لوقا 5 - کتاب مقدس به زبان مازندرانی - گویش غربی

شاگِردِنی اِنتخاب هاکِردَن

¹ یَتِه روز گه عیسی جِنیسارِتی دَریایی وَر اِسّاوِه، مَردِن هر طرفی جا وِرِه هجوم اُردِنِه تا خِدایی کَلام بِشنُئَن.

² عیسی دریالُو دِتا لوتکا بَئیِه گه مائیگیرِن وِشونی جا دیرگا بیمو وِنِه و شی توریشونِه دِ شوردِنِه.

³ وی یَتِه لوتکا گه شَمعونی سِه وِه رِه سِوار بَوِه و ویجا بَخوایسِه اَقَدّی لوتکا رِه دریالُویی جا دور هاکِنِه. اَزما شِه لوتکایی دِلِه هِنیشتِه و مَردِنِ تَعلیم هادا.

⁴ وختی وی گَب تُوم بَوِه، شَمعونِ بُتِه: «لوتکا رِه یَتِه جَلِ جا بَوِر و تورِ مائی بَیتَنی سِه اُوئی دِلِه دیم بَدین.»

⁵ شَمعون جِواب هادا: «اِسّا، دِشتِه شُو رِه تَقَلّا هاکردِمی و هیچی نَیتِمی، ولی چون تو گِنی توریشونِه اُوئی دِلِه دیم دِمی.»

⁶ وختی هَین کارِ هاکِردِنِه، اَنّی مائی بَیتِنِه گه نَزیک وِه وِشونی توریشون بوسانی بَوو!

⁷ هَینِسه، شی شَریکِنی جا گه دییَر لوتکایی دِلِه دَوِنِه بَخوایسِنِه وِشونی کِمَک بیئِن. وِشون بیمونِه و هر دِتا لوتکارِه مائی ای جا مَشت هاکِردِنِه جوریگه نَزیک وِه غَرق بَوون.

⁸ وختی شَمعونِ پِطرُس هَینِه بَئیِه، عیسایی لینگ دَکِتِه و بُتِه: «اِی خِداوَند، میجا دور بَواش، چون مِن گِناهکار مَردیمِه!»

⁹ شَمعون و دِشتِه وی هَمراهِن هون اِتِّفاقی جا گه مائی ای صید هاکِردَنی موقِه دَکِت وِه بِهت هاکِردِنِه.

¹⁰ یَعقوب و یوحَنا، زِبِدی ای ریک ریکا هَم گه شَمعونی شَریک وِنِه، هَمین حالِ داشتِنِه. عیسی شَمعونِ بُتِه: «نَتِرس؛ بعد اَزین مَردِنِ صید کِنّی.»

¹¹ وختی وِشون شی لوتکائیشونِه دَریالُو بیاردِنِه، هَمه چیرِه وِل هاکِردِنِه و وی دِمال بوردِنِه.

یَتِه جُذامی ای شَفا

¹² اَتِه روز گه عیسی یَتِه از شَهرایی دِلِه دَوِه، یَتِه مَردی بیمو گه وی دِشتِه تَن جُذام بَیت وِه. وختی عیسی رِه بَئیِه، وی لینگی پِش دیم بَخاردِه و خواهِشی هَمرا بُتِه: «اِی آقا، اگه بَخوای بَتِنّی مِنِه شَفا هادی.»

¹³ عیسی شی دَسِ دِراز هاکِردِه و شی دَسِ وی سَر بِشتِه و بُتِه: «خوایمِه، شَفا بَئیر!» دَرجا، وی جُذام از بِین بوردِه.

¹⁴ اَزما عیسی وِرِه دَستور هادا بُتِه: «هیچکَسی وَر هیچی نُو، ولی بور مَعبَدی کاهِنی وَر شِرِه هَم هادِه و شی شَفا بَیتَنی خاطری قِروونی ای گه موسای پیغمبر دَستور هادا رِه پیشکَش هاکِن تا وِشونِه ثابِت بَوو.»

¹⁵ ولی عیسایی کاری خَوَر ویشتَر و ویشتَر پَخش وونِسِه، جوریگه یَتِخِیلی جَماعت جَم وونِسِنِه تا وی گَبِ بِشنُئَن و شی مَریضی ای جا شَفا بَیرِن.

¹⁶ ولی عیسی شِرِه مَردِنی جا کِنار کَشیِه و دِعا هاکِردَنی سِه یَتِه خَلوَتِ جا شیِه.

یَتِه فَلَجی شَفا

¹⁷ یَتِه از هون روزا گه عیسی دِ تَعلیم داوِه، عِلَمای فِرقِه ی فَریسی و توراتی مَلِّمِن گه اورشلیم و دِشتِه جلیلی شَهرا و یَهودیه ای جا بیمو وِنِه اوجِه نیشت وِنِه، عیسی، خِداوندی قِوَّتی هَمرا مَریضِنِ شَفا داوِه.

¹⁸ ناخوَکی چَن تا مَردی راهی جا بَرِسینِه گه یَتِه فَلَجِ تَختی سَر اُردِنِه. وِشون تَقَلّا کِردِنِه وِرِه خِنِه ای دِلِه بیارِن و عیسایی پِش بِلِن.

