اِنجیلِ یوحنا 21 - کتاب مقدس به زبان مازندرانی - گویش غربی

عیسی شی هَفتا شاگِردِنِه ظاهِر بَوِه

¹ بعد از هَین اِتِّفاقا، عیسی یَکَش دییَر ”تیبِریِه ای دَریایی“ وَر گه هَمون ”جَلیلی دَریا“ وِه، شِرِه شاگِردِنِه آشکار هاکِردِه. وی هَینجور شِرِه آشکار هاکِردِه:

² یَتِه روز شَمعونِ پِطرُس، توما گه وِرِه دِقِجی گِتِنِه، نَتَنائیل اَهلِ قانای جَلیل، زِبِدی ای ریک ریکا و دِتا شاگردِ دییَر با هَم دَوِنِه.

³ شَمعونِ پِطرُس وِشونِه بُتِه: «مِن شومِه مائی بَیرِم.» وِشون بُتِنِه: «اَما هَم تی هَمرا اِمی.» پَس دیرگا بوردِنِه و لوتکا سِوار بَوِنِه. ولی هون شُو هیچی مائی نَیتِنِه.

⁴ صِبِ دَم، عیسی دَریالُو اِسّاوِه؛ ولی شاگِردِن نِفَهمِسِنِه وی عیسائِه.

⁵ عیسی وِشونِه بُتِه: «وَچیلِه، هیچ مائی بَیتِنی؟» جِواب هادانِه: «نا!»

⁶ عیسی بُتِه: «تورِ لوتکایی راسِ طَرف دیم بَدین گه گیرِنی.» وِشون هَینجور هاکِردِنِه. و اَنّی مائی زیاد وِه گه دِ نَتِنِسِنِه تورِ لوتکایی دِلِه بَکِشَن.

⁷ هون شاگِردی گه عیسی وِرِه دوس داشتِه پِطرُسِ بُتِه: «خِداوَندِ!» شَمعونِ پِطرُس وختی بِشنُسِه خِداوَندِ، شی جِمِه رِه دَکِردِه، - چون جِمِه رِه کاری سِه شی تَنی جا دَر بیارد وِه - و شِرِه دَریایی دِلِه دیم بَدا.

⁸ دییَر شاگِردِن هَمونجوری گه تورِ پِر از مائی رِه شی دِمال کَشینِه، لوتکایی هَمرا بیمونِه، چون وِشون دَریالُویی جا دور نَوِنِه و حدودِ صَد مِتر فاصِلِه داشتِنِه.

⁹ وختی دَریالُو بَرِسینِه، بَئینِه یَتِه تَش زِغالی هَمرا روشِنِه و وی سَر مائی دَرِه و نون هَم دَرِه.

¹⁰ عیسی وِشونِه بُتِه: « هون مائی ای جا گه اَلَن بَیتِنی، بیارین.»

¹¹ شَمعونِ پِطرُس لوتکایی دِلِه بوردِه و تورِ دَریالُو بَکِشیِه. تور گَت گَتِ مائی ای جا مَشت وِه، صد و پَنجاه و سِه تا مائی توری دِلِه دَوِه، با هینگِه توری دِلِه خِیلی مائی دَوِه، ولی تور نُوسّا.

¹² عیسی وِشونِه بُتِه: «بیئِین صِبونِه بَخارین.» شاگِردِنی جا هیچکدیم جِرأت نَکِردِنِه ویجا بَپُرسَن، «تو کی هَسّی؟» چون دِنِسِنِه خِداوَندِ.

¹³ عیسی پِش بیمو، نون و مائی رِه بَیتِه و وِشونِه هادا.

¹⁴ هَین سِوِّمین کَشی وِه گه عیسی بعد از زینِّه بَووئَن، شِرِه شاگِردِنِ آشکار کِردِه.

عیسی و پِطرُس

¹⁵ بعد از صِبونِه، عیسی شَمعونِ پِطرُسی جا بَپُرسیِه: «اِی شَمعون، یوحَنایی ریکا، مِنِه هَینِنی جا ویشتَر دوس دارنی؟» وی جِواب هادا: «اَرِه آقا؛ تو گُو دِنّی تِرِه دوس دارمِه.» عیسی وِرِه بُتِه: «می وَرکائیشونِه خِراک هادِه.»

¹⁶ دِوِّمین کَش عیسی ویجا بَپُرسیِه: «اِی شَمعون، یوحَنایی ریکا، مِنِه دوس دارنی؟» شَمعونِ پِطرُس جِواب هادا: «اَرِه آقا؛ تو گُو دِنّی تِرِه دوس دارمِه.» عیسی بُتِه: «می گِسَنیشونِه چَپونی هاکِن.»

¹⁷ سِوِّمین کَش عیسی وِرِه بُتِه: «اِی شَمعون، یوحَنایی ریکا، مِنِه دوس دارنی؟» پِطرُس هَینی جا گه عیسی سِه کَش ویجا بَپُرسیِه مِنِه دوس دارنی؟» نارحَت بَوِه و بُتِه: «آقا، تو هَمه چیرِه دِنّی؛ تو گُو دِنّی تِرِه دوس دارمِه.» عیسی بُتِه: «می گِسَنیشونِه خِراک هادِه.

¹⁸ حَیقَتاً تِرِه گِمِه، وختی گه جَوونتَر وِه ای شی کَمَرِ وَسّی و هر جا خوایسی شیئی، ولی وختی پیر بَووئی، شی دَسِ وا کِنّی و یَنَفر دییَر تی کَمَرِ وَنِّه و تِرِه جایی گه نَخواینی بوری وَرنِه.»

¹⁹ عیسی هَینِه بُتِه تا پِطرُس دِنِّه چِتی میرنِه و خِدارِه جَلال دِنِه. اَزما عیسی وِرِه بُتِه: «می دِمال بِرِه.»

²⁰ اَزما پِطرُس دَگِرِسِه و بَئیِه هون شاگِردی گه عیسی وِرِه دوس داشتِه وِشونی دِمال اِنِه. وی هَمونی وِه گه شُومی سَر عیسایی پَلی ای وَر لَم هادا وِه و ویجا بَپُرسی وِه، «آقا، کی تِرِه دِشمَنی تَسلیم کِنِّه؟»

²¹ وختی پِطرُس وِرِه بَئیِه، عیسایی جا بَپُرسیِه: «آقا، پس وی سَر چی اِنِه؟»

²² عیسی پِطرُسِ بُتِه: «اگه بَخوام تا می دَگِرِسَنی موقِه وی زینِّه بَمونِّه، تِرِه چیِه؟ تو می دِمال بِرِه!»

²³ پَس هَین گَب بِرارِنی دِلِه دَپیتِه گه هون شاگِرد نَمیرنِه، دَر صورتی گه عیسی پِطرُسِ نُت وِه وی نَمیرنِه، بَلگی بُتِه «اگه بَخوام تا می دَگِرِسَنی موقِه زینِّه بَمونِّه، تِرِه چیِه؟»

²⁴ هَین هَمون شاگِردِ گه هَین چیارِه شَهادَت دِنِه و هَینِنِه بَنوِشتِه. اَما دِمّی گه وی شَهادَت راسِ.

²⁵ عیسی خِیلی کارای دییَر هَم هاکِردِه گه اگه یَتّا یَتّا بَنوِشت وونِسِه، گِمون نَکِمِّه حَتّی دِشتِه دِنیایی کیتابیشون هَم بَتِنِس وون هون نِوِشتِه ایشونِه شی دِلِه جا هادَن.