فیلیپیان 1 - کتاب مقدس به زبان مازندرانی - گویش غربی

¹ پولُس و تیموتائوسی طرفی جا، مَسیحْ عیسایی نوکَرِن، دِشتِه مِقَدَّسینی سِه گه مَسیحْ عیسایی دِلِه فیلیپی شهری دِلِه دَرِنِه، ناظِرِن و شَماسِن:

² فیض و صِلح و سلامتی، اَمِه پیر، خِدا، و خِداوندْ عیسی مَسیحی طرفی جا، شِمِسِه بیِه.

دِعا و شِکر هاکِردن

³ هر وَخت گه شِمارِ شی یاد اُرمِه، شی خِدارِه شِکر کِمِّه

⁴ دِشتِه شی دِعاهایی دِلِه هَمِش، شِما هَمه ای سِه خِشالی ای هَمرا دِعا کِمِّه،

⁵ هون همکاری ای سِه گه مسیحی اِنجیلی کاری دِلِه، از اوَّلین روز تا اَمرِز، شریک وِنی.

⁶ و مِن مِطمئنمِه اونیگه شِمِه دِلِه خِبِ کارِ شِرو هاکِردِه، اونِه تا مَسیحْ عیسایی دَگِرسنی روز به آخر رَسانِّه.

⁷ مِن هَین حقِّ دارمِه گه شِما هَمه ای خَوَری هَینجور حِسّی دارِم، چونگه می دِلی دِلِه جا دارِنی، چون شِما هَمه می هَمرا خِدایی فیضی دِلِه شریکِنی، هَم می زیندون دَکِتنی دِلِه، هَم اِنجیلی دِفاع هاکِردَنی جا، و هَم اونی حَیقتِ ثابت هاکِردن.

⁸ چون خِدا می گِواهِ گه چِتی اون احساساتی هَمرا گه مَسیحْ عیسایی جا سرچشمِه گیرنِه، شِما هَمه ای مِشتاقمِه.

⁹ و می دِعا هَینِه گه شِمِه مِحبت ویشتَر و ویشتَر بَوو، معرفت و فهم کاملی هَمرا ووئِه،

¹⁰ تا بَتِنّین اونچی گه بِهتَرینِ قَبول هاکِنین، و مسیحی روزی دِلِه پاک و بی‌عیب ووئین.

¹¹ صالِحی ای ثمره ای جا پِر بَووئین گه عیسی مَسیحی طریقی جا، خِدایی جلال و حمد و ثنا هاکِردنی سِه ختم وونِه.

اِنجیلی تَرَقی هاکِردَن

¹² اِی بِرارِن، خوایمِه دِنّین اونچی گه می سَر بیمو، در اَصل اِنجیلی تَرَقی ای باعث بَوِه،

¹³ هون جوریگه دِشتِه سلطنتی کاخی نِگَهوونِن و هَمه ای سِه معلوم بَوِه گه مِن مَسیحی خاطری زیندونی دِلِه دَرمِه؛

¹⁴ و می زیندون دَکِتَن باعث بَوِه گه ویشتَرِ بِرارِن، خِداوندی دِلِه وِشونی دِل قَویتر بَوو تا دِشتِه جِرأتی هَمرا، بی تَرس خِدایی کَلامِ بُئِن.

¹⁵ بعضیا حَسودی و چِش و هَم چِشی ای سَر مَسیحِ موعظِه کِنِنِه، ولی بعضیا خِبِ نیَّتی هَمرا.

¹⁶ هون دِوّمی دَسِه مِحبتی جا هَینجور کِنِنِه، چون دِنِنِه گه مِن اِنجیلی دِفاع هاکردنی سِه مِنِه ایجِه بِشتِنِه.

¹⁷ ولی هون اوّلین دَسِه چِش و هَم چِشمی ای سَر مَسیحِ موعظه کِنِنِه، نا خِبِ نیّتی هَمرا، چون خیال کِنِنِه گه می عذابارِه زیندونی دِلِه ویشتَر کِنِنِه.

¹⁸ پس چی؟ مِهم هَینِه گه هر جور وونِه، مَسیح اعلام بَوو، چی دِرِسِ نیّتی هَمرا ووئِه، چی نادِرِس نیّتی هَمرا! هَینِسه مِن خِشالی کِمِّه. اَرِه، اَی هَم خِشالی کِمِّه،

¹⁹ چون دِمِّه گه شِمِه دِعاها و عیسی مسیحی روحی کِمکی هَمرا، هَین می آزاد بَووئنی سِه خَتم وونِه،

²⁰ هَمونجور گه اشتیاقی هَمرا اِنتِظار کَشِمِه و اِمید دارمِه گه هیچی ای دِلِه شَرمندِه نَوومِه، بَلگی جِرأتِ کاملی هَمرا، اَلَن هَم، هَمیشه ای تَرا، چی بَمِردَن و چی زندگی ای دِلِه، مسیح می تَنی دِلِه جَلال گیرنِه.

²¹ چون زندگی میسِه مَسیحِ و بَمِردَن میسِه سود

²² اگه قَرارِ شی زندگی رِه هَین تَنی دِلِه اِدامِه هادِم، هَین میسِه یَتِه پِر ثَمرِ کار هَسِّه. با هین وجود نَتِمِّه بُئِم کِدیمِه اِنتخاب هاکِنِم!

²³ هَین دِتایی مین بَدجور دِ جَنگِمِه: چونگه آرزو دارمِه هَین دِنیایی جا بورِم و مَسیحی هَمرا دَووم، چون هَین خِیلی بهتَرِ.

²⁴ ولی می بَمونِسَن جسمی دِلِه شِمِنِه واجِب تَرِ.

²⁵ چونگه هَینی جا مِطمئنمِه، دِمِّه گه شِمِه تَرَقی و خِشالی ای سِه، ایمونی دِلِه زینِّه مُومِّه و شِما هَمه ای هَمرا اِدامِه دِمِه،

²⁶ تا وختی گه یَکَش دییَر شِمِه وَر بیئِم، شِمِه افتخار مَسیحْ عیسایی دِلِه می خاطری ویشتَر و ویشتَر بَوو.

²⁷ فقط بِلین شِمِه زندگی ای رَوش، مسیحی اِنجیلی لایق ووئه، اونجور گه چی بیئِم و شِمارِ بَوینِم و چی نیئِم، شِمِه جا بِشنُئِم گه یَتِه روحی دِلِه پابرجانی و یَتِه فِکری هَمرا اِنجیلی ایمونی سِه، دوش به دوش هَم تَقَّلا کِنِنی،

²⁸ و هیچی ای دِلِه اونانی جا گه شِمِه علِیه مونِّنِه تَرسی نارِنی. هَین وِشونی سِه یَتِه معلومِه نِشونِه هلاکتی سِه هَسِّه، ولی شِمِسِه نِجاتی نِشونِئِه، و هَین خِدایی جائِه.

²⁹ چون هَین افتخار شِمِه قِسمَت بَوِه گه نا فقط مَسیحِ ایمون بیارین، بَلگی اونیسِه رنج هَم بَکِشین.

³⁰ شِمِنِه هَم هَمون جنگیِه گه مِنِه اونی دِلِه بَئینی و اَلَنَم اِشنُنِنی گه حَلا هَم اونی هَمرا سَر و کَلِّه زَمِّه.