¹⁹ ولی چون اِزدِحام اَنّی زیاد وِه نَتِنِسِنِه راهی بَنگیرِن دِلِه بورِن، پس بومی سَر بوردِنِه و سِفالِ پِچینِه و فَلَجِ وی دوشَکی هَمرا جِر بَرِسانینِه و جَماعتی میِن عیسایی پِش بِشتِنِه.

²⁰ وختی عیسی وِشونی ایمونِ بَئیِه، بُتِه: «اِی مَردی، تی گِناهِن بیامِرزی بَوِه!»

²¹ فَریسیِن و توراتی مَلِّمِن شی هَمرا فِکر هاکِردِنِه: «هَین کیِه کِفر گِنِه؟ کی بِجِز خِدا بَتِنِّه گِناهِنِ بِبَخشِه؟»

²² عیسی وِشونی خیالِ بِفَهمِسِه و بُتِه: «چه شی دِلی دِلِه هَینجور خیال کِنِنی؟

²³ کِدیم یَتِه راحَت تَرِه: بُئی ”تی گِناهِن بیامرزی بَوِه“ یا هَینگه بُئی ”پِرِس و راه بور؟“

²⁴ اِسا دِنّین گه اِنسونی ریکا زَمینی سَر گِناهِنی آمِرزِشی اختیارِ دارنِه» هون فَلَجِ مَردی رِه بُتِه: «تِرِه گِمِه، پِرِس، شی دوشَکِ جَم هاکِن و خِنِه بور!»

²⁵ هون مَردی دَرجا وِشونی چِشی وَر پِرِسا دوشَکی گه وی سَر بَفِت وِه رِه بَیتِه و خِدارِه پَرَسِش کِنون خِنِه بوردِه.

²⁶ هَمه هَین اِتِّفاقی جا خِیلی تَجِّب هاکِردِنِه، خِدارِه پَرَسِش کِردِنِه و در حالی گه تَرس وِشونی وجودِ بَئیت وِه، گِتِنِه: «اَمرِز عجیبِ چیا بَئیمی.»

عیسی، لاوی خراجگیرِ دعوت کِنِّه

²⁷ اَزما عیسی هون خِنِه ای جا دیرگا بیمو و یَتِه خراجگیر گه وی اِسم لاوی وِه رِه بَئیِه گه خراجگیرِ دَکِّه ای دِلِه نیشت وِه. وِرِه بُتِه: «میجا پیرَوی هاکِن.»

²⁸ لاوی پِرِسا و هَمه چیرِه هَموجِه بِشتِه و وی دِمال بوردِه.

²⁹ لاوی عیسایی سِه شی خِنِه ای دِلِه یَتِه گَتِ دَعوَتی هادا. یَتِخِیلی خراجگیرِن و کَسای دییَر وِشونی هَمرا سِفرِه سَر هِنیشتِنِه.

³⁰ ولی عِلَمای فِرقِه فَریسی و دَسِه ای از توراتی مَلِّمِن گه وِشونی فِرقِه ای جا وِنِه، اعتراضی هَمرا عیسایی شاگِردِنِ بُتِنِه: «چه خراجگیرن و گِناهکارِنی هَمرا خارِنی و نوشِنِنی؟»

³¹ عیسی وِشونِه بُتِه: «مریضِنِنِ گه طَبیب احتیاج دارنِه، نا سالِمِ آدَمِن.

³² مِن نیمومِه تا صالِحِنِ دَعوت هاکِنِم، بَلگی بیمومِه گِناهکارِنِ توبه ای سِه دَعوت هاکِنِم.»

سوال روزه ای خَوَری

³³ وِشون عیسی رِه بُتِنِه: «یَحیایی شاگِردِن ویشتَرِ وَختا روزِه گیرِنِه و دِعا کِنِنِه، فَریسیِنی شاگِردِن هَم هَینجورِنِه، ولی تی شاگِردِن هَمِش خارِنِه و نوش کِنِنِه.»

³⁴ عیسی جِواب هادا: «بِشِنِه عَروسی ای مِهمونِنِ تا موقِه ای گه زِما وِشونی هَمرا دَرِه، مَجبور هاکِنین روزِه بَیرِن؟

³⁵ ولی موقِه ای رَسِنِه گه زِما وِشونی جا بَئیت وونِه؛ هون روزا روزِه گیرِنِه.»

³⁶ عیسی هَین مَثَلِ هَم وِشونی سِه بیاردِه و بُتِه: «هیچکَس یَتِه نُو جِمِه رِه نَورینِه تا اونِه یَتِه پیتِه جِمِه ای کَش پینَک هاکِنِه. چون اگه هَینجور هاکِنِه، هَم نُو جِمِه گِلی وونِه و هَم نُو پینَک پیتِه جِمِه رِه ناجور کِنِّه.

³⁷ هَمینجور هَم هیچکَس تازِه شَرابِ پیتِ پوسی خیکی دِلِه نَریزِنِه. چون اگه هَینجور هاکِنِه، تازِه شَراب پوسی خیکِ تِرکانِّه و شراب تالم وونِه و پوسی خیک هَم از بِین شونِه.

³⁸ تازِه شَرابِ وِنِه نُو پوسی خیکی دِلِه بَریختَن.

³⁹ و کسی گه کِهنِه شَرابِ بَخارِه دِ تازِه شَرابی هَوَسِ نَکِنِّه، چون گِنِه: ”کِهنِه شَراب خِبتَرِ.“‌»