اِنجیلِ یوحنا 10 - کتاب مقدس به زبان مازندرانی - گویش غربیخبِ چَپون 1 «حَیقَتاً شِمارِ گِمِه، اونیگه گِسَنی کِلِمی دَری جا دِلِه نَشوئِه، بَلگی یَت دییَر راهی جا لُو بورِه، دِز و راهزَنِ. 2 ولی اونیگه دَری جا دِلِه بیِه، گِسَنیشونی چَپونِ. 3 دَربون، دَرِ ویسِه پِه کِنِّه و گِسَنیشون وی اَوازِ گوش دِنِنِه؛ وی شی گِسَنیشونِه به اِسم داد کِنِّه و اونانِه دیرگا وَرنِه. 4 وختی دِشتِه شی گِسَنیشونِه دیرگا بَوِرِه، وِشونی پِش راه شونِه و گِسَنیشونَم وی دِمال شونِنِه، چون وی اَوازِ اِشناسِنِنِه. 5 هیچ وَخت غَریبِه ای دِمال نَشونِنِه، بَلگی ویجا فِرار کِنِنِه، چون غَریبِه ایشونی اَوازِ نِشناسِنِنِه.» 6 عیسی هَین مَثَلِ وِشونی سِه بُتِه، ولی وِشون نِفَهمِسِنِه دِ وِشونِه چی گِنِه. 7 پس یَکَش دییَر وِشونِه بُتِه: «حَیقَتاً شِمارِ گِمِه، گِسَنیشونی سِه مِن ’دَر‘ هَسمِه؛ 8 دِشتِه اونِنی گه میجا پِشتر بیمونِه دِز و راهزَنِنِه، ولی گِسَنیشون وِشونی گَبِ گوش نَدانِه. 9 مِن ’دَر‘ هَسمِه؛ هر کی گه می راهی جا دِلِه بورِه نِجات گیرنِه، و دِلِه دیرگا کِنِّه و واشگا اَنگیرنِه. 10 دِز نینِه بِجُز هَینِسه گه بَدِزِّه و بَکوشِه و نابود هاکِنِه؛ مِن بیمومِه تا وِشون زندگی دارِن و اونِه فِراوونی ای هَمرا دارِن. 11 «مِن خِبِ چَپونمِه. خِبِ چَپون شی جانِ گِسَنیشونی سِه اِلنِه. 12 اونیگه دَسمِز گیرنِه، چون چَپون نیِه و گِسَنیشون وِنی نینِه، هر وَخت بَوینِه وِرگ اِنِه گِسَنیشونِه اِلنِه و فِرار کِنِّه، وِرگ گِسَنِ تَب زَنِّه گیرنِه و پَخش و پَلا کِنِّه. 13 اونیگه دَسمِز گیرنِه فِرار کِنِّه، چِون دَسمِزی سِه کار کِنِّه و گِسَنیشونی فِکر نیِه. 14 مِن خِبِ چَپونمِه. مِن شی گِسَنیشونِه اِشناسِمِه و می گِسَنیشونَم مِنِه اِشناسِنِنِه، 15 هَمونجور گه پیر مِنِه اِشناسِنِه و مِنَم پیرِ اِشناسِمِه. مِن شی جانِ گِسَنیشونی سِه اِلمِه. 16 گِسَنِنِ دییَری هَم دارمِه گه هَین گَلِّه ای جا نینِه. اونِنِ هَم وِنِه بیارِم و اونِن می اَوازِ گوش دِنِنِه. اَزما یَتِه گَلِّه وونِنِه یَتِه چَپونی هَمرا. 17 پیر هَینِسه مِنِه دوس دارنِه گه مِن شی جانِ اِلمِه تا اونِه یَکَش دییَر پس هایرِم. 18 هیچکی اونِه میجا نَیرنِه، بَلگی مِن شی میلی هَمرا اونِه دِمِه. اختیار دارمِه اونِه هادَم و اختیار دارمِه اونِه اَی هَم پَس هایرِم. هَین حِکمِ شی پیری جا بَیتِمِه.» 19 هَین گَبی سِه یَکَش دییَر یَهودیِنی دِلِه اختِلاف دَکِتِه. 20 وِشونی جا خِیلیا بُتِنِه: «وی دِوبَزِه و خِلِ؛ چه وی گَبِ گوش دِنِنی؟» 