اِنجیلِ مَتّی 23 - کتاب مقدس به زبان مازندرانی - گویش غربی

هِشدار عِلَمای مَذهَبی رِه

¹ اَزما عیسی مَردِن و شی شاگِردِنِه بُتِه:

² «توراتی مَلِّمِن و عِلَمای فِرقِه فَریسی موسای پِیغمبری تَختی سَر نیشتِنِه.

³ هر چی شِمارِ گِنِنِه گوش هاکِنین و بِجا بیارین؛ ولی وِشونی کاری جا سَرمَخش نَیرین! چون اونچی رِه گه شِه تعلیم دِنِنِه، شِه اَنجام نَدِنِنِه.

⁴ وِشون دینی اَحکامِ یَتِه سَنگینِ باری تَرا گه نِشِنِه وِرِه جابِجا هاکِردَن مَردِنی دوش اِلِنِه، ولی شِه حاضِر نینِه حَتّی شی یَتِه اَنگیسِ هَم باری بِن بِلِن.

⁵ هر کاری کِنِنِه هَینِسِئِه گه مَردِن وِشونِه بَوینِن: چون وِشون شی آیِه دونِه گَت تَر کِنِنِه، شی بال و سالی کَش وَنِنِه و شی قَوایی بِنِ گِشادتَر گیرِنِه.

⁶ وِشون دوس دارِنِه مِجلِسی دِلِه بالا کَلِسی هِنیشَن و یَهودی عِبادتگاهی دِلِه خِبتَرین جارِه دارِن

⁷ و مَردِن کوچِه و بازاری دِلِه وِشونِه سَلام هادَن و وِشونِه ’اِسّا‘ داد هاکِنَن.

⁸ ولی نِلین شِمارِ ’اِسّا‘ بُئِن، چون شِما فقط یَتِه اِسّا دارِنی و شِما هَمدیَری هَمرا بِرارِنی.

⁹ زَمینی سَر هیچکسِ ’پیر‘ نُئین، چون فَقط شِما یَتِه پیر دارِنی گه آسِمونی دِلِه دَرِه.

¹⁰ نِلین شِمارِ ’مَلِّم‘ بُئِن، چون شِما یَتِه مَلِّم دارِنی گه مَسیحِ.

¹¹ اون کَس شِمِه دِلِه هَمه ای جا گَت تَرِ، گه هَمه ای نوکَر ووئِه.

¹² چون هر کی شِرِه گَت تَر جِلوِه هادِه، کِچیک وونِه، و هر کی گه شِرِه فروتَن هاکِنِه، سَربِلَن وونِه.

¹³ «وای بِحالِ شِما اِی توراتی مَلِّمِن و عِلَمای فَریسی دُرو! شِما آسِمونی پادشاهی ای دَرِ مَردِنی رو وَنِّنی، نا شِه دِلِه شونِنی نا اِلِنی اونِنی گه راهی دِلِه دَرِنِه هَم دِلِه بورِن. [

¹⁴ «وای بِحالِ شِما اِی توراتی مَلِّمِن و عِلَمای فَریسی دُرو! از طَرَفی شِما بیوِه زَناکِنِنی مالِ غارَت کِنِنی و از طَرفی دییَر ظاهر سازی ای سِه شی دِعارِه دِرازتَر کِنِنی. هَینِسه، شِمِه مِکافات خِیلی سَخت تَرِ.]

¹⁵ «وای بِحالِ شِما اِی توراتی مَلِّمِن و عِلَمای فَریسی دُرو! شِما دَریا و خِشکی ای جا گِذَر کِنِنی تا کَسی رِه بَنگیرین گه شِمِه دینِ قَبول هاکِنِه. وختی هَم مِوَفَق بَوِنی وِرِه دِ برابر شی جا بَدتَر، جَهِنِمی ریکا ساجِنِنی.

¹⁶ «وای بِحالِ شِما اِی رانِمایِنی گه شِه کورِنی، گِنِنی: ”اگه کَسی مَعبَدِ قَسَم بَخارِه اِشکال نارنِه، ولی اگه مَعبَدی طِلائیشونِه قَسَم بَخارِه، وِنِه شی قَسَمِ عَمَل هاکِنِه.“

¹⁷ اِی نِفَهمِ کورِن! کِدیم گَت تَرِ؟ طِلا یا مَعبَدی گه اون طِلارِه تَقدیس کِنِّه؟

¹⁸ گِنِنی: ”اگه کَسی قِروونگاه رِه قَسَم بَخارِه اِشکال نارنِه، ولی اگه هَدیِه ای گه قِروونگاهی دِلِه دَرِه رِه قَسَم بَخارِه، وِنِه شی قَسَمِ عَمَل هاکِنِه.“

¹⁹ اِی کورِن! کِدیم گَت تَرِ؟ هَدیِه یا قِروونگاهی گه هَدیِه رِه تَقدیس کِنِّه؟

²⁰ پس، کَسی گه قِروونگاه رِه قَسم خارنِه، قِروونگاه و اونچی گه وی سَر دَرِه رِه قَسَم بَخاردِه.

