مَرقُس 6 - کتاب مقدس به زبان مازندرانی - گویش غربی

ناصِرِه ای مَردِن عیسی رِه رَد کِنِنِه

¹ عیسی اوجِه ای جا بوردِه و شی شَهری سِه بیمو. شاگِردِن هَم وی دِمال بوردِنِه.

² عیسی یهودینی مِقدَّسِ شَنبه عِبادتگاهی دِلِه بوردِه و اوجِه تعلیم داوِه. خِیلیا وختی وی گَبِ اِشنُسِنِه بِهت کِردِنِه و گِتِنِه: «هَین مَردی هَینِنِه کِجه دَری بِدَس بیاردِه؟ هَین چی حِکمتیِه گه وِرِه هادا بَوِه؟ هَین چی معجِزاتیِه گه وی اَنجام دِنِه؟

³ مَگِه وی هَمون نَجّار نیِه؟ مَگِه مریمی ریکا نیِه؟ مَگِه یَعقوب و یوشا و یَهودا و شَمعونی بِرار نیِه؟ مَگِه وی خاخِرِن هَیجِه، اَمِه میِن زندگی نَکِنِنِه؟» هَینِسه عیسایی جا نارحَت بَوِنِه.

⁴ عیسی وِشونِه بُتِه: «یَتِه پیغَمبَرِ هَمه جا حِرمَت اِلِنِه، بِجِز شی شهر و شی فامیلِن و شی خِنِوادِه ای دِلِه!»

⁵ عیسی نَتِّنِسِه اوجِه هیچ مُعجزه‌ای هاکِنِه، بِجِز هَینگه شی دَسِ چَن تا مریضی سَر بِشتِه و وِشونِه شَفا هادا.

⁶ وی وِشونی بی ایمونی ای جا تَجِّب هاکِرد وِه. اَزما، عیسی هون مَنطقِه ای آبادی هایی دِلِه گِرِسِه و مَردِنِ تعلیم داوِه.

عیسی دِوازِه رسولِ رَسانِّه

⁷ عیسی شی دِوازِه شاگِردِ کَفا بَخونِسِه و اونانِه دِتا دِتا بَرِسانیِه و وِشونِه قدرَت و اختیار هادا تا پَلیدِ اَرواحِ مردِنی جا دیرگا هاکِنِن.

⁸ عیسی وِشونِه قَدِغَن هاکِردِه تا: «سَفَری سِه، هیچی جُز یَتِه دَس چو شی هَمرا نَیرِن؛ نا نون، نا کِلوار، نا شی کَمَر قیشی دِلِه ای پولِ.

⁹ شی لینگ کُوش دَکِنین، ولی اِضافِ جِمِه نَکِنین.

¹⁰ عیسی اَی هَم وِشونِه بُتِه وختی یَتِه خِنِه ای دِلِه شونِنی، تا وختی اون مَحَلی دِلِه دَرِنی، هون خِنِه ای دِلِه بَمونین.

¹¹ و اگه جایی شِمارِ قَبول نَکِردِنِه، یا شِمِه گَبِ گوش نَدانِه، وختی اوجِه ای جا شونِنی، شی لینگی گَرد و خاکِ هِلاکنین، تا وِشونی علِیه یَتِه شَهادَت ووئِه گه خدا وِشونِه مِجازات کِنّه.»

¹² پس وِشون بوردِنِه، مَردِنِ اعلام کِردِنِه گه وِنِه توبِه هاکِنِن.

¹³ وِشون یَتِخِیلی دِوهارِه مَردِنی جا دیرگا هاکِردِنِه و یَتِخِیلی مَریضِنِ روغَنی هَمرا مَسح هاکِردِنِه و شَفا هادانِه.

یحیای تَعمید دَهنده ای بَکوشتَن

¹⁴ هَین جریان هیرودیسِ پادشاهی گوش بَرِسیِه، چون عیسایی اَوازِه هَمه جا دَپیت وِه. بَعضی از مَردِن گِتِنِه: «هَین مَردی هَمون یحیای تعمید دَهندئِه گه مِردِگونی جا زینِّه بَوِه. هَینِسِئِه بَتِنِّه هَینجور مُعجِزاتی هاکِنِه.»

¹⁵ بَقیِه گِتِنِه: «‌ایلیای پیغمبرِ» بعضیا هَم گِتِنِه: «وی یَتِه پِیغَمبَر، قَدیمی پِیغَمبَرِنی تَرائِه.»

¹⁶ ولی وختی هیرودیس هَینِه بِشنُسِه، بُتِه: «هَین هَمون یحیائِه گه مِن وی کَلِّه رِه وی تنی جا سیوا هاکِردِمِه و اَلَن مِردِگونی جا زینِّه بَوِه!»

