اِنجیلِ یوحنا 15 - کتاب مقدس به زبان مازندرانی - گویش غربی

من حَیقی اَنگور دار هَسمِه

¹ « مِن حَیقی اَنگور دار هَسمِه و می پیر باغوونِه.

² هر اَنگور رَزی گه میوِه نیارِه می پیر وِرِه وِرینِّه، و هر اَنگور رَزی گه میوِه بیارِه، وِرِه هَرَس کِنِّه تا ویشتَر میوِه بیارِه.

³ شِما اَلَن کَلامی خاطری گه شِمارِ بُتِمِه، تَمیزِنی.

⁴ شِما می دِلِه بَمونین و مِن شِمِه دِلِه. هَمونجور اگه شاخه داری کَش وَصل نَووئِه نَتِنِّه شیجا میوِه بیارِه. شِما هَم نَتِنِّنی میوِه بیارین اگه می دِلِه نَمونین.

⁵ «مِن اَنگور دارمِه و شِما می رَزِنی. کسی گه می دِلِه مونِّه و مِن وی دِلِه، وی اونیِه گه خِیلی میوِه اُرنِه؛ چون میجا سیوا هیچ کاری نَتِنِّنی هاکِنین.

⁶ اگه کَسی می دِلِه نَمونِّه، یَتِه رَزی تَرائِه گه وِرِه دیم دِنِنِه و خِشک وونِه. خِشکِ رَزیشونِه جَم کِنِنِه و تَشی دِلِه دیم دِنِنِه و سوجانِنِه.

⁷ اگه می دِلِه بَمونین و می کَلام شِمِه دِلِه بَمونِّه، هر چی خواینِنی دَرخواس هاکِنین گه بَراوَردِه وونِه.

⁸ می پیری جَلال هَینجور آشکار وونِه گه شِما خِیلی میوِه بیارین. و هینجوری ثابِت کِنِنی گه می شاگِردِنِنی.

⁹ «هَمونجور گه پیر مِنِه دوس دارنِه، مِنَم شِمارِ دوس دارمِه؛ می مِحَبَتی دِلِه بَمونین.

¹⁰ اگه می اَحکامِ بِجا بیارین، می مِحَبَتی دِلِه مونِّنی؛ هَمونجوری گه مِن شی پیری اَحکامِ بِجا اُرمِه و وی مِحَبَتی دِلِه مومِّه.

¹¹ هَین چیارِه شِمارِ بُتِمِه تا می خِشالی شِمِه دِلِه دَووئِه و شِمِه خِشالی کامِل بَوو.

¹² «می حِکم هَینِه گه هَمدِیَرِ مِحَبَت هاکِنین، هَمونجور گه مِن شِمارِ مِحَبَت هاکِردِمِه.

¹³ هَین مِحَبَتی جا گَت تَر دَنیِه گه یَنَفر شی جانِ شی رَفِقِنی سِه هادِه.

¹⁴ اگه اونچی شِمارِ حِکم کِمِّه رِه عَمل هاکِنین، می رَفِقِنِنی.

¹⁵ دِ شِمارِ غِلام داد نَکِمِّه، چون غِلام شی اَربابی کاری جا خَوَر نارنِه. بَلگی شِمارِ رَفِق داد هاکِردِمِه، چون دِشتِه چیایی گه شی پیری جا بِشنُسِمِه رِه شِمارِ اونی جا خَوَردار هاکِردِمِه.

¹⁶ شِما مِنِه اِنتِخاب نَکِردِنی، بَلگی مِن شِمارِ اِنتِخاب هاکِردِمِه و بَرِسانیمِه تا بورین و میوِه بیارین و شِمِه میوِه بَمونِّه، تا هر چی پیری جا می اِسمی هَمرا بَخواین شِمارِ هادِه.

¹⁷ مِن هَین چیارِه شِمارِ حِکم کِمِّه گه هَمدِیَرِ مِحَبَت هاکِنین.

¹⁸ «اگه دِنیا شِمِه جا بیزارِ، دِنّین گه شِمِه جا پِشتَر میجا بیزار وِه.

¹⁹ اگه شِما دِنیایی سِه وِنی، دِنیا شِمارِ هِتی شی آدَمایی تَرا دوس داشتِه. ولی چون دِنیایی سِه نینی، بَلگی مِن شِمارِ دِنیایی جا اِنتِخاب هاکِردِمِه، دِنیا شِمِه جا بیزارِ.

²⁰ کَلامی گه شِمارِ بُتِمِه رِه شی یاد دارین: ”غِلام شی اَربابی جا گَت تَر نیِه.“ اگه مِنِه اَذیَت و آزار هاکِردِنِه، شِمارِ هَم اَذیَت و آزار کِنِنِه؛ و اگه می کَلامِ عَمل هاکِردِنِه، شِمِه کَلامِ هَم عَمل کِنِنِه.

²¹ ولی می اِسمی خاطِریِه گه دِشتِه هَین کارارِ شِمِه هَمرا کِنِنِه، چون اونیگِه مِنِه بَرِسانیِه رِه نِشناسِنِنِه.

²² اگه نیمو وِمِه و وِشونی هَمرا گَب نَزو وِمِه گِناه ناشتِنِه؛ ولی اَلَن دِ شی گِناهِنی سِه عِذر و ویهومِه ای نارِنِه.

²³ کَسی گه میجا بیزار ووئِه، می پیری جا هَم بیزارِ.

²⁴ اگه وِشونی دِلِه کارایی نَکِرد ووم گه جُز مِن هیچکَس نَکِردِه، گِناه ناشتِنِه؛ ولی با هَینگه هون کارارِ بَئینِه، هَم میجا و هَم می پیری جا بیزارِنِه.

²⁵ ولی کَلامی گه وِشونی توراتی دِلِه بیمو، وِنه حَیقَت بَرِسِه گه گِنِه: "وِشون بی دلیل میجا بیزار وِنِه."

²⁶ «ولی وختی هون پِشتیبون گه اونِه پیری طَرفی جا شِمِسِه رَسامِّه بیِه، یَعنی حَیقَتی روح گه پیری جا اِنِه، وی می خَوَری شَهادَت دِنِه.

²⁷ شِما هَم شَهادَت دِنِنی، چون از اوَّل می هَمرا دَوِنی.