمِه کارا عوض دِمِه.

²⁴ ولی شِما بقیه، تیاتیرایی دِلِه، شِما گه هَین تَعلیمِ نَچِسبِسِنی و اونچی گه بعضیا گِنِنِه شیطانی جَلِ رازارِ یاد نیتِنی، شِمارِ گِمِه گه، شِمِه دوشی سَر ویشتَر از هین بار نِلمِه.

²⁵ فقط هَینگه اونچی گه دارِنی رِه قائِم بَچِسبین تا مِن بیئِم.

²⁶ «هر کی گه پیروز بَوو و می کارارِ تا آخر اَنجام هادِه، وِرِه اِقتدار دِمِه تا دِشتِه قومیشونی سَر حِکومت هاکِنِه،

²⁷ «و ”آهَنی عَصایی هَمرا وِشونی سَر حِکومت کِنِّه؛ و وِشونِه هِتی سِفالی پیلَکی تَرا خِرد کِنِّه،“ دِرِس، هَمونجور گه مِن شی پیری جا اِقتدار بَیتِمِه.

²⁸ و مِن صِبِی ستاره رِه وِرِه دِمِه.

²⁹ اونگه گوش دارنِه بِشنُئِه گه خِدایی روح کلیساهارِه چی گِنِه.