نامِه مَسیحینی عبرانی نِژادی سِه 9 - کتاب مقدس به زبان مازندرانی - گویش غربی

زَمینی مِقدّسِ جایی دِلِه عبادت هاکِردن

¹ اِسا، حتّی اَوَّلین عهد، عِبادَت هاکردنی سِه قوانینی داشتِه و زَمینی سَرم یَتِه مِقدّسِ جا داشتِه.

² چون کیمِه بَرپا بَوِه، گه اوَّلین قِسمت لَمپا، میز، و مِقدّسِ نون دَوِه. هَیجِه رِه ’قُدس‘ گِتِنِه.

³ دِوِّمین پَردِه ای پِشت قِسمتی دَوِه گه وی اِسم ’قُدس‌الاقداس‘ وِه،

⁴ هَین قِسمتی دِلِه، طِلایی تَشکَلِه بُخوری بَسوجانینی سِه دَوِه، و عهدی صِنِخ گه هر طرفی جا طِلا کاری بَوِه وِه گه اونی میِن یَتِه طِلایی پیلَک دَوِه گه «مَنّا» رِه اونی دِلِه داشتِنِه، هارونی عصا گه تِتی هاکِرد وِه، و دِتا سنگی لوح گه عهدی دَه فرمان وی سَر بَنوِشت بَوِه وِه.

⁵ صِنِخی سَر گه هونِه رَحمتی تَخت گِتِنِه ’جلالی‘ کروبیِنی فِرشته، سایه دیم بَداوِنِه. اَلَن نَتِمّی هَین چیایی جا ریز به ریز گَب بَزِنیم.

⁶ بعد از اونگه هَین چیا هَینجوری آمادِه وونِسِه، کاهنِن همِش اوَّلین قسمتی دِلِه شیوِنِه تا شی وظایفِ اَنجام هادِن.

⁷ ولی فقط کاهنِ اعظم دِوّمین قِسمتی دِلِه شونِه، و هونَم فقط سالی یَکَش، و شی هَمرا قِروونی ای خونِ وَرنِه تا شیسِه و هون گِناهِنی سِه گه قوم نادونی ای خاطری هاکِرد وِنِه، پیشکَش هاکِنِه.

⁸ و هینجوری روح القدس هَم دِنِه گه تا موقِه ای گه اوَّلین قِسمت پابرجائه، حَلا هون راهی گه قُدس الاقداسی دِلِه شونِه، وا نَوِه،

⁹ گه هَین، هَین دورانی سِه یَتِه نِشونِئه. طبقِ هون هدیه ها و قِروونیایی گه هادا وونِه، نَتِنِّنِه هون کسایی وِجدانِ گه عبادت‌ کِنِنِه رِه کاملاً پاک هاکِنِن،

¹⁰ بَلگی هَینِن فقط خِراکیا و نوشیدنیا و جورواجور غِسلا و قانونایی هَسِّنِه گه تَنِ ربط دارِنِه، و فقط تا موقه ای اعتبار دارِنِه گه خِدا تازِه تَرتیب هادِه.

آزادی مَسیحی خونی طریق

¹¹ ولی وختی گه مَسیح، کاهن اعظمی مقامی دِلِه خِبِ چیایی سِه بیمو گه اَلَن اَمِه نصیب بَوِه، وی یَتِه گَتتَر و کاملترِ کیمِه ای دِلِه بیمو گه دَسی جا بَسات نَوِه و هَین خِلقتی سِه نیِه.

¹² وی یَکَش هَمیشه ای سِه قُدس‌الاقداسی دِلِه بیمو نا بِزیشون و گوکیشونی خونی هَمرا، بلگی شی خونی هَمرا، و هینجوری اَبَدی آزادی رِه آمادِه هاکِردِه.

¹³ چون اگه بِزیشون و تِشکیشونی خون، و گوئی کِلِینی بَپاشینی هَمرا اونانی سَر گه ناپاکِنِه، وِشونِه تقدیس کِنِّه تا جسمی دِلِه پاک بَووئِن،

¹⁴ چَنّی ویشتَر، مَسیحی خون گه اَبَدی روحی طریق، شِرِه بی‌عیب خِدایی سِه پیشکَش هاکِردِه اَمِه وِجدانِ بیخِدی کارایی جا پاک کِنِّه تا زینِّه خِدارِه خِدمَت هاکِنیم!

