اِنجیلِ یوحنا 12 - کتاب مقدس به زبان مازندرانی - گویش غربی

مریم عیسی رِه عَطرهاشی کِنِّه

¹ شِش روز پِش از پِسَخی عید عیسی بِیت‌عَنیایی دِهی دِلِه هَموجِه گه ایلعازَر زندگی کِردِه بیمو، ایلعازَر هَمونیِه گه عیسی وِرِه مِردِگونی جا زینِّه هاکِرد وِه.

² اوجِه ویسِه شُوم هادانِه. مارتا پَذیرایی کِردِه و ایلعازَر هَم یَتِه از اونانی وِه گه عیسایی هَمرا سِفرِه سَر نیشت وِه.

³ هَمون موقِه، مریم یَتِه شیشِه سُنبُلِ عَطرِ گِرون قِیمَتِ خالص گه نیم لیتری اَنّا وِه رِه بَیتِه و عیسایی لینگِ وی هَمرا عَطرهاشی هاکِردِه و شی گیسی هَمرا خِشک هاکِردِه. خِنِه عَطری بی ای جا پِر بَوِه.

⁴ ولی یَهودای اَسخَریوطی، یَتِه از عیسایی شاگِردِن گه بَعدها وِرِه دِشمَنی تَسلیم هاکِردِه، بُتِه:

⁵ «چه هَین عَطر گه وی قیمَت سیصَد روز کارگَری دَسمِزی اَنّا وونِه رِه نَروتِنی تا وی پولِ فَقیرِنِه هادین؟»

⁶ وی هَینِسه هَینِه نُتِه گه فَقیرِنی فِکر دَوه، بَلگی چون دِز وِه هَینِه بُتِه، عیسی و شاگِردِنی خَرج و بَرجی پول کیسِه وی دَس دَوِه و یَهودا هون پولی جا دِزِّسِه.

⁷ پَس عیسی بُتِه: «وِرِه کار نارین! تا هَین عَطرِ می دَفنِ روزی سِه دارِه.

⁸ چون فَقیرنِه هَمِش شی هَمرا دارِنی، ولی مِنِه هَمِش نارِنی.»

⁹ جَماعتِ زیادی از یَهودیِن وختی بِشنُسِنِه عیسی اوجِه دَرِه، بیمونِه تا نا فَقط عیسی، بَلگی ایلعازَرِ گه زینِّه هاکِرد وِه رِه هَم بَوینِن.

¹⁰ پَس، مَعبدی گَت گَتِه کاهنِن نَخشِه بَکِشینِه گه ایلعازَرِ هَم بَکوشَن،

¹¹ چون باعِث بَوِه وِه خِیلی از یَهودیِن بورِن و عیسی رِه ایمون بیارِن.

عیسی شاهی تَرا اورشلیمی دِلِه شونِه

¹² فَردای هون روز، یَتِخِیلی جَماعت گه عیدی سِه بیمو وِنِه، وختی بِشنُسِنِه عیسی اورشَلیمی سِه اِنِه،

¹³ نَخلی شاخِه ایشونِه شی دَسی دِلِه بَیتِنِه و وی پِشواز بوردِنِه. وِشون دادی هَمرا گِتِنِه: «نِجات هادِه! مِوارَکِ اونیگه خِداوندی اِسمی هَمرا اِنِه، مِوارَکِ اسرائیلی پادشاه!»

¹⁴ اَزما عیسی یَتِه خَرکِرِّه بَنگیتِه و اونی سَر سِوار بَوِه؛ هَمونجور گه مِقَدّسِ نِوِشتِه هایی دِلِه بَنوِشت بَوِه:

¹⁵ «نَتِرس، اِی صَهیونی کوهی کیجا! هارِش تی پادِشاه اِنِه، تی پادشاه خَرکِرِّه ای سَر سِوارِه و دِ اِنِه.»

¹⁶ وی شاگِردِن اَوَّل هَین چیارِه نِفَهمِسِنِه، ولی وختی عیسی بعد از بَمِردَن اَی هَم زینِّه بَوِه، شی یاد بیاردِنِه گه هَینِن هَمه مِقَدّسِ نِوِشتِه هایی دِلِه وی خَوَری بَنوِشت بَوِه وِه، و هَمونجور هَم بَوِه.