¹⁷ چون هیرودیس وِه گه دَستور هادا یحیی رِه بَیرن و وِرِه دَوِنِن و زیندونی دِلِه دیم بَدِن. هیرودیس هَین کارِ هیرودیایی خاطری هاکِرد وِه. هیرودیا، فیلیپُسی زَنا وِه گه اَلَن هیرودیس وی هَمرا عروسی هاکِرد وِه. فیلیپُس هیرودیسی بِرار وِه.

¹⁸ چون یحیی هیرودیسِ بُت وِه: «حَلال نیِه تو شی بِرار زَنی هَمرا دَووئی.»

¹⁹ پس هیرودیا، یحیایی جا کینِه داشتِه و خوایسِه وِرِه بَکوشِه، ولی نَتِنِّسِه.

²⁰ چون هیرودیس یحیایی جا تَرسیِه. چونگه دِنِسِه یحیی صالِح و مِقَدَّسِ مَردیِه، هَینِسه وِه گه ویجا مِحافِظَت کِردِه. هر وَخت یحیایی گَبِ اِشنُسِه، خِیلی پَریشون وونِسِه. ولی حَلا هَم خِشالی ای هَمرا وی گَبِ گوش داوِه.

²¹ هیرودیا سَرآخَر یَتِه فِرصت بَنگیتِه. هیرودیس شی زاد روزی سِه یَتِه مِهمونی بَیتِه و دَرباریِن و شی لَشگری فرموندهِن و جَلیلی مَنطقِه ای گَت گَتِه ایشونِه دَعوَت هاکِردِه.

²² هیرودیایی کیجا مِجلِسی دِلِه بیمو سَما هاکِردِه و هیرودیس و وی مِهمونِنِه خِشال هاکِردِه. اَزما پادشاه کیجا رِه بُتِه: «هر چی دوس دارنی میجا بَخوا گه تِرِه دِمِه.»

²³ وی قَسَم بَخاردِه و کیجارِه بُتِه: «هر چی میجا بَخوای تِرِه دِمِه حتّی اگه می مملکتی نِصفِ هَم بَخوای، تِرِه دِمِه.»

²⁴ کیجا دیرگا بوردِه و شی مارِ بُتِه: «چی بُئِم؟» وی مار بُتِه: «بُو یحیایِ تَعمید دَهندِه ای کَلِّه رِه خوایمِه.»

²⁵ کیجا دَرجا عَجَلِه ای هَمرا پادشاهی وَر دَگِرِسِه و بُتِه: «تیجا خوایمِه اَلَن یحیایِ تَعمید دَهندِه ای کَلِّه رِه یَتِه مَجیمِه ای دِلِه مِنِه هادی.»

²⁶ پادشاه خِیلی نارحَت بَوِه، ولی شی قَسَمی خاطری و شی مِهمونِنی حِرمتی سِه نَخوایسِه کیجایی خواسِّه رِه رَد هاکِنِه.

²⁷ پادشاه دَرجا یَتِه جَلاد بَرِسانیِه و دستور هادا یَحیایی کَلِّه رِه بیارِه. جَلاد بوردِه و زیندونی دِلِه یَحیایی کَلِّه رِه وی تَنی جا سیوا هاکِردِه

²⁸ و وی کَلِّه رِه یَتِه مَجیمِه ای دِلِه بیاردِه و کیجارِه هادا. کیجا هَم اونِه شی مارِ هادا.

²⁹ وختی یَحیایی شاگِردِن هَینِه بِشنُسِنِه، بیمونِه و وی جِنازِه رِه بَیتِنِه و مقبره ای دِلِه بِشتِنِه.

عیسی پَنج هزار نَفرِ غذا دِنِه

³⁰ رَسولِن عیسایی وَر دَگِرِسِنِه و هر چی گه هاکِرد وِنِه و تعلیم هادا وِنِه رِه وِرِه بُتِنِه.

³¹ عیسی وِشونِه بُتِه: «می هَمرا یَتِه خلوتِ جا بیئِین و اَقَدّی دَم بَخارین.» چون اَنّی مَردِن ایمونِه و شیوِنِه گه وِشون حتّی نَتِنِسِنِه هیچی بَخارِن.

³² پَس تَنیایی، لوتکایی هَمرا یَتِه خلوتِ جا بوردِنِه.

³³ ولی وختی دِ شیوِنِه، خِیلیا وِشونِه بَئینِه و بِشناسینِه. و مردِن دِشتِه شَهرایی جا پیادِه اون محلی سِه دُو هاکِردِنِه و وشونی جا پِشتَر اوجِه بَرِسینِه.

³⁴ وختی عیسی لوتکایی جا جِر بیمو، یَتِخِیلی اِزدِحام بَئیِه و وی دِل وِشونی سِه بَسوتِه، چون هِتی بی چَپونِ گِسَنی تَرا وِنِه. پس خِیلی چیارِه وِشونِه تعلیم هادا.

³⁵ غِروب دَم، وی شاگِردِن وی وَر بیمونِه و بُتِنِه: «هَیجِه دیرشِر جائِه و دِ شُو وونِه.

