مَرقُس 7 - کتاب مقدس به زبان مازندرانی - گویش غربی

دِلی پاکی

¹ عِلَمای فِرقِه فَریسی بعضی از توراتی مَلِّمِنی هَمرا گه اورشلیمی شَهری جا بیمو وِنِه، عیسایی وَر جَم بَوِنِه.

² وِشون بَئینِه گه عیسایی بعضی از شاگِردِن نَجِسِ دَسی هَمرا، یَعنی نَشوردِ دَسی هَمرا، غذا خارِنِه.

³ فَریسیِن و دِشتِه یَهودیِن، طِبقِ مشایخی رَسم و رسوم، تا شی دَسِ خِب نَشورِن، غذا نَخارِنِه.

⁴ وختی بازاری جا اِنِنِه، تا دَشور بَشور نَکِنِن هیچی نَخارِنِه. هَمینجور هَم خِیلی رَسم و رُسومای دییَرِ هَم اَنجام دِنِنِه. هِتی پیالِه و لَوی و مِرسی کاس کَچِه و میزی بَشوردَنِه.

⁵ فَریسیِن و توراتی مَلِّمِن عیسایی جا بَپُرسینِه: «چه تی شاگِردِن طبقِ مَشایخی رَسم و رسوم رَفتار نَکِنِنِه و نَجِسِ دَسی هَمرا غذا خارِنِه؟»

⁶ عیسی وِشونِه بُتِه: «اِشعیای پِیغَمبر شِما دُروئِنی سِه چَنی خِب پِشگویی هاکِردِه! هَمونجور گه بَنوِشت بَوِه: «‌”هین قوم شی زِوونی هَمرا مِنِه حِرمَت اِلِنِه، ولی وِشونی دِل میجا دورِ.

⁷ وِشون بیخِدی مِنِه پَرَسِش کِنِنِه، و وِشونی تَعلیم فقط اِنسونی حِکمِ.“

⁸ شِما خِدایی حِکمِ وِل کِنِنی و آدَمی ای رَسم و رُسومی کَش بَچسبِسِنی.»

⁹ و وِشونِه بُتِه: «شِما زِرَنگی ای هَمرا خِدایی حِکمِ رَد کِنِنی تا شی رسم و رسومِ دارین!

¹⁰ چون موسای پیغمبر بُتِه: ”شی پیر و مارِ اِحترام بِل،“ و ”هر‌ کی شی پیر یا مارِ ناسِزا بُئِه، حتماََ وِنِه وِرِه بَکوشتَن.“

¹¹ ولی شِما گِنِنی: ”اگه یَنَفر شی پیر یا مارِ بُئِه: 'هر کِمَکی گه شِمارِ وِسِه هاکِنَم، خِدایی کاری سِه وَقف هاکِردِمِه'“

¹² هَینجوری شِما دِ نِلِنی وی هیچ کاری شی پیر یا ماری سِه هاکِنِه.

¹³ هَینجوری شِما شی رَسم و رُسومی هَمرا، گه اونِنِه بَقیِه رِه هَم گِنِنی، خِدایی کَلامِ نَدید گیرِنی و زیاد هَینجور کارا کِنِنی.»

¹⁴ عیسی یَکَش دییَر مَردِنِ شی کَفا بَخونِسِه و وِشونِه بُتِه: «شِما هَمه می گَبِ گوش هادین و هَینِ بِفَهمین:

¹⁵ هیچی دَنیِه گه دیرگایی جا آدَمی ای وجودی دِلِه بورِه و بَتِنِّه وِرِه نَجِس هاکِنِه. بَلگی هون چیایی گه آدَمی ای وِجودی جا دیرگا اِنه وِرِه نَجِس کِنِّه.

¹⁶ هر‌ کی گوشِ شِنَوا دارنِه، بِشنُئِه!»

¹⁷ عیسی بعد از اونگه جَماعَتِ ترک هاکِردِه و خِنِه بیمو، وی شاگِردِن هون مَثَلی معنی رِه ویجا بَپرسینِه.

¹⁸ عیسی وِشونِه بُتِه: «شِما هَم نِفَهمِنِنی؟ مَگِه نَئونِنی اونچی گه دیرگایی جا آدَمی ای وجودی دِلِه اِنِه نَتِنِّه وِرِه نَجِس هاکِنِه؟

¹⁹ چون وی دِلی دِلِه نَشونِه، بَلگی وی خیکی دِلِه شونِه و اَزما دَفع وونِه.» عیسی شی هَین گَبی هَمرا، بُتِه گه دِشتِه غذائیشون پاکِنِه.