21 ولی بَقیِه بُتِنِه: «هَینِن یَتِه دِوبَزِه ای گَب نیِه. مَگِه دِو بَتِنِّه کوری چِشِ وا هاکِنِه؟» مِن و پیر یَتّامی 22 عیدِ وَقف مَعبَدِ اورشَلیمی دِلِه بَرِسیِه. زِمِسِن وِه 23 و عیسی مَعبَدی دِلِه سِلِیمونی ایوونی دِلِه راه شیِه. 24 پس یَهودیِن وی دُور جَم بَوِنِه و بُتِنِه: «تا کِی خواینی اَمارِه شَکی دِلِه داری؟ اگه مَسیحِ موعود هَسّی اَمارِه عَلَنی بُو.» 25 عیسی جِواب هادا: «شِمارِ بُتِمِه، ولی باوَر نَکِنِنی. کارایی گه مِن شی پیری اِسمی هَمرا کِمِّه میسِه شَهادَت دِنِنِه. 26 ولی شِما ایمون نیارِنی، چون می گِسَنِنی جا نینی. 27 می گِسَنیشون می اَوازِ گوش دِنِنِه؛ مِن اونانِه اِشناسِمِه و اونان می دِمال اِنِنِه. 28 مِن اونانِه اَبَدی زندگی بَخشِمِه و اونان هیچ وَخت هَلاک نَوونِنِه. هیچکی اونانِه می دَسی جا تَب نَزِنِه و نَئیرنِه. 29 می پیر گه اونانِه مِنِه هادا هَمه ای جا گَت تَرِ، و هیچکی نَتِنِّه اونانِه پیری دَسی جا تَب بَزِنِه و بَئیرِه. 30 مِن و پیر یَتّا هَسمی.» 31 اَزما یَکَش دییَر یَهودیِن سَنگ بَیتِنِه تا وِرِه سَنگسار هاکِنَن. 32 عیسی وِشونِه بُتِه: «پیری طرفی جا خِیلی خِبِ کارا شِمارِ هَم هادامِه. کِدیم یَتِه ای سِه خواینِنی مِنِه سَنگسار هاکِنین؟» 33 یَهودیِن جِواب هادانِه: «خِبِ کاری سِه تِرِه سَنگسار نَکِمّی، بَلگی هَینِسه گه کِفر گِنی، چون آدَمی و گِنی خِدایی.» 34 عیسی وِشونی جِواب بُتِه: «مَگِه شِمِه شَریعَتی دِلِه بَنوِشت نَوِه گه مِن ”بُتِمِه شِما خِدائنِنی“ 35 اگه خِدا کَسایی گه وی کَلام وِشونِه بَرِسیِه رِه، ’خِدائن‘ بُتِه - و مِقَدّسِ نِوِشتِه باطِل نَوونِه - 36 چِتی بَتِنِنی کَسی رِه گه پیر وَقف هاکِردِه و دِنیایی دِلِه بَرِسانیِه رِه بُئین ”کِفر گِنی،“ فقط هَینِسه گه بُتِمِه خِدایی ریکا هَسمِه؟ 37 اگه شی پیری کارارِ اَنجام نَدِمِه، پس مِنِه ایمون نیارین. 38 ولی اگه اَنجام دِمِه، حَتّی اگه مِنِه ایمون نیارِنی، لااَقَل هون کارارِ ایمون بیارین تا دِنّین و بِفَهمین گه پیر می دِلِه دَرِه و مِن پیری دِلِه.» 39 اَزما یَکَش دییَر خوایسِنِه وِرِه هَماسَن، ولی عیسی وِشونی دَسی جا دَربوردِه. 40 عیسی اَی هَم اُردُن روخِنِه ای اون دَس بوردِه، اوجِه ای گه یحیی پِشتر تَعمید داوِه، و اوجِه بَمونِسِه. 41 خِیلیا وی وَر بیمونِه. وِشون گِتِنِه: «یحیی هیچ نِشونِه و مُعجِزِه ای نَکِردِه، ولی هر چی هَین مَردی ای خَوَری بُتِه، راس وِه.» 42 پَس خِیلیا اوجِه عیسی رِه ایمون بیاردِنِه. |
@ 2024 Korpu Company