³⁶ مَردِنِ راهی هاکِن تا دُور و وَری زَمی و آبادیهایی دِلِه بورِن و یَچی شی بَخاردَنی سِه بَخرینِن.»

³⁷ ولی عیسی وشونِه بُتِه: «شِما شِه یَچی وِشونِه هادین تا بَخارِن.» بُتِنِه: «خواینی بوریم و دِویس دیناری اَنِّا نون بَخرینیم و وِشونه هادیم تا بَخارِن؟»

³⁸ عیسی وِشونِه بُتِه: «چَن تا نون دارِنی؟ بورین و هارشین.» وِشون بعد از هَینگه خَوَر بَیتِنِه بُتِنِه: «پَنج تا نون و دِتا مائی.»

³⁹ اَزما عیسی شی شاگِردِن دستور هادا تا دِشتِه مَردِنِ دَسِه دَسِه هاکِنَن و واشی سَر هِنیشانِن.

⁴⁰ هَینجوری شاگِردِن، مَردِنِ صد تایی و پنجاه تایی دَسِهایی دِلِه بِنِه ای سَر هِنیشانینِه.

⁴¹ اَزما عیسی پَنج تا نون و دِتا مائی رِه بَیتِه و آسِمونِ هارشیِه و شِکر هاکِردِه. نونیشونِه گِلی هاکِردِه و شی شاگِردِنِه هادا تا مَردِنی پِش بِلِن، دِتا مائی رِه هَم، هَمه ای میِن رَسَد هاکِردِه.

⁴² دِشتِ وِشون بَخاردِنِه و سِئر بَوِنِه،

⁴³ وختی شاگِردِن اضاف بیمو نون گِلی و خِردِه مائی ایشونِه جَم هاکِردِنِه دِوازِه تا زَمبیل پِر بَوِه.

⁴⁴ هون مَرداکِنِنی گه نون بَخاردِنِه پَنج هِزار نَفر وِنِه.

عیسی اُوئی سَر راه شونِه

⁴⁵ دَرجا عیسی شی شاگِردِنِه بَرسانیِه تا هَمونجور گه وی جماعتِ مِرخَص کِنِّه، یَتِه لوتکا سِوار بَوون و ویجا پِشتر بیت صِیدایی شهری سِه، گه دَریایی اون دَس وِه بورِن.

⁴⁶ عیسی بعد از هَینگه جماعتِ راهی هاکِردِه، شِه کوهی سِه بوردِه تا دِعا هاکِنِه.

⁴⁷ وختی شُو بَوِه، لوتکا دَریایی میِن بَرِسیِه و عیسی خِشکی ای دِلِه تنیا وِه.

⁴⁸ عیسی بَئیِه گه شاگِردِن زحمتی هَمرا پارو زَنِنِه، چون بَرعکسِ وا زووِه. حِدودِ ساعت سِه نِصف شُو عیسی هَمونجور گه دریایی سَر راه شیِه وِشونی سَمت بوردِه و خوایسِه هونِنی وَری جا رَد بَوو.

⁴⁹ ولی وختی شاگِردِن عیسی رِه بَئینِه گه دریایی سَر راه شونِه، گِمون هاکِردِنِه یَتِه روحِ. و داد بَزونِه،

⁵⁰ چون دِشتِه وِشون وی بَئیَنی جا وحشت هاکِرد وِنِه. ولی عیسی دَرجا وِشونی هَمرا گب بَزو و بُتِه: «هول نَخارین، مِنِمِه. نَتِرسین!»

⁵¹ اَزما لوتکایی دِلِه وِشونی وَر بوردِه و وا هِرِسا. وِشون بدجور بِهت هاکِرد وِنِه

⁵² چون نونیشونی مُعجِزِه رِه نِفَهمِس وِنِه، بلگی وِشونی دِل سَنگ بَوِه وِه.

عیسی مَریضِنِ جِنیسارتی دِلِه شَفا دِنِه

⁵³ وختی اُوئی اون دَس بَرِسینِه، جِنیسارتی مِلکی دِلِه بیمونِه و هَموجِه لَنگَر دیم بَدانِه.

⁵⁴ وختی لوتکایی جا جِر بیمونِه، مَردِن دَرجا عیسی رِه بِشناسینِه.

⁵⁵ وِشون دُو هاکِردِنِه و دِشتِه اون مَنطَقِه ای دِلِه بوردِنِه و مَریضِنِ وِشونی لایی هَمرا، هَرجا گه اِشنُسِنِه عیسی اوجِه دَرِه، وَردِنِه.

⁵⁶ عیسی هر آبادی و شهر و زَمی سَری گه شیوِه، مَردِن مَریضِنِ مِیدونی سَر اِشتِنِه و ویجا خواهِش تمنا کِردِنِه گه اِجازِه هادِه تا مَریضِن فقط وی قَوایی تِکِ دَس بَزِنِن، و هر کی دَس کِردِه، شَفا گیتِه.