²⁰ عیسی بُتِه: «اونچی گه آدَمی ای وجودی جا دیرگا اِنِه، اونِه گه آدَمی ره نَجِس کِنِّه.

²¹ چون آدَمی ای وجود و دِلی جائِه گه پلیدِ خیال، فاسِقی، دِزّی، قتل، زِنا،

²² طَمع، شِرارَت، حیلِه، هَرزِگی، حَسودی، تِهمَت، غِرور و نِفَهمی دیرگا اِنِه.

²³ دِشتِه هَین بَدِ چیائِه گه آدَمی ای وجودی جا دیرگا اِنِه و وِرِه نَجِس کِنِّه.»

فینیقیه ای زَنایی ایمون

²⁴ عیسی اوجِه رِه تَرک هاکِردِه و صور و صیدونی مَنطقه ای سِه بوردِه. یَتِه خِنِه ای دِلِه بوردِه و نَخوایسِه هیچکی خَوَردار بَوو. ولی اَی هَم نَتِنِّسِه شِرِه جاهادِه.

²⁵ یَتِه زَنا گه وی کِچیک کیجا پَلیدِ روح داشتِه، وختی عیسایی خَوَری بِشنُسِه، درجا بیمو و عیسایی لینگ دَکِتِه.

²⁶ هون زَنا غیرِیَهودی و سوریه ای فینیقیه ای جا وِه. وی عیسی رِه التماس هاکِردِه گه دِوِ وی کیجایی جا دیرگا هاکِنِه.

²⁷ عیسی هون زَنارِه بُتِه: «بِل اَوَّل وَچیلِه سِئر بَوون، چون دِرِس نیِه وَچیلِه ای نونِ بَیریم و سَگیشونی پِش دیم بَدیم.»

²⁸ ولی هون زَنا عیسی رِه بُتِه: «اَرِه، آقا، ولی حتّی سَگیشون هَم خِردِه چیایی گه وَچیلِه ای سِفرِه ای جا کَلِنِه رِه خارِنِه.»

²⁹ عیسی هون زَنارِه بُتِه: «تی هَین گَبی خاطری، بور گه دِو تی کیجایی جا دیرگا بیمو!»

³⁰ هون زَنا شی خِنِه بوردِه، و بَئیِه وی وَچِه لایی دِلِه دِراز بَکشیِه و دِو ویجا دیرگا بوردِه.

عیسی یَتِه غولِ مَردی رِه شَفا دِنِه

³¹ اَزما عیسی صوری مَنطَقِه ای جا دَگِرِسِه، و صِیدونی راهی جا جَلیلی دَریایی سِه بوردِه. وی دِکاپولیسی مَنطقِه ای جا دِ رَد وونِسِه.

³² اوجِه یَتِه مَردی رِه عیسایی وَر بیاردِنِه گه هَم غول وِه و هَم وی زِوون گیتِه. وِشون عیسی رِه اِلتِماس هاکِردِنِه شی دَسِ هون مَردی ای سَر بِلِ.

³³ عیسی هون مَردی رِه جَماعَتی جا دیرگا بَکِشیه، یَتِه گوشِه بَوِردِه و شی اَنگیسِ وی دِتا گوشی دِلِه بِشتِه. اَزما فِلیک دیم بَدا و هون مَردی ای زِوونی کَش بَزو.

³⁴ عیسی آسِمونِ هارشیِه، یَتِه آه بَکِشیِه و اون مَردی رِه بُتِه: «‌اِفّاتاح!» یَعنی «وا بَواش!»

³⁵ دَرجا هون مَردی ای گوش وا بَوِه و وی زِوون راه دَکِتِه و راحت گَب بَزو.

³⁶ عیسی وِشونِه قَدِغَن هاکِردِه گه هَین جَریانِ هیچکَسی وَر نُئِن. ولی هر چی ویشتَر وِشونِه قَدِغَن کِردِه، ویشتَر هَین جریانی جا گَب زووِنِه.

³⁷ مَردِن گه خِیلی بِهت هاکِرد وِنِه گِتِنِه: «هر کاری هاکِردِه خِبِ؛ وی حتّی غولیشونی گوش و لالیشونی زِوونِ وا کِنِّه!»