اِنجیلِ مَتّی 9 - کتاب مقدس به زبان مازندرانی - گویش غربی

عیسی یَتِه چِلِّخِ شَفا دِنِه

¹ عیسی لوتکا سِوار بَوِه و دَریایی جا رَد بَوِه و شی شَهری سِه بیمو.

² اوجِه چَن نَفَر یَتِه چِلِّخِ مَردی گه لایی دِلِه دِراز بَکِشی وِه رِه وی وَر بیاردِنِه. وختی عیسی وِشونی ایمونِ بَئیِه، هون چِلِّخِ بُتِه: «می ریکا، تی دِل قِرص ووئِه؛ تی گِناهِن بیامِرزی بَوِه!»

³ دَرجا، چَن نَفَر از توراتی مَلِّمِن شی وَر بُتِنِه: «هَین مَردی کِفر گِنِه.»

⁴ عیسی گه دِنِّسِه وِشونی دِلی دِلِه چی گِذِرنِه بُتِه: «چه شی دِلی دِلِه پَلیدِ فِکر دارِنی؟

⁵ کِدیم آسون تَرِه: هَینگه بُئی ”تی گِناهِن بیامِرزی بَوِه،“ یا هَینگه بُئی ”پِرِس و راه بور؟“

⁶ ولی تا دِنّین اِنسونی ریکا هَین قدرَتِ دارنِه گه زَمینی سَر گِناهِنِ بیامِرزِه.» اَزما هون چِلِّخِ بُتِه: «پِرِس، شی لارِه جَم هاکِن و شِی خِنِه بور.»

⁷ هون مَردی پِرِسا و شی خِنِه بوردِه.

⁸ مَردِن وختی هَین مُعجِزِه رِه بَئینِه، بَترِسینِه و خِدارِه شِکر هاکِردِنِه گه هَینجور قِدرتی آدَمِنِ هادا.

عیسی مَتّی رِه دَعوَت کِنِّه

⁹ عیسی اوجِه رِه بِگذِشتِه و راهی دِلِه یَتِه مَردی گه وی اِسم مَتّی وِه رِه بَئیِه گه خَراجگیرِ دَکِّه ای دِلِه نیشت وِه. عیسی وِرِه بُتِه: «می دِمال بِرِه!» مَتّی پِرِسا و وی دِمال بوردِه.

¹⁰ روزی گه عیسی مَتّی ای خِنِه ای دِلِه سِفرِه ای سَر نیشت وِه یَتِخِیلی خراجگیرِن و گِناهکارِن بیمونِه و عیسی و وی شاگِردِنی هَمرا یَتِه سِفرِه ای سَر هِنیشتِنِه.

¹¹ وختی عِلَمای فِرقِه فَریسی هَینِه بَئینِه، عیسایی شاگِردِنِ بُتِنِه: «چه شِمِه اِسّا خراجگیرِن و گِناهکارِنی هَمرا غَذا خارنِه؟»

¹² عیسی وِشونی گَبِ بِشنُسِه و بُتِه: «مَریضِنِنِ گه طَبیب احتیاج دارِنِه، نا سالِمِ آدَمِن.

¹³ بورین و خِدایی هَین کَلامی مَعنی رِه بِفَهمین ”مِن رَحمت خوایمِه نا قِروونی.“ چون مِن نیمومِه تا صالِحِنِ دعوت هاکِنَم، بَلگی بیمومِه تا گِناهکارِنِ دعوت هاکِنِم.»

یحیایی شاگِردِنی سوال

¹⁴ یحیایی شاگِردِن عیسایی وَر بیمونِه و بُتِنِه: «چه اَما و عِلَمای فَریسی روزِه گیرمی ولی تی شاگِردِن روزِه نَئیرِنِه؟»

¹⁵ عیسی وِشونِه بُتِه: «اِنتِظار دارِنی زِمایی رَفیقِن اون موقِه گه زِما وِشونی هَمرا دَرِه ماتَم بَیرِن؟ موقِه ای اِنِه گه زِما وِشونی جا بَئیت وونِه؛ اون موقِه روزِه گیرِنِه.

¹⁶ «هیچکی اُو نَشی و نُو چِلوارِه پیتِه جِمِه ای کَش پینَک نَزِنِّه. اگه هَینجور هاکِنِه، پینَک جِمِه ای جا بَکّنی وونِه، نُو چِلوار پیتِه جِمِه ای جا سیوا وونِه و هون گِلی قَبلَنی جا بَدتر وونِه.

¹⁷ تازِه شَرابِ هَم پیتِ پوسی خیکیشونی دِلِه نَریزِنِنِه، اگه بَریزِن پوسی خیکیشون تِرکِنِه و شراب دیرگا ریزِنِه و پوسی خیکیشون از بیِن شونِنِه. تازِه شَرابِ نُو پوسی خیکیشونی دِلِه ریزِنِنِه تا هَم شراب و هَم پوسی خیکیشون سالِم بَمونِن.»

