اِنجیلِ مَتّی 4 - کتاب مقدس به زبان مازندرانی - گویش غربی

اِبلیس عیسی رِه آزمود کِنِّه

¹ اَزما روح القُدُس، عیسی رِه صَحرایی دِلِه بَوِردِه تا اِبلیس وِرِه وَسوَسِه هاکِنِه.

² عیسی چهل شُو و چِهل روز روزِه بَیتِه و سَرآخَر وَشنی بَوِه.

³ اونوَخت وَسوَسِه گَر وِرِه نَزیک بَوِه و بُتِه: «اگه تو خِدایی ریکا هَسّی، هَین سَنگیشونِ بُو نون بَوو.»

⁴ عیسی وی جِواب بُتِه: «توراتی دِلِه بَنوِشت بَوِه: «”اِنسون فَقَط نونی هَمرا زینِّه نیِه، بَلگی هر کَلامی گه خِدایی دِهِنی جا دیرگا اِنِه.“»

⁵ اَزما اِبلیس وِرِه مِقَدّسِ شهری دِلِه بَوِردِه و یَهودِینی گَتِه مَعبَدی تِک بِشتِه

⁶ و وِرِه بُتِه: «اگه تو خِدایی ریکا هَسّی، شِرِه ایجِه ای جا جِر اِنگِن، چون مزامیری کیتابی دِلِه بَنوِشت بَوِه: «”خِدا شی فِرشتِگونِ دَستور دِنِه و وِشون تِرِه شی دَسی سَر گیرِنِه تا نَکِنِه تی لینگ سَنگی کَش بَخارِه.“»

⁷ عیسی جِواب هادا: «هَین هَم توراتی دِلِه بَنوِشت بَوِه گه: «”خِداوَند شی خِدارِه آزمود نَکِن.“»

⁸ یَکَش دییَر، اِبلیس وِرِه گَتِه کوهی سَر بَوِردِه و دِشتِه دِنیایی مَملِکتی شِکوهِ وِرِه هَم هادا

⁹ و عیسی رِه بُتِه: «اگه می پِش زِنی بَزنی و مِنِه پَرَسِش هاکِنی، دِشتِه هَینِن تِنی وونِه.»

¹⁰ عیسی اِبلیسِ بُتِه: «دور بَواش اِی شِیطان! توراتی دِلِه بَنوِشت بَوِه: «”خِداوَند، شی خِدارِه وِنِه پَرَسِش هاکِنی و فَقَط وِرِه خِدمَت هاکِنی.“»

¹¹ اَزما اِبلیس عیسی رِه وِل هاکِردِه و فِرشتِگون بیمونِه و وِرِه خِدمَت هاکِردِنِه.

عیسی شی خِدمَتِ شِرو کِنِّه

¹² وختی عیسی بِشنُسِه یحیی رِه هماسینِه، جَلیلی سِه بوردِه.

¹³ و ناصِره ای شَهری دِلِه نَمونِسِه، بَلگی كَفَرناحوم بوردِه و اوجِه زندِگی هاکِردِه. کَفَرناحوم جَلیلی دَریایی وَر و زِبولون و نَفتالی ای مَنطقِه ای دِلِه وِه.

¹⁴ هَین كاری هَمرا اِشعَیای پِیغَمبری گَب اَنجام بَرِسیِه گه بُت وِه:

¹⁵ «زِبولونی مِلک و نَفتالی ای مِلک، گه دَریایی راهی سَر و اُردُنی اون دَس دَرِنی، جَلیلِ مِلَتها،

¹⁶ قومی گه زِلِمادی دِلِه دَوِنِه، یَتِه گَتِه نور بَئینِه، و وِشون گه مِلک و مرگی سایه ای دِلِه دَوِنِه، وِشونی سِه روشِنایی بَتابِسِه.»

¹⁷ عیسی اَزون روز تعلیم هادائَنِ شِرو هاکِردِه و گِتِه: «توبِه هاکِنین، چون آسِمونی پادشاهی گه خِدا وی حاکِمِ نَزیکِ!»

عیسی شی اَوَّلین شاگِردِنِه دَعوَت کِنِّه

¹⁸ وختی عیسی جَلیلی دَریالُو قَدَم زووِه، بَئیِه دِتا بِرار یَعنی شَمعونِ مِلَقَّب به پِطرُس و وی بِرار آندریاس، دَریایی دِلِه تور دیم دِنِنِه، چون وِشون مائیگیر وِنِه.

¹⁹ عیسی وِشونِه بُتِه: «می دِمال بیئِین تا شِمارِ مَردِنی صیّاد هاکِنِم.»

²⁰ اون دِتا بِرار شی تورِ دَرجا بِشتِنِه و وی دِمال بوردِنِه.

²¹ عیسی اَقَدّی پِشتَر بوردِه و دِتا بِرارِ دییَر یَعنی یعقوب، زِبِدی ای ریکا و وی بِرار یوحنا رِه بَئیِه گه شی پیر زِبِدی ای هَمرا لوتکایی دِلِه نیشت وِنِه و دِ شی تورِ دِرِس کِردِنِه. عیسی وِشونِه هَم بُتِه می دِمال بیئِین،

²² وِشون دَرجا لوتکا و شی پیرِ وِل هاکِردنِه و وی دِمال بوردِنِه.

عیسی جَماعَتِ زیادی رِه خِدمَت کِنِّه

²³ عیسی دِشتِه جَلیلی دِلِه گِرِسِه و یَهودیِنی عِبادَتگاهی دِلِه تعلیم داوِه و خِدایی پادشاهی رِه اِعلام کِردِه و مَردِنی مَرَض و ناخِشی رِه شَفا داوِه.

²⁴ عیسایی شِهرَت دِشتِه سوریه ای دِلِه دَپیتِه و دِشتِه اونانیگه هر جور دَرد و مَرَضی دِچار وِنِه، و اونانیگه دِوبَزِه وِنِه و غَشگری داشتِنِه، و چِلِّخیشونِه وی وَر اُردِنِه و وی اونانِه شَفا داوِه.

²⁵ یَتِخِیلی اِزدحام جَلیلی شَهر و دِكاپولیسی مَنطَقِه ای جا و اورشلیمی شَهر و یَهودیِه ای مَنطَقِه ای جا و اُردُن روخِنِه ای اون دَسی جا عیسایی دِمال راه دَکِتِنِه.