¹⁷ هون جَماعتی گه ایلعازَری داد هاکِردَنی موقه مَقبَرِه ای جا و وی زینِّه هاکِردَن مَرگی جا عیسایی هَمرا دَوِنِه، هَینجوری هَین اتِّفاقِ شَهادَت داوِنِه.

¹⁸ هَینِسه جَماعت وی پِشواز بوردِنِه گه بِشنُس وِنِه هَین نِشونِه و مُعجِزِه رِه هاکِردِه.

¹⁹ پس عِلَمای فِرقِه فَریسی هَمدیَرِ بُتِنِه: «وینِنی دِ اَمِه دَس کاری بَر نیِنِه؛ هارشین دِشتِه دِنیا وی دِمال بوردِنِه.»

یونانیِن خواینِنِه عیسی رِه بَوینِن

²⁰ اونانی دِلِه گه عیدی عِبادَتی سِه اورشلیمی سِه بیمو وِنِه، بَعضی یونانی وِنِه.

²¹ وِشون فیلیپُسی وَر، گه اَهلِ بِیت‌صِیدا، جلیلی مَنطَقِه وِه، بوردِنِه و وِرِه بُتِنِه: «آقا، خوایمی عیسی رِه بَوینیم.»

²² فیلیپُس بوردِه آندریاسِ بُتِه و وِشون هر دِتا بوردِنِه عیسی رِه بُتِنِه.

²³ عیسی وِشونِه بُتِه: «اِنسونی ریکائی بَمِردَن و زینِّه بَووئَنی موقِه بَرِسیِه.

²⁴ حَیقَتاً شِمارِ گِمِه، اگه گَنِّمی تیم گِلی بِن نَشوئِه و نَمیرِه، تَنیا مونِّه؛ ولی اگه بَمیرِه خِیلی بار اُرنِه.

²⁵ اونیگه شی جانِ دوس دارِه، اونِه از دَس دِنِه. ولی اونیگه هَین دِنیایی دِلِه شی جانی جا بِگذِرِه، اونِه اَبَدی زندگی ای سِه حِفظ کِنِّه.

²⁶ اگه کسی خواینِه مِنِه خِدمَت هاکِنِه، وِنِه می دِمال بیِه؛ و جایی گه مِن دَرمِه، می خادِم هَم اوجِه دَرِه. کسی گه مِنِه خِدمَت هاکِنِه، پیر وِرِه عِزَّت دِنِه.

عیسی شی بَمِردَنی جا گَب زَنِّه

²⁷ «اَلَن می جان پَریشونِ. چی بُئَم؟ یَعنی بُئَم، ”پیر! اونچی ای جا گه خواینِه می سَر بیِه مِنِه نِجات هادِه “؟ ولی مِن هَین کاری سِه هَین دِنیایی دِلِه بیمومِه.

²⁸ پیر، شی اِسمِ جَلال هادِه!» اَزما یَتِه صِدا آسِمونی جا بیمو گه: «جَلال هادامِه و اَی هَم جَلال دِمِه.»

²⁹ پس جَماعتی گه اوجِه اِسّاوِنِه و هَینِه بِشنُسِنِه، بُتِنِه: «آسِمونی راد وِه.» بَقیِه بُتِنِه: «یَتِه فِرِشتِه وی هَمرا گَب بَزو.»

³⁰ عیسی بُتِه: «هَین صِدا شِمِنِه وِه، نا میسِه.

³¹ اِسا هَین دِنیایی داوَری ای موقِئِه؛ و هَین دِنیایی رَئیس شیطان دیرگا دیم بَدا وونِه.

³² وختی مِن صَلیب بَکِشی بَووم و زَمینی جا بِلَن بَووم، دِشتِه مَردِنِ شی سَمت کَشِمِّه.»

³³ عیسی هَینِه بُتِه تا نِشون هادِه قَرارِ چِتی بَمیرِه.