یَتِه کیجایی زینِّه هاکِردَن و یَتِه زَنایی شَفا هادائَن

¹⁸ عیسی حَلا دِ گَب زووِه گه یَتِه از یَهودیِنی رَئیس وی وَر بیمو و زِنی بَزو و بُتِه: «می کیجا هَمین اَلَن بَمِردِه. ولی دِمِّه اگه تو بیئِی و وی سَر دَس بِلی وی زینِّه وونِه.»

¹⁹ عیسی پِرِسا و وی هَمرا بوردِه و وی شاگِردِن هَم وی دِمال راه دَکِتِنِه.

²⁰ هَمون موقِه، یَتِه زَنا گه دِوازدَه سال خونریزی داشتِه عیسایی دِمال سَر بیمو و وی قَوایی تِکِ دَس هاکِردِه.

²¹ چون شی وَر گِتِه: «اگه فقط بَتِنِّم وی قَوارِه دَس هاکِنِم، شَفا گیرمِه.»

²² عیسی دَگِرِسِه هون زَنارِه هارشیِه و بُتِه: «می کیجا نَتِرس، تی ایمون تِرِه شَفا هادا.» هَمون دَم وی شَفا بَیتِه.

²³ وختی عیسی هون رَئیسی خِنِه بَرِسیِه و نوحِه خونیشون و مَردِنی شیوَن و زاری رِه بَئیِه،

²⁴ بُتِه: «دیرگا بورین. هَین کیجا نَمِردِه بَلگی بَفِتِه.» ولی وِشون فقط وی سَر بَخِنِسِنِه.

²⁵ وختی عیسی مَردِنِ دیرگا هاکِردِه، اِتاقی دِلِه بوردِه کیجایی دَسِ بَیتِه و کیجا پِرِسا.

²⁶ هَین اِتِّفاقی خَوَر دِشتِه هون مَنطَقِه ای دِلِه دَپیتِه.

عیسی دِتا کورِ شَفا دِنِه

²⁷ وختی عیسی اوجِه رِه دِ شیوِه، دِتا کور وی دِمال بوردِنِه و داد زووِنِه: «اِی داوودی ریکا، اَمارِه رَحم هاکِن!»

²⁸ وختی عیسی خِنِه ای دِلِه بوردِه، هون دِ نَفر وی وَر بیمونِه. عیسی وِشونِه بُتِه: «ایمون دارِنی گه مِن بَتِمِّه هَین کارِ اَنجام هادِم؟» وِشون بُتِنِه: «اَرِه آقا!»

²⁹ پَس عیسی وِشونی چِشِ دَس بَکِشیِه و بُتِه: «طِبقِ شِمِه ایمون شِمِنِه اَنجام بَوو.»

³⁰ و وِشونی چِش وا بَوِه. عیسی وِشونِه هِشدار هادا و بُتِه: «مواظِب ووئین هیچکی هَین جریانی جا خَوَردار نَوو.»

³¹ ولی هَمین گه خِنِه ای جا دیرگا بوردِنِه، عیسایی اَوازِه رِه دِشتِه هون مَنطَقِه ای دِلِه پَخش هاکِردِنِه.

عیسی لالِ مَردی رِه شَفا دِنِه

³² وختی گه هون دِ نَفر دیرگا شیوِنِه، یَنَفَرِ عیسایی وَر بیاردِنِه گه لال وِه، چون دِوبَزِه وِه.

³³ عیسی دِوِ ویجا دیرگا هاکِردِه و وی زِوون وا بَوِه. مَردِن هَین مُعجِزِه ای جا خِیلی بِهت هاکِردِنِه، بُتِنِه: «تا اَلَن اسرائیلی قومی دِلِه هیچ وخت هَمچین چیزی بَئی نَوِه!»

³⁴ ولی عِلَمای فِرقِه فَریسی بُتِنِه: «وی دِویشونِه، دِوی رَئیسی کِمَکی هَمرا دیرگا کِنِّه.»

مَحصول زیاد و کارگَر کَم

³⁵ عیسی دِشتِه شَهر و دِهیشونی دِلِه گِرِسِه و یَهودیِه ای عبادتگاهی دِلِه تعلیم داوِه و خِدایی پادشاهی ای مِژدِه رِه اِعلام کِردِه و هر جور ناخِشی و مَرَضِ شَفا داوِه.

³⁶ وختی عیسی اَنّی اِزدِحامِ بَئیِه وی دِل وِشونی سِه بَسوتِه، چون وِشون بی چَپونِ گِسَنی تَرا پَریشون و وا بَمونِس وِنِه.

³⁷ پَس شی شاگِردِنِ بُتِه: «مَحصول زیادِ و كارگَر کَم.

³⁸ پس، شِما وِنِه صاب مَحصولی جا دَرخواس هاکِنین شی مَحصولی جَم هاکِردَنی سِه کارگَرِنی بَرِسانِّه.»