یوحنایِ مکاشفه 13 - کتاب مقدس به زبان مازندرانی - گویش غربی

اوّلین وحشی جانِوَر

¹ اَزما بَئیمِه یَتِه وحشی جانِوَر دریایی جا دِ دیرگا اِنِه. دَه تا شاخ و هفتا کَلِّه داشتِه، دَه تا تاج وی شاخیشونی سَر دَوِه؛ و وی هر کَلِّه ای سر یَتِه کِفرآمیزِ اِسم بَنوِشت بَوِه وِه.

² هون وحشی جانِوَر گه مِن بَئیمِه هِتی پلنگی تَرا وِه، و اَشی لینگیشون و شیری دِهِنِ داشتِه. و اژدها، شی قِدرت و شی تَخت و یَتِه گَتِ اقتدارِ وحشی جانِوَرِ هادا.

³ یَتِه از هون وحشی جانِوَری کَلِّه ها، انگار یَتِه کِشنده زَخم بَئیت وِه، ولی هون کِشندِه زخم خِب بَوِه وِه و دِشتِه زمین بِهت هاکِردِنِه و هون وحشی جانِوَری جا پیروی هاکِردنِه.

⁴ مَردِن اژدهارِه پَرَسِش کِردِنِه چون شی اقتدارِ هون وحشی جانِوَرِ هادا وِه. و هون وحشی جانِوَرم پَرَسِش کِردِنِه و گِتِنِه: «کیِه گه بَتنِّه هون وحشی جانوری تَرا ووئِه؟ کیِه گه بَتِنِّه وی هَمرا جنگ هاکِنِه؟»

⁵ یَتِه دِهِن هون وحشی جانِوَرِ هادا بَوِه تا غِرور و کِفری هَمرا گَب بَزِنِه، و وِرِه اِجازه هادا بَوِه تا چِل و دِ ماه شی اقتدارِ به کار بَیرِه.

⁶ وی شی دِهِنِ وا هاکِردِه تا خِدارِه کِفر بُئِه، کِفر بُتَن وی اِسم و اوجه گه مونِّه، یَعنی اونانیگه آسِمونی دِلِه دَرِنِه.

⁷ و هین هَم، وِرِه اِجازه هادا بَوِه گه مِقدّسینی هَمرا جنگ هاکِنِه و اونانی سَر پیروز بَوو؛ و وِرِه اقتدار هادا بَوِه تا هر طایفه، مَردِن، زِوون و قومی سَر حاکِم ووئه.

⁸ و دِشتِه اونانیگه زَمینی سَر دَرِنِه و هون وحشی جانِوَرِ پرسش کِنِنِه - یَعنی هر کَس گه وی اِسم، وَرکایی حیاتی دَفتری دِلِه بَنوِشت نَوِه، همون وَرکا گه پِش از هَینگه دِنیا خلق بَوو قِروونی بَوِه وِه.

⁹ اونگه گوش دارنِه بِشنُئِه:

¹⁰ اگه قَرار ووئه یَنَفر اَسیر بَوو، اَسیری ای سِه شونِه. اگه قرار ووئه ینفر شَمشیری هَمرا بَکوشت بَوو، وِنِه شَمشیری هَمرا بَکوشت بَوو. و هَین مقدّسینی پایداری و وِشونی ایمونِ خواینِه.

دِومّین وحشی جانِوَر

¹¹ اَزما یَت دییَر وحشی جانِوَر بَئیمِه گه زَمینی جا دیرگا اِنِه. دِتا شاخ هِتی وَرکایی تَرا داشتِه و اژدهایی تَرا گَب زووِه.

¹² وی، اوّلین وحشی جانِوَری دِشتِه اقتدارِ وی عوض به کار گیتِه، و زمین و اونانیگه زَمینی سَر دَرِنِه رِه مجبور کِردِه گه اوّلین وحشی جانِوَر گه وی کِشنده زخم خِب بَوِه وِه رِه پَرَسِش هاکِنِن.

¹³ دِوّمین وحشی جانِوَر گَتِه نِشونِه ها و معجزات نِمایش بِشتِه، جوریگه حتّی مَردِنی چِشی پِش آسِمونی جا تَش زَمینی سَر بیاردِه.

¹⁴ و هون نِشونِه ها و معجزاتی خاطری گه اجازه داشتِه هون اوّلین وحشی جانِوَری عوض به کار بَیرِه، اونانیگه زَمینی سَر دَوِنِه رِه گول بَزو و وِشونِه بُتِه یَتِه مِجَسَمِه هون وحشی جانِوَری جا بَساجِن گه شمشیری هَمرا زخمی بَوِه، ولی با هَین وجود زینِّه بَمونِسِه.

¹⁵ و وِرِه اِجازه هادا بَوِه تا هون وحشی جانِوَری مِجَسمِه رِه نَفَس هادِه تا هون وحشی جانِوَری مِجَسمِه بَتِنِّه حتّی گَب بَزِنِه و باعث بَوو اونانیگه وحشی جانِوَری مِجَسمِه رِه پَرَسِش نَکِردِنِه بَکوشت بَوون.

¹⁶ هَینجوری، دِشتِه آدمِنِ از گَت تا کِچیک، پولدار و فقیر، و نوکَر و آزادِ مجبور کِردِه تا شی راسِ دَس یا شی سالی سَر علامت بِلِن.

¹⁷ تا هیچکَس نَتِنِّه بَخرینِه یا بَروشِه، بِجز اونیگه هون علامت، یَعنی هون وحشی جانِوَری اِسم یا وی اِسمی شِمارِ رِه دارِه.

¹⁸ هَین حِکمت خواینِه. هر کی فهم دارنِه، بِل تا هون وحشی جانِوَری شِمارِ رِه حِساب هاکِنِه، چونگه هون شِمارِ اِنسونی شِمارِ هَسِّه و وی شِمارِ شِشصد و شَص و شِش هَسِّه.