²¹ پس هر کس گه مَعبَدِ قَسَم خارنِه، مَعبَد و خِدایی گه وی دِلِه دَرِه رِه قَسَم بَخاردِه.

²² و هر کَس گه آسِمونِ قَسَم بَخارِه، خِدایی تَخت و اونیگه اونی سَر نیشِنِه رِه قَسَم بَخاردِه.

²³ «وای بِحالِ شِما اِی توراتی مَلِّمِن و عِلَمای فَریسی دُرو! شِما نَعنا و شیفید و زیرِه رِه دَه به یِک دِنِنی، ولی شریعَتی مِهمتَرین اَحکامِ گه عِدالَت و رَحمَت و اَمانت هَسِّه رِه نَدید گیرِنی. اونانِه وِنِه بِجا بیارین، بدونِ هَینگه هَینِنی اَنجامی دِلِه غِفلَت هاکِنین.

²⁴ اِی رانِمایِنی گه شِه کورِنی! شِما لَلِ پِرزو کَشِنِنی، ولی شِتِرِ بَل دِنِنی!

²⁵ «وای بِحالِ شِما اِی توراتی مَلِّمِن و عِلَمای فَریسی دُرو! شِما پِشقاب و پیالِه ای دیرگا وَرِه تَمیز کِنِنی، ولی اونی دِلِه طمع و ناپَرهیزی ای جا پِرِ.

²⁶ اِی کورِ فَریسی، اوَّل پِشقاب و پیالِه ای دِلِه رِه تَمیز هاکِن گه وی دیرگا هَم تَمیز وونِه.

²⁷ «وای بِحالِ شِما اِی توراتی مَلِّمِن و عِلَمای فَریسی دُرو! شِما اِسبی قَبریشونِه مونِّنی گه اونِنی نِما قَشَنگِ، ولی اونِنی دِلِه مِردِگونی هَسکا و هَمه جور نَجِسی ای جا پِرِ!

²⁸ شِما هَم هَمینجور شِرِه به ظاهر مَردِنی وَر صالِح نِشون دِنِنی، ولی شِمِه باطِن دُروئی و شِرارَتی جا پِرِ.

²⁹ «وای بِحالِ شِما اِی توراتی مَلِّمِن و عِلَمای فَریسی دُرو! شِما پِیغَمبرِنی سِه مَقبرِه ساجِنِنی و صالِحِنی قَبرِ تَزئین کِنِنی

³⁰ و گِنِنی: ”اگه اَما شِه پیرِنی دورِه دَوِمی، هیچ وَخت پِیغَمبَرِنی بَکوشتَنی سِه وِشونی هَمرا هَمدَسی نَکِردِمی.“

³¹ شِما شی هَین گَبی هَمرا گِواهی هادانی گه شِمِه پیرِن پِیغَمبَرِنِ بَکوشتِنِه.

³² اونچی رِه گه شِمِه پیرِن شِرو هاکِردِنِه، شِما تُوم هاکِنین!

³³ اِی ماریشون، اِی اَفعی زادِگون! چِتی جَهِنِمی مِجازاتی جا دَرشونِنی؟

³⁴ چون مِن پِیغَمبَرِن و حَکَیمِن و مَلِّمِنِ شِمِنِه رَسامِّه، ولی شِما بَعضیارِه کِشِنِنی و مَصلوب کِنِنی، بَعضیارِه هَم شی عِبادَتگاهایی دِلِه شَلّاق زَنِنی و شَهر به شَهر شونِنی و اونانِه عَذاب دِنِنی.

³⁵ پس بی گناه مَردِنی خون گه بَریخت بَوِه، از صالِحِ هابیل بَئیر تا زَكریا بَرخیایی ریکا گه وِرِه مَعبَدی دِلِه قِروونگاه و عِبادَتگاهی میِن بَکوشتِنی، شِمِه گِردَن دَرِه.

³⁶ حَیقَتاً شِمارِ گِمِه، دِشتِه هَین چیا شِمِه سَر اِنِه.

³⁷ «اِی اورشلیم، اِی اورشلیم، اِی شَهری گه پِیغَمبَرِنِ کِشِنی و رَسولِنِ سَنگسار کِنّی! چَن کَش خوایسِمِه هِتی کِچِ کِرکی تَرا گه شی چینیکائیشونِه شی پَر و بالی بِن گیرنِه تی وَچیلِه رِه جَم هاکِنِم، ولی نَخوایسی!

³⁸ اِسا شِمِه خِنِه، خَرابِه ای تَرا شِمِنِه بِجا مونِّه!

³⁹ چون شِمارِ گِمِه بعد اَزین دِ مِنِه نَوینِنی تا روزی گه بُئین: ”مِوارَک ووئِه اونگه خِداوندی اِسمی هَمرا اِنِه.“»