¹⁵ پس مَسیح یَتِه جدیدِ عهدی واسِطه گَرِ، تا اونانیگه بَخونِس بَوِنِه بَتِنِس وون هون اَبَدی میراثِ گه خِدا وعده هادا بِدس بیارِن، چون یَتِه مرگ اِتِّفاق دَکِتِه گه وِشونِه هون گِناهِنی جا گه اوَّلین عهدی دِلِه اَنجام بَوِه، آزادی دِنِه.

¹⁶ چون یَه وختی یَتِه وَصیت اِجرا وونِه، گه ثابت بَوو اونیگه وَصیت هاکِردِه بَمِردِه.

¹⁷ چون وَصیتِ بَمردِه پِی بِشِنِه اِجرا هاکِردن، و تا موقِه ای گه اونیگه وَصیت هاکِردِه زینِّئه، هون وصیتِ نِشِنِه اِجرا هاکِردن.

¹⁸ هینسِه، حتّی اوَّلین عهدَم بدونِ خون، بَرقرار نَوونِسِه.

¹⁹ چون هون موقِه گه دِشتِه شریعتی احکام، موسایی طریق دِشتِه قومی سِه اِعلام بَوِه، وی گوکیشونی خون و بِزیشونی خونِ بَیتِه، اُو و سِرخِ پشم و زوفایی شاخِه هایی هَمرا، هَم طوماری سَر و هَم دِشتِه قومی سَر بَپاشیِه

²⁰ و بُتِه: «هَینِه هون عهدی خون گه خِدا شِمارِ حِکم هاکردِه.»

²¹ و هَمینجور هون خونِ، کیمِه ای سَر، و هَم دِشتِه ظرفایی سَر گه پَرَسِشی سِه به کار شیِه بَپاشیِه.

²² راساسی طِبقِ شریعَت، تقریباً هَمه چی خونی هَمرا پاک وونِه، و بدونِ هَینگه خون بَریخت بَوو، گِناهنی آمِرزش وجود نارنِه.

²³ پَس وِنِه هَین چیا گه یَتِه نِمونِه آسِمونی چیایی جائه، هَین قِروونیایی هَمرا پاک بَوو، ولی شِه آسمونی چیا هون قِروونیایی هَمرا گه اونِنی جا بهتَرِ، پاک وونِه.

²⁴ چون مَسیح هون قدس الاقداسی دِلِه گه دَسی جا بَسات بَوِه نَشیِه، و فقط هون حَیقی چیایی جا یَتِه نِمونِئه، بَلگی خِدِ آسِمونی سِه بوردِه تا اَمِه طرفی جا خِدایی حِضور ظاهر بَوو.

²⁵ و هینجور نیِه گه وی شِرِه هَمِش قِروونی هاکِنِه، یَتِه کاهنِ اعظمی تَرا گه هر سال قُدس‌الاقداسی دِلِه شونِه، اونَم هون خونی هَمرا گه شِه وی خون نیِه.

²⁶ چون هینجوری، مَسیح وِنِه از وختی گه دِنیا خَلق بَوِه یَکسَرِه عذاب کَشی وِه، ولی هینجوری نَوِه، وی اَلَن یَکَش همیشه ای سِه آخرین زَمونایی دِلِه بیمو تا شی قِروونی هاکِردنی هَمرا، گِناهِ از بِین بَوِرِه.

²⁷ و هَمونجور گه تعیین بَوِه گه اِنسون یَکَش بَمیرِه و بعد از اون داوری اِنِه،

²⁸ پس مَسیح هَم یَکَش قِروونی بَوِه تا خیلیایی گِناهِنِ از بِین بَوِرِه، دِوّمین کَشی سِه اِنِه، ولی نا گِناهِنی از بِین بَوِردنی سِه، بَلگی اونانی نِجاتی سِه گه شوقی هَمرا وی چِش بِرانِه.