³⁴ پس جَماعت وِرِه بُتِنِه: «طِبقِ اونچی توراتی جا بِشنُسِمی، مَسیحِ موعود تا اَبَد زینِّه مونِّه، پَس چِتیِه گه گِنی اِنسونی ریکا وِنِه مَصلوب بَوو؟ هَین اِنسونی ریکا کیِه؟»

³⁵ عیسی وِشونِه بُتِه: «نور اَقَدّی دییَر شِمِه هَمرا دَرِه. پَس تا وختی گه حَلا نورِ دارِنی راه بورین، نَکِنِه تاریکی شِمِه دُورِ بَیرِه. اونیگه تاریکی ای دِلِه راه شونِه، نَئونِه کِجِه شونِه.

³⁶ تا وختی گه نورِ دارِنی نورِ ایمون بیارین تا نوری وَچیلِه بَووئین.» عیسی وختی هَین گَبِارِه بَزو، اوجِه ای جا بوردِه و شِرِه وِشونی جا قایِم هاکِردِه.

³⁷ با هینگِه عیسی خِیلی نِشونِه و مُعجِزِه وِشونی چِشی وَر هاکِرد وِه، حَلا وِرِه ایمون نیاردِنِه.

³⁸ هَینجوری بَوِه گه اِشعیای پِیغَمبَری گَب اَنجام بَرِسِه گه بُت وِه: «اِی خِداوَند، کی اَمِه پِیغِمِ باوَر هاکِردِه، خِداوندی قِدرَت کِنی سِه آشکار بَوِه؟»

³⁹ هَمونجور گه اِشعیای پِیغَمبَر یَجا دییَر بُتِه، وِشون نَتِنِسِنِه ایمون بیارِن، چونگه:

⁴⁰ «خِدا وِشونی چِشِ کور و وِشونی دِلِ سَخت هاکِردِه، تا نَکِنِه شی چِشی هَمرا بَوینِن و شی دِلی هَمرا بِفَهمِن، و می سَمت دَگِردِن تا من وِشونِه شَفا هادِم.»

⁴¹ اِشعیا هَینِسه هَینِه بُتِه گه عیسایی جَلالِ بَئیِه و وی خَوَری گَب بَزو.

⁴² با هَین وجود حَتّی قومی گَت گَتِه ای جا خیلیا عیسی رِه ایمون بیاردِنِه، ولی فَریسیِنی تَرسی جا شی ایمونِ مِقِر نیمونِه تا نَکِنِه وِشونِه عِبادَتگاهی جا دیرگا هاکِنِن.

⁴³ چون مَردِنی تَعریف و تَمجیدِ، خِدایی تَعریف و تَمجید هاکِردنی جا دوس داشتِنِه.

⁴⁴ اَزما عیسی بِلَنِ صِدایی هَمرا بُتِه: «هر‌ کی مِنِه ایمون بیارِه، نا مِنِه، بَلگی اونیگه مِنِه بَرِسانیِه رِه ایمون بیاردِه.

⁴⁵ هر کی مِنِه وینِّه، اونیگه مِنِه بَرِسانی رِه وینِّه.

⁴⁶ مِن هِتی نوری تَرا هَین دِنیایی دِلِه بیمومِه تا هر کی مِنِه ایمون بیارِه، تاریکی ای دِلِه نَمونِّه.

⁴⁷ اگه کَسی می گَبِ بِشنُئِه، ولی اونِه بِجا نیارِه، مِن وِرِه داوَری نَکِمِّه؛ چون نیمومِه هَین دِنیایی مَردِنِ داوَری هاکِنِم، بَلگی بیمومِه تا وِشونِه نِجات هادِم.

⁴⁸ اونیگه مِنِه رَد هاکِنِه و می گَبِ قَبول نَکِنِه، یَت دییَر داوَر دَرِه، هَمون گَبایی گه بَزومِه قیامَتِ روز وِرِه داوَری کِنِّه.

⁴⁹ چون مِن شیجا گَب نَزومِه، بَلگی پیری گه مِنِه بَرِسانیِه شِه مِنِه دَستور هادا گه چی بُئِم و چی ای جا گَب بَزِنِم.

⁵⁰ مِن دِمِّه گه وی دَستور اَبَدی زندگیِه. پَس اونچی گه مِن گِمِه دِرِس هَمون چیِه گه پیر مِنِه